2 Samuel 3 - MUKANDA USANDU WA ZAMBI 1975

¹ Jita yapwile ya miaka hakachi ka munyachi wa Saulu ni munyachi wa David. David wayile nikuliwezela tachi, alioze munyachi wa Saulu wayile nikukokoloka.

² David wasemene ana a malunga mu Heprone. Mutangu iye Amnone, mwana wa Ahinoame, wa ku Yezerele.

³ Wamuchiali Chiliabe, mwana wa Abigale, wapwile pwo lia Nabale wa ku Karmela. Wamuchitatu Absalome, mwana wa Maka, iye mwana wa Talamai, mwanangana wa Ngeshure.

⁴ Wamuchiwana Adonija, mwana wa Hagita. Wamuchitano Shefatia, mwana wa Abitale.

⁵ Wamuchisambano Itarime, mwana wa Egala, pwo lia David. Wano David waasemene mu Heprone.

⁶ Shimbu lieswe lia jita hakachi ka munyachi wa Saulu ni munyachi wa David Abenere iye walitakamishine ha sali lia munyachi wa Saulu.

⁷ Saulu wapwile ni *konkubina jina lienyi Rizipa mwana Aya. Isheboshete yamba kuli Abenere ngwenyi, Kuchi te hiwanjila kuli *konkubina ya tata?

⁸ Abenere yatenuka chikolo ni maliji a Isheboshete. Yamba ngwenyi, Te nguli kawa ka A-Yunda nyi? Ami musono ngunasolola utu ku munyachi wa tatenu Saulu, ni kuli ana-akwo, ni tusendo twenyi, ni yena chakuhanyine kuli David, hindu musono unangusumu mutonga wa pwo.

⁹ Zambi chocho alinge kuli yami Abenere nikuwezaho nawa, nyi chalingilile David chize Yehova hanalishingi nenyi,

¹⁰ kuchiza wanangana ku munyachi wa Saulu nikukolesa ngunja ya David hali A-Izalele ni hali A-Yunda chize ku Ndane ndo ku Mbia-shipa.

¹¹ Isheboshete kahashile kukumbulula Abenere liji likwo mumu wamuvwilile woma.

¹² Abenere yatuma tunganda kuli David kuze atwama ngwenyi, Chifuchi chino cha-ya? Kolesa ni yami usendo we mba kwoko liami mulipwa ni yena kuneha A-Izalele eswe kuli yena.

¹³ Iye yakumbulula ngwenyi, Chipema. Mungukolesa usendo ni yena, alioze chuma chimuwika Chakutamba kulinga. Kuchi kumona meso jami ndo mulianga kuneha Mikale mwana Saulu, muze muwiza kungumona.

¹⁴ Mba David yatuma tunganda kuli Isheboshete mwana Saulu ngwenyi, Pe pwo liami Mikale yoze namwechelele chihako cha kulakaji lia misosha ya A-Filistea.

¹⁵ Isheboshete yatuma, yamutambula kuli lunga lienyi Paltiele mwana Laishe.

¹⁶ Alioze lunga lienyi wayile hamwe nenyi nikumulilila jila yeswe ndo Mbahurime. Kwenako Abenere yamwamba ngwenyi, Yako; hiluka. Iye yahiluka.

¹⁷ Abenere yatwama punga ni makulwana a Izalele ngwenyi, Ha shimbu nwafupile David akapwe mwanangana wenu.

¹⁸ Hichilingenu haliapwila. Mumu Yehova hanalakenya ni David ngwenyi, Ku kwoko lia kavumbi kami David mungulamwina atu jami A-Izalele kuli A-Filistea ni kuli akwa kole jo eswe.

¹⁹ Abenere yahanjika nawa ni A-Mbenjamine eswe, mba Abenere yaya ku Heprone akambulwile David yuma yize yeswe A-Izalele ni munyachi wa Mbenjamine anyongene kulinga.

²⁰ Muze Abenere ni makumi aali a malunga ahetele kuli David mu Heprone, David yaalingila chiteleka ni Abenere ni malunga aze ejile no.

