2 Samuel 4 - MUKANDA USANDU WA ZAMBI 1975

¹ Ha kwivwa ngwo, Abenere hafwa mu Heprone hamu lieswe lia Isheboshete mwana Saulu liamuhwa, ni A-Izalele eswe yalishimwoka.

² Mwe mwana Saulu wapwile ni malunga aali, tupitau twa yizavu ya tujita. Jina lia mukwo Bana. Jina lia mukwo Rekabe. O te ana ja Rimone Ka-Mbenjamine wa ku Mberote (mumu kakwalula Mberote kuli A-Mbenjamine.

³ Akwa Mberote yachinyina ku Ngitaime, katwamako ndo musono).

⁴ Jonatas mwana Saulu wapwile ni mwana wa lunga, chitonji ku molu jenyi. Muze lusango wa Saulu ni Jonatas ku Yezerele wejile, iye te kali ni miaka yitano, mba ndeji yenyi yamwanda, yachina. Ha kuchina kapupushi yamuholola, iye yalumuka chitonji. Jina lienyi Mefiposhete.

⁵ Acho Rekabe ni Bana, ana ja Rimone Ka-Mberote, yakatuka, yaya. Mba ha chivukuminya cha tangwa yeza ku zuwo lia Isheboshete shimbu machihwima, tangwa ha muchima.

⁶ Yanjila muchima lia zuwo ngwe tiliku anafupu kumbata. Yamutuwa jimo, mba Rekabe ni Bana yachina.

⁷ Yanjila mu zuwo shimbu iye kanapombo ha muhela. Yamulamba nikumushiha. Yamutapa mutwe mba yanda we mutwe, yenda ufuku weswe ndusu mu Arapa.

⁸ Yaneha mutwe wa Isheboshete kuli David mu Heprone. Yamba kuli mwanangana ngwo, Wenu we mutwe wa Isheboshete mwana Saulu mukwa kole yenu, yoze wafupile kunushiha. Yehova hakalila mwene wami mwanangana hali Saulu ni ana jenyi musono.

⁹ Alioze David yakumbulula Rekabe ni yayo Bana, ana ja Rimone Ka-Mberote, ngwenyi, Ni mwono wa Yehova yoze wakulile mwono wami ku luyinda mweswe,

¹⁰ muze umwe wangulwezele ngwenyi, Saulu hanafu, nikunyonga ngwenyi, Lusango mupema kuli iye, namukwachile nikumushiha ku Zikalage mumu ha lusango wenyi.

¹¹ Kuhiana chikolo muze yingulungulu hashiha mukwa ululi mu zuwo lienyi mwene ha muhela. Te chichi kufwetesa manyinga jenyi ku moko jenu ngukanunongese hashi nyi?

¹² David yatuma akweze jenyi, yaashiha, yaateta moko ni molu, nikwasukika ku Chitende cha Heprone. Alioze yanda mutwe wa Isheboshete, yaufunda ku chifuka cha Abenere mu Heprone.