2 Samuel 5 - MUKANDA USANDU WA ZAMBI 1975

¹ Minyachi yeswe ya A-Izalele yeza kuli David ku Heprone ngwo, Etu tuli chifwaha chenu ni musunya wenu.

² Kunyima muze Saulu wapwile mwanangana wetu hindu yenu nwasongwelele A-Izalele ha kutuhuka ni ha kunjila, mba Yehova wanwambile ngwenyi, Yena muopwa kafunga ka atu jami A-Izalele. Yena muopwa mwanangana wa Izalele.

³ Chocho makulwana eswe a Izalele yeza kuli mwanangana mu Heprone, mba mwanangana David yakolesa no usendo kumeso ja Yehova mu Heprone. No awayishile David mwanangana wa Izalele.

⁴ David te kali ni makumi atatu a miaka muze aputukile kuyula; mba yayula makumi awana a miaka.

⁵ Mu Heprone wayulile A-Yunda miaka shimbiali ni tukweji asa-mbano, mba mu Yerusaleme wayulile eswe A-Izalele ni A-Yunda makumi atatu a miaka ni miaka yitatu.

⁶ Mwanangana ni malunga jenyi yaya ku Yerusaleme akase jita ni A-Yepushe, enya chifuchi waze hanambe kuli David ngwo, Akuno kuchi kanjila; chipwe afwa-meso ni yitonji mahasa kukuhuma. Mumu yanyonga ngwo, David kechi kuhasa kunjila.

⁷ Hindu David yatambula chihunda cha kukolesa cha Zaione, che chihunda cha David.

⁸ Ha tangwa lize David yamba ngwenyi, Mweswe malamba A-Yepushe akakandukile ku kapila wa meya akalambe yitonji ni afwameso waze David kaazangile ni mbunge yenyi. Kashika kakwamba ngwo, Afwameso ni yitonji kechi kunjila mu zuwo.

⁹ David watwamine mu chihunda chize cha kukolesa. Yachiluka ngwenyi, Limbo lia David. David yatungisa limbo chize ku Milo kweswe kwa kujingilika, ni muchima.

¹⁰ David wayile nikulema mumu Yehova Zambi-ya-Tujita wapwile hamwe nenyi.

¹¹ Hirame mwanangana wa Teru yatuma tunganda kuli David, ni mitondo ya sedru, ni akarpinteru, ni apedreru. O yatungila David zuwo.

¹² David yasa chinyingi ngwenyi, Yehova hanangukolesa mwanangana wa Izalele. Hananangamisa wanangana wami mumu ha mukunda wa atu jenyi A-Izalele.

¹³ David yatambula *akonkubina akwo ni mapwo nawa akwo ku Yerusaleme muze te hanakatuka ku Heprone. David wasemene ana a malunga ni a mapwo nawa.

¹⁴ Majina ja waze asemene mu Yerusaleme wano: Shamua, ni Shobabe, ni Natane, ni Solomone,

¹⁵ ni Ibare, ni Elishua, ni Nefwe, ni Yafia,

¹⁶ ni Elisama, ni Eliada, ni Elifelete.

¹⁷ Muze A-Filistea hevwa ngwo, Hanawayisa David mwanangana wa A-Izalele, A-Filistea eswe akandukile nikufupa David. Alioze David yachivwa, yapalumuka ku chivwenge.

¹⁸ A-Filistea o te haneza hanalitande mu chikulo cha Refane.

¹⁹ David yahula Yehova ngwenyi, Ngukanduke ngukase jita ni A-Filistea nyi? Muakunjika kuli yami, nyi? Yehova yamba kuli David ngwenyi, Kanduka, mumu pundu mungukunjika A-Filistea kuli yena.

²⁰ David yeza ku Mbale-Perazime, yaakumbako. Mba yamba ngwenyi, Yehova hanapukula akwa kole jami ngwe sanga lia kupukula. Kashika jina liako ngwo, Mbale-Perazime.

²¹ A-Filistea yahichikako mahamba jo, mba David ni malunga jenyi yaambata.

²² A-Filistea yeza cheka nawa, yalitanda mu chikulo cha Refane.

²³ Muze David hahula Yehova, iye yamba ngwenyi, Kanda ukanduka. Jingila kunyima yo ukaawane hatalanganyi ni mitondo ya amora.

²⁴ Muze muwivwa lushindo wa kwenda mu masongo a mitondo ya amora, hatambuka mumu Yehova kanakutetekela akalambe tujita twa A-Filistea.

²⁵ David yalinga nikulita ni shimbi ya Yehova. Yalamba A-Filistea chize ku Ngeba ndo ku Ngezere.