²¹ Abenere yamba kuli David ngwenyi, Munguya; mungukungulula A-Izalele eswe kuli yenu mwene wami mwanangana akakolese usendo ni yenu nukayule helu lia yize yeswe mbunge yenu yinazange. Chocho David yashika Abenere, iye wayile ni sambukila.

²² Henaho atu ja David hamwe ni Joabe ejile, te anakatuka ku jita nikuneha upite wunji. Alioze Abenere keshi ni David mu Heprone mumu hamutuma mba haya ni sambukila.

²³ Muze Joabe ni tujita eswe heza yalweza Joabe ngwo, Abenere mwana Nere wezanga kuli mwanangana, mba iye hamwecha, haya ni sambukila.

²⁴ Joabe yaya kuli mwanangana ngwenyi, Chika nwalinga? Abenere wezanga kuli yenu, kuchi te hinwamwecha, mba haya?

²⁵ Nunanyingika Abenere mwana Nere wezanga mukunwonga, akanyingike kutuhuka chenu, ni kunjila chenu, ni yize yeswe nunalingi.

²⁶ Ha kutuhuka kumeso ja David Joabe yatuma tunganda kukaula Abenere. Yamuwana ku shima lia Sira yamuhilwisa, alioze David kachinyingikine.

²⁷ Muze Abenere haheta ku Heprone, Joabe yamutwala ku lumbu mwe mu chikolo akahanjike nenyi ukawo. Kuze kwene yamutuwa mu jimo Chocho yafwa mumu ha manyinga a Asahele mwanakwo wa Joabe.

²⁸ Kulutwe, muze David hachivwa yamba ngwenyi, Ni yami ni wanangana wami twasamba ku miaka kumeso ja Yehova ha kutwala ku manyinga a Abenere mwana Nere.

²⁹ Akashate ha mutwe wa Joabe ni akwa munyachi wa tato eswe. Ndo ku miaka ya mutolo ku munyachi wa Joabe kanda kuhona umwe mukwa mashina, hanji mukwa mbumba, hanji mukwa kwenda ni pango, hanji yoze mafwa ni katana, hanji yoze mahona kulia!

³⁰ Chocho Joabe ni mwanakwo Abishai yashiha Abenere mumu te iye hashiha mwanakwo Asahele mu jita ku Ngibeone.

³¹ David yamba kuli Joabe ni kuli atu eswe hamwe nenyi ngwenyi, Sonyenu mazalo jenu nukazale yikeleyi, nukalishimwoke kumeso ja Abenere. Mwanangana David wakawile muhango.

³² Yafunda Abenere ku Heprone, mba mwe mwanangana wakololokele nikulila ku fuka lia Abenere, ni atu eswe alilile.

³³ Mwanangana Walilile mbimbi hali Abenere ngwenyi, Abenere! Te Chakutamba kufwa ngwe chihepuke nyi?

³⁴ Kakukashile moko; kasele molu je mu kúli. Wafwile chizechene ngwe mutu kakufwa kuli yingulungulu. Mba atu eswe amulilile nawa.

³⁵ Atu eswe ejile kushinjila David akalie shimbu kuchili mwalwa. Alioze David yalishinga ngwenyi, Zambi chocho alinge kuli yami nikuwezaho nawa nyi mungulia mbolo hanji chimwe chuma chikwo ndo tangwa hilianjila.

³⁶ Atu eswe yachimona; yichiawahila chizechene ngwe yitanga yeswe ya mwanangana yiyiwahila atu eswe.

³⁷ Atu eswe ni A-Izalele eswe asele chinyingi ngwo, Kuchapwile upale wa David kushiha Abenere mwana Nere.

³⁸ Mwanangana yamba kuli atu jenyi ngwenyi, Kuchanulumbunukine, nyi? Musono umwe mulemu, umwe mutu munene hafwa mu Izalele.

³⁹ Ni yami hinalela musono, chipwe nguli mwanangana wa kuwayisa ni maji. Wano malunga ana ja Zeluia angukalila naye. Yehova akafwetese mwe chingulungulu nikulita ni ungulungulu wenyi.