2 Samuel 7 - MUKANDA USANDU WA ZAMBI 1975

¹ Muze mwanangana hatwama mu zuwo lienyi, ni Yehova hanamuhwimisa kuli akwa kole jenyi eswe a kumujingilika,

² mwanangana yamba kuli profeta Natane ngwenyi. Tala yami natwama mu zuwo lia sedru alioze mushete wa Zambi watwama mu mbalaka.

³ Natane yamba kuli mwanangana ngwenyi, Yénu nulinge yeswe yili mu mbunge yenu, mumu Yehova hwali hamuwika ni yenu.

⁴ Alioze ufuku uze wene liji lia Yehova yiliza kuli Natane ngwo,

⁵ Yako uambulwile kavumbi kami David ngwe, Yehova kanambe ngwenyi, Te unazange kungutungila zuwo lia kutwamamo, nyi?

⁶ Chize ku tangwa lize nachijile A-Izalele ku Engitu ndo musono kanda nguchitwama mu zuwo, alioze hinatutujoka mu mbalaka ni mu tabernakulu.

⁷ Mu yifuchi yeswe napalikile ni A-Izalele eswe te nahanjikile limwe liji ni akwa kuyula aze natumine kufunga atu jami A-Izalele ngwami, Kuchi te kwangutungilile zuwo lia sedru?

⁸ Kashika amba kuli kavumbi kami David ngwe, Yehova-wa-Tujita kanambe ngwenyi, Nakuchijile mu yambu kuze wakawile mapanga ukapwe mwanangana wa atu jami A-Izalele.

⁹ Nendele hamwe ni yena kweswe wayile. Hinasutula akwa kole je eswe kumeso je, mba mungukwaha jina lilemu ngwe majina ja e alemu a hashi.

¹⁰ Atu jami A-Izalele mungwatongwela chifuchi, mungwatungisako akatwame mu chihela cho. Kechi kututujoka nawa; yingulungulu kechi kwahungumiona ngwe alingile kunyima,

¹¹ chize ku miaka yize naselele akwa kuyula helu lia atu jami A-Izalele. Mungukuhwimisa kuli akwa kole je eswe. Chikwo nawa Yehova kanambe kuli yena ngwenyi, Yami Yehova mungukakupwisa munyachi.

¹² Muze matangwa je hamanunuka hiwaya tulo, hiwaya kuli tulamba twe, kulutwe mungukakolesa mukwa munyachi we yoze wamusema, mungukakolesa wanangana wenyi.

¹³ Iye kumakatunga zuwo ha jina liami, mba yami kumungukakolesa ngunja ya wanangana wenyi yikapwe ya mutolo.

¹⁴ Ami kumungukapwa tato; iye kumakapwa mwanami. Nyi malinga uhenge mungumufumba ni mbwechi ya atu ni mijiji ya ana ja atu.

¹⁵ Hindu chichi kumuchiza utu wa zango liami ngwe nauchijile kuli Saulu yoze nahumine kumeso je.

¹⁶ Zuwo lie ni wanangana we muyikakola kumeso je ku miaka yeswe. Ngunja ye kumuyikakola ya mutolo.

¹⁷ Natane yahanjika maliji wano eswe kuli David nikulita ni usolwelo uno weswe.

¹⁸ Mba mwanangana David yanjila, yatwama kumeso ja Yehova. Yamba ngwenyi, Mwene Yehova kuchi napwa yami, hanji munyachi wami kuchi wapwa wanguneha ndo kuno?

¹⁹ Chipwe chino chapwile chuma chikepe kuli yena Mwene Yehova, hiwahanjika ha kutwala ku munyachi wa yami kavumbi ke miaka yinji kulutwe. Mwene Yehova, chino chapwa ndako ja atu nyi?

²⁰ Mba yami David yika munguhasa kwamba kuli yena? Mumu yena Mwene Yehova unanyingika kavumbi ke.

²¹ Hiwalinga unene uno weswe mumu ha liji lie, ni kulita ni mbunge ya yena mwene hanga yami kavumbi ke ngukachinyingike.

²² Kashika Yehova Zambi, uli munene. Kukushi umwe walita ni yena. Kukushi umwe Zambi mukwo shina yena wika, nikulita ni yuma yize yeswe hitunevu ni matwi jetu.

²³ Mba vungu lika lia hano hashi lialita ni atu je A-Izalele? Yena Zambi wayile kwakula akapwe atu je, ukalilingile jina, ukaalingile ayo yuma yinene ya woma ni mu chifuchi che, kumeso ja atu je, waze waakulile ku Engitu ni ku mavungu ni mazambi jo, akapwe atu je.

²⁴ Walikoleselele vungu lie lia Izalele akapwe atu je a miaka yeswe. Yena Yehova walipwishile Zambi yo.

²⁵ Kashika Yehova Zambi, liji lino hiwahanjika ha kutwala kuli kavumbi ke ni munyachi wenyi ulikolese likapwe lia mutolo ukalinge chino hiwamba.

²⁶ Jina lie likafumane ku miaka yeswe ngwo, Yehova-wa-Tujita iye Zambi ya A-Izalele. Chocho munyachi wa kavumbi ke David muukakola kumeso je.

²⁷ Mumu yena, Yehova-wa-Tujita, Zambi ya A-Izalele, hiwalweza kavumbi ke ngwe, Mungukolesa munyachi we, kashika kavumbi ke hapwa nacho mu mbunge yenyi kulemba chocho kuli yena.

²⁸ Yena Mwene Yehova uli Zambi. Maliji je amwenemwene, mba hiwalakenya chuma chino chipema kuli kavumbi ke.

²⁹ Kashika wahisa kama munyachi wa kavumbi ke ukalinduluke kumeso je wa mutolo, se yena Mwene Yehova hiwachamba. Ukawahise munyachi wa kavumbi ke, Ukawahe ku miaka yeswe.