2 Samuel 23 - MUKANDA USANDU WA ZAMBI 1975

¹ Maliji asula a David wano: David mwana Yese, lunga wa kumunanga misa kwilu; yoze amuwayishile ni maji kuli mwe Zambi ya Yakomba, mukwa kutomba miaso yipema mu Izalele ngwenyi,

² Spiritu ya Yehova wahanjikile muli yami, Liji lienyi liapwile ha limi liami.

³ Zambi ya Izalele wambile, Liwe lia Izalele wambile kuli yami ngwenyi, Yoze mayula atu ni ululi, mayula ni woma wa Zambi.

⁴ Iye mapwa ngwe pangu lia chimenemene ha kuvumbuka cha tangwa, ni malelwa akuhi, muze mwambu wovu unasoko mu mavu, ha mwalwa upema kulutwe lia vula.

⁵ Chamwenemwene munyachi wami kuwapwile chocho ni Zambi, hindu hanakolesa ni yami usendo wa mutolo, wa kululika mu yuma yeswe, wakola. Wenawo wapwa ulamwino wami weswe ni kuzanga chami cheswe, chipwe kausokeseleko.

⁶ Alioze atu amokomoko kumakapwa eswe ngwe mbimbo ja kuchinda kuli mutu, mumu kechi kuhasa kujikwata ni moko.

⁷ Mutu yoze maakwata, ndo malipakata ni yikungo ni chikundo cha kunga. O eswe kumakaocha ni kahia pwilili kuma kwo.

⁸ Majina ja malunga akwa ndundo David wapwile no wano: Joshepe-Basebete Ka-Takemone mukwa lutwe hakachi ka tupitau; iye Adino Ka-Eze waliashile ni kulakaji nake ola yimuwika nikwashiha.

⁹ Kuhata hali iye kwapwile Eleazare mwana Ndodo mwana wa umwe Ka-Hoha. Iye wapwile wa atatu akwa ndundo hamwe ni David ha kutomba A-Filistea waze aswile ku jita, ni malunga a Izalele eswe te hanayi.

¹⁰ Iye yakatuka, yalamba A-Filistea ndo kwoko lienyi Hakala, liakakachila ku katana. Yehova yalinga kukumba chinene tangwa lize. Atu amukawile kupupa upite wika.

¹¹ Kuhata hali iye kwapwile Shama mwana Agi wa ku Harara. A-Filistea akungulukile mbunga ku munda wa makunde, mba atu yachina kumeso jo.

¹² Alioze iye wamanyine hakachi ka munda nikuuashila jita. Yashiha A-Filistea, ni Yehova walingile kukumba chinene.

¹³ Hakachi ka makumi atatu akwa lutwe, atatu akatukile yeza kuli David ku Ndulame ha kakweji wa kucha mbuto. Tujita twa A-Filistea hasa chilombo cho mu chikulo cha Refane.

¹⁴ David wapwile mu chivwenge, ni maswalale ja A-Filistea achili te mu Mbeteleme ha matangwa aze.

¹⁵ David yevwa usona, yamba ngwenyi, Nyi kachi umwe mangunehena amwe meya a kunwa a ku shima lia mu Mbeteleme lize lili ku chikolo!

¹⁶ E malunga atatu a ndundo yapula ndusu mu mbunga ya A-Filistea; yataha meya a mu shima lia Mbeteleme lili ku chikolo; yaambata; yaaneha kuli David. Alioze iye kasolo kuanwa. Yaazujila kumeso ja Yehova.

¹⁷ Yamba ngwenyi, Yehova! Chikapwe kusuku ni yami kulinga chuma chino. Te mungunwa manyinga a wano malunga asele mwono wo mu Utoji? Kashika kaanwine. Yuma yino alingile e malunga atatu a ndundo.

¹⁸ Abishai mwanakwo wa Joabe mwana Zeluia iye wapwile mukwa lutwe hakachi ka atatu. Iye wazundwile kunga lienyi kulimika ni kulakaji atatu. Yaashiha. Kashika wapwile ni lufuma hakachi ka atatu.

¹⁹ Iye wapwile mulemu wahiana hakachi ka atatu kashika amupwishile kapitau. Hindu kahetele kuli atatu atangu.

²⁰ Benaia mwana Jehoiada mwana wa umwe mukwa hamu wa ku Kabzele te hanalingi yuma yinji ya ndundo. Washihile ana aali a malunga a Ariele Ka-Moape. Ha mwaka wa neve yanjila mu wina nikushiha ndumba.

²¹ Yashiha nawa umwe Ka-Engitu; mutu mupema ku meso. Ka-Engitu te kali ni kunga mu kwoko lienyi alioze Benaia wakundamine kuli iye ni mulumbu; yachanga kunga ku kwoko lia Ka-Engitu yamushiha ni kunga lienyi mwene.

²² Benaia mwana Jehoiada walingile yuma yino mba wapwile ni lufuma hakachi ka akwa ndundo atatu.

²³ Wahianyine ni ulemu e makumi atatu, hindu kahetele kuli atatu atangu. David wamusele helu lia akwa kumufunga.

²⁴ Asahele mwanakwo wa Joabe iye wapwile wa waze makumi atatu; ni Elehana mwana Ndodo wa ku Mbeteleme;

²⁵ ni Shama Ka-Harode; ni Elika Ka-Harode;

²⁶ ni Heleze Ka-Pale; ni Ira mwana Ikeshe wa ku Tekoa;

²⁷ ni Abieza Ka-Anatote; ni Mebunai Ka-Husha;

²⁸ ni Zalmone Ka-Hoha; ni Maharai Ka-Netofate;

²⁹ ni Helebe mwana Bana Ka-Netofate; ni Itaia mwana Ribai wa ku Ngibia ya A-Mbenjamine;

³⁰ ni Benaia Ka-Piratone; ni Hidai wa ku yitwetwe ya Ngasha;

³¹ ni Abi-Albone Ka-Arpa; ni Azmave Ka-Baruma;

³² ni Eliapa Ka-Salbone wa kuli ana a Jashene; ni Jonatas;

³³ ni Shama Ka-Harara; ni Ahiame mwana Sharare Ka-Harara;

³⁴ ni Elifelete mwana Ashebai mwana wa Ka-Makata; ni Eliame mwana Ahitofele Ka-Ngilo;

³⁵ ni Hezrai Ka-Karmela; ni Parai Ka-Arpa;

³⁶ ni Ingale mwana Natane wa ku Zoba; ni Mbani Ka-Ngate;

³⁷ ni Zeleke Ka-Amone; ni Nahari Ka-Mberote, mukwa kumbachila yitwa Joabe mwana Zeluia;

³⁸ ni Ira, Ka-Itri; ni Ngarebe Ka-Itri;

³⁹ ni Uriya Ka-Hete; eswe te makumi atatu ni shimbiali.