2 Samuel 24 - MUKANDA USANDU WA ZAMBI 1975

¹ Kulutwe nawa utenu wa Yehova wakasumukine hali A-Izalele mba wasa ngumwine David kwalinga chipi ngwenyi, Yako Ualule A-Izalele ni A-Yunda.

² Kashika mwanangana yamba kuli Joabe kapitau wa tujita, te kali nenyi hamuwika, ngwenyi, Yako ukapajieke hakachi ka minyachi yeswe ya Izalele chize ku Ndane ndo ku Mbia-shipa ukatale e atu hanga ngukanyingike kwalula cha atu.

³ Joabe yamba kuli mwanangana ngwenyi, Cheswacho kwatala cha atu muchipwa Yehova Zambi yenu awezeko kulakaji lia yisuho kwe kumeso ja mwene wami mwanangana, alioze kuchi te chuma chino muchiwahila mwene wami mwanangana?

⁴ Chipwe chocho, liji lia mwanangana liakumbile Joabe ni tupitau twa tujita. Kashika Joabe ni tupitau twa tujita akatukile kumeso ja mwanangana akalule e atu.

⁵ Yazauka Yordau nikusa mbalaka jo ku Aroere sali lia chindume lia chihunda chili hakachi ka chikulo cha Ngate, ni ndo ku Yazere.

⁶ Yeza ku Ngiliate ni chifuchi cha Tatimi-Hodishi ni ku Ndanejane ni ndo ku Sendone.

⁷ Yaheta ku mbonge ya Teru ni ku yihunda yeswe ya A-Hevwe, ni ya A-Kanana ni kutuhukila ku Yunda ku Sule ku Mbia-shipa.

⁸ Chocho muze hapajieka kweswe ku chifuchi yeza ku Yerusaleme muze hikwahwa tukweji livwa ni makumi aali a matangwa.

⁹ Joabe yahana kuli mwanangana kwalula cha atu. Kwapwile mu Izalele kulakaji nake a tununu a malunga a hamu akwa katana. Malunga a mu Yunda kulakaji atano a tununu a malunga.

¹⁰ Alioze muze hanalula atu mbunge ya David yiyimuhisa. David yamba kuli Yehova ngwenyi, Hinavulumuna chikolo ha kulinga chuma chino, alioze haliapwila ngunalembe, Yehova, Chiza uhenge wa yami kavumbi ke, mumu nalinga ni uhepuke wunji.

¹¹ Muze David hahinduka ha chimene liji lia Yehova yiliza kuli profeta Ngate, mukwa kumona wa David ngwenyi,

¹² Yako uhanjike ni David ngwe, Yehova kanambe ngwenyi, Ngunakwehe yuma yitatu. Litongwele chuma chimuwika ngukakulingecho.

¹³ Chocho Ngate yeza kuli David nikumwambulwila ngwenyi, Yize miaka shimbiali ya kapunga kuli yena mu chifuchi che? nyi Shinaho uchine tukweji atatu kumeso ja akwa kole je shimbu o makuhanga? nyi kupwe matangwa atatu a musongo wa chilungo mu chifuchi che? Zewula haliapwila, utongole chize mungukumbulula kuli yoze wangutumanga.

¹⁴ David yamba kuli Ngate ngwenyi, Nguli wa kupalakenya. Hapwa tuholoke mu kwoko lia Yehova, mumu keke yenyi yinene. Kanda nguholoka mu kwoko lia atu.

¹⁵ Chocho Yehova yatuma chilungo hali A-Izalele chize ku chimene ndo ku ola yize asele. Kwafwile hakachi ka atu makumi shimbiali a tununu a malunga chize ku Ndane ndo ku Mbia-shipa.

¹⁶ Alioze muze mungelo wolwele kwoko lienyi ku Yerusaleme achonwone, Yehova walikonyekene ha chuma chino chikalu. Yamba kuli mungelo yoze te unonwona atu ngwenyi, Kunahu. Kokolola kwoko lie. Mungelo wa Yehova achili te ku chizungwilo cha Arauna wa ku Yepushe.

¹⁷ Ha kumona mungelo yoze unalambe atu David yamba kuli Yehova ngwenyi, Hingunavulumuna! Hingunalingi ni kupiya. Alioze wano mapanga yika alingile? Ngunalembe, kwoko lie likalimike ni yami ni munyachi wa tata.

¹⁸ Tangwa lioliene Ngate yeza kuli David, yamba kuli iye ngwenyi, Yako ukatungile Yehova chilumbilo ha chizungwilo cha Arauna wa ku Yepushe.

¹⁹ David yaya nikulita ni liji lia Ngate ni shimbi ya Yehova.

²⁰ Arauna yatala, yamona David ni tuvumbi twenyi kaneza kuli iye. Arauna yatuhuka yahetamina hashi kumeso ja mwanangana.

²¹ Arauna yamba ngwenyi, Kuchi te yenu mwene wami mwanangana nuneza kuli yami kavumbi kenu? David ngwenyi, Kulanda chizungwilo che, ngukatungileko chilumbilo kuli Yehova, hanga chilungo chipatuke hakachi ka atu.

²² Arauna yamba kuli David ngwenyi, Mwene wami mwanangana atambule, atambule cheswacho chamupemena. Talenu ngombe akapwe mulambu wa kulumba, ni yuma ya kuzungula nayo ni e makanga a ngombe akapwe kunyi.

²³ Aye yeswe, mwanangana, yami Arauna ngunahana kuli mwanangana. Arauna yaweza nawa kuli mwanangana ngwenyi, Yehova Zambi yenu anutambule kanawa.

²⁴ Alioze mwanangana yamba kuli Arauna ngwenyi, Hi chocho ko. Munguchilanda pundu kuli yena ni ndando. Chikwo nawa, chichi kulambula kuli Yehova Zambi yami mulambu wa kulumba uze chaufwetelele ndando. Chocho David yalanda chizungwilo ni ngombe ha ndando ya makumi atano a shekele ja prata.

²⁵ David watungileko chilumbilo kuli Yehova. Yalambulako milambu ya kulumba ni milambu ya sambukila. Chocho Yehova wevwile kulemba ha chifuchi, mba chilungo chapatukile hakachi ka A-Izalele.