2 Samuel 22 - MUKANDA USANDU WA ZAMBI 1975

¹ Ha tangwa lize Yehova wapulwile David ku tachi ja akwa kole jenyi ni ku tachi ja Saulu, David wambile maliji a mwaso uno kuli Yehova ngwenyi,

² Yehova iye liwe liami, ni mbonge yami, ni mukwa kungupulula,

³ Zambi iye liwe liami lia tachi, muli iye munguswama. Iye lukepwe wami, ni mbinga ya ulamwino wami, ni kaposhi kami musuku, ni chiswamino chami; chilamwina chami, wakungulamwina ku upupilo.

⁴ Mungutambika kuli Yehova, yoze watela uhaliso. Chocho mungulamwina kuli akwa kole jami.

⁵ Mikanya ya kufwa yangujingilikile, masanga a ungandangali angukolesele woma.

⁶ Mihipu ya Shiole yanguswikile. Miheto ya kufwa yanguwanyine.

⁷ Mu luyinda wami natambikile kuli Yehova, natetele kuli Zambi yami. Mu tembele yenyi wevwile liji liami; muteto wami wanjilile mwe mu matwi jenyi.

⁸ Haze hene hashi hanyikine nikuchikima, fundamentu ja malilu jachikimine, janyikine mumu iye hanatenuka.

⁹ Mwishi wakatukile ku mazulu jenyi, kahia ka ku kanwa lienyi kalesele, kakuyila ni makala a kahia.

¹⁰ Wahetamishine malilu nawa, wahulumukine. Kushi lia yiliato yenyi kwapwile milima pwi.

¹¹ Watambukile hali kerupimi, wahumukine, wamonekene ha mapulwa ja fuji.

¹² Watengele milima ngwe mbalaka yenyi, kulá cha meya; malelwa a pwi mwilu.

¹³ Ku kupeyima cha kumeso jenyi kwayilile makala a kahia.

¹⁴ Yehova wakulungujile mwilu, mwe Chitunda wahanjikile liji lienyi.

¹⁵ Watumine mivu, waamwangine; ni mihenyo nawa, waakumbile.

¹⁶ Mba ha mashima ja kalunga-lwiji hasolokele, fundamentu ja hashi jafukukile ha kwámbila cha Yehova, ha kakundukundu ka mwiku wa mu mazulu jenyi.

¹⁷ Watumishine kwilu, wangwanjile, wanguzambwile mu meya anji.

¹⁸ Wangupulwile kuli mukwa kole yami wa tachi. Wangupulwile kuli waze anguvwilile kole mumu angukumbile naye ni ngolo.

¹⁹ Ha tangwa lia luyinda wami angulundumukinyine, alioze Yehova wapwile ujikijilo wami.

²⁰ Wangutuhwishile ndo ku chihela chinene nawa. Wangupulwile mumu wawahililile muli yami.

²¹ Yehova wangwononwene nikulita ni ululi wami; wangufwetele nikulita ni kupema cha moko jami.

²² Mumu hingunafungu majila ja Yehova, chehukile Zambi yami ni ungulungulu.

²³ Mumu upatwilo wenyi weswe wapwile kumeso jami, chatewulukile ku yiyulo yenyi.

²⁴ Napwile mungunu nawa kumeso jenyi, nalifungile ku uhenge wami.

²⁵ Kashika Yehova hanangufwete nikulita ni ululi wami, nikulita ni kupema chami kumeso jenyi.

²⁶ Kuli akwa keke yena kumulisolola uli mukwa keke. Kuli angunu kumulisolola uli mungunu.

²⁷ Kuli akwa kulinanga kumulisolola uli mukwa kulinanga. Kuli akwa kupiya kumulisolola uli mukwa kulitachika.

²⁸ Mumu kumulamwina akwa luyinda, alioze meso je kakutala akwa kulizelula, wakwahombwesa.

²⁹ Yehova, yena uli ndeya yami; Yehova kumapangulula milima yami.

³⁰ Ku tachi je nakupalika ndusu mu mbunga ya tujita. Ku tachi ja Zambi yami nakutumbuka chipanga.

³¹ Ha kutwala kuli Zambi jila yenyi yingunu. Liji lia Yehova lia kweseka kulu, iye lukepwe wa waze aswama mul i iye.

³² Mumu Zambi iya? Shina Yehova wika. Lie liwe iya? Shina Zambi yetu.

³³ Zambi iye chiswamino chami cha tachi, kakululamisa jila yami.

³⁴ Kakupwisa molu jami ngwe molu ja kai. Kangumanyisa ha milundu yami.

³⁵ Kakulongesa moko jami kwasa jita, chocho moko jami kakunana uta wa unengu.

³⁶ Hiwangwaha lukepwe wa ulamwino we, umbovu we hiwangunangamisa.

³⁷ Hiwatohesa shimbo jami kushi lia yami, yiliato yami kuyasenunukine.

³⁸ Nakawile akwa kole jami, naonwene, chahilukile kunyima ndo hakuwa.

³⁹ Naakuwishile nikwatuwa ndusu, kechi kuhinduka nawa. Alimbukile kushi lia yiliato yami.

⁴⁰ Mumu hiwangujichika muya wa tachi ja kwasa jita. Hiwanguhombwesela waze angukatukilile.

⁴¹ Hiwatewulwisa manyima ja akwa kole jami, hanga ngukonwone waze akunguvwila kole.

⁴² Atalile alioze wakuhi chilamwina niumwe. Atalile chipwe kuli Yehova alioze kaakumbulwile.

⁴³ Mba naafwenyene ngwe fufuta ya hashi. Naaliachile ngwe malowa ha tapalo nikwamwanga.

⁴⁴ Wangupulwile nawa ku kulitachika cha atu jami, hiwangupwisa mukwa lutwe hakachi ka mavungu. Atu waze te chaanyingikine kumanguvumbika.

⁴⁵ Yilambala manguzeyela. Cheswe mevwa liji mangwononokena.

⁴⁶ Yilambala kumakalela; kumatuhuka mu yiswamo yo nikuchikima.

⁴⁷ Yehova katwama ni mwono; liwe liami afumane. Zambi ya liwe lia ulamwino wami anangame.

⁴⁸ Iye mwe Zambi yoze wakungukala, kakuzeyesa mavungu kuli yami.

⁴⁹ Kakungupulula kuli akwa kole jami; ewa, kakungunangamisa helu lia waze akungukatukila. Kuwakungupulula kuli mukwa kupupa.

⁵⁰ Kashika mungusakwila kuli yena Yehova hakachi ka mavungu. Mungwimbila uhaliso ku jina lie.

⁵¹ Iye kakuhana ulamwino unene kuli mwanangana wenyi; kakusolola utu wa zango lienyi kuli yoze hamuwayisa, kuli David ni ku munyachi wenyi ku miaka ya mutolo.