2 Samuel 6 - MUKANDA USANDU WA ZAMBI 1975

¹ Cheka nawa David yakungulula malunga eswe a kusakula mu Izalele—makumi atatu a tununu.

² David yakatuka, yaya ni atu eswe apwile no ku Mbale-Yunda akasake mushete wa Zambi uze uli ni jina lia Yehova-wa-Tujita wakutwama hali akerupimi.

³ Yambata mushete wa Zambi ha temba liaha nikuuchiza ku zuwo lia Abinadambe lili ha mulundu. Uza ni Ahio ana ja Abinadambe endesele temba liaha.

⁴ Yalineha hamwe ni mushete wa Zambi chize ku zuwo lia Abinadambe lili ha mulundu. Ahio te kanende kulutwe lia mushete.

⁵ David ni akwa vungu lia Izalele eswe awahililile kumeso ja Yehova ni yisaji ya mutondo wa kupresu; tulialia, ni yisaji ya kusa, ni tumikupiela, ni njalamina, ni sembalu.

⁶ Ha kuheta ku chizungwilo cha Nakone, Uza wazozele kwoko lienyi ku mushete wa Zambi nikuukwata, mumu ngombe yatalinga.

⁷ Mba utenu wa Yehova yiukasumukina hali Uza. Zambi yamulamba mumu ha kusa kwoko lienyi ha mushete. Yafwilako; kwe ku lumbu lia mushete wa Zambi.

⁸ David aye yatenuka mumu Yehova halusukila hali Uza, mba jina lia kuma kuze ngwo, Pereze-Uza ndo musono.

⁹ David yavwila woma Yehova tangwa lize, yamba ngwenyi, Kuchi mushete wa Yehova muuhasa kwiza kuli yami?

¹⁰ Chocho David kazangile kuneha mushete wa Yehova kwimbo lia David. Alioze David yautwala ku lumbu ku zuwo lia Obede-Endome Ka-Ngata.

¹¹ Mushete wa Yehova watwamine mu zuwo lia Obede-Endome Ka-Ngata tukweji atatu. Yehova wawahishile Obede-Endome ni akwa zuwo lienyi eswe.

¹² Yambulwila mwanangana David ngwo, Yehova hanawahisa zuwo lia Obede-Endome ni yuma yenyi yeswe mumu ha mushete wa Zambi. Kashika David yaya yachiza mushete wa Zambi mu zuwo lia Obede-Endome yauneha kwimbo lia David ni kulikwiza chinji.

¹³ Muze akwa kumbata mushete wa Yehova henda shimbo jisambano iye walambwile kuji ya ngombe ni chimbembe wa maji.

¹⁴ David wahanganyine kumeso ja Yehova ni mbunge yenyi yeswe. David te kanazala efode ya hina lipema litoma.

¹⁵ Chocho David ni akwa vungu lia Izalele eswe anehene mushete wa Yehova ni kukalumioka chinji, ni liji lia chitavwi.

¹⁶ Ha kuheta mushete wa Yehova kwimbo lia David Mikale mwana Saulu yatalila ku njanela, yamona mwanangana David kanatumbwoka ni kuhangana kumeso ja Yehova, kashika yamulelesa mu mbunge yenyi.

¹⁷ O yaneha mushete wa Yehova; yausa muma mwawo muchima lia mbalaka yize David hanautungila. David yalambula milambu ya kulumba ni milambu ya sambukila kumeso ja Yehova.

¹⁸ Muze te David hamana kulambula milambu ya kulumba ni milambu ya sambukila yawahisa atu mu jina lia Yehova-wa-Tujita.

¹⁹ Yapangila hakachi ka atu eswe, ye mbunga yeswe ya A-Izalele, ni malunga ni mapwo, kuli mweswe mbolo yimuwika, ni chihanda cha yifwo, ni chandanda cha uva jomu. Mba atu eswe yaya, mutu ku zuwo lienyi, mutu ku zuwo lienyi.

²⁰ David yeza kuwahisa zuwo lienyi, alioze Mikale mwana Saulu yatuhuka kupatwiza David ngwenyi, Mba mwanangana wa Izalele walilemesanga kanawa musono nikulifukula kumeso ja ana-mapwo ja ngamba jenyi ngwe umwe mutu wamokomoko malifukula ni sonyi jakuhi.

²¹ David yamba kuli Mikale ngwenyi, Chapwanga kumeso ja Yehova, yoze wangutongwele helu lia tatenu ni helu lia munyachi wenyi weswe akangupwise mwanangana wa Izalele, e atu ja Yehova. Mba munguwahilila kumeso ja Yehova.

²² Mungulilelesa nawa kuhiana chino; mungupwa wamokomoko kumeso jami, alioze kumeso ja ana-mapwo hiwaavuluka mungupwa mulemu.

²³ Mba Mikale mwana Saulu kasemene mwana ndo tangwa lia kufwa chenyi.