2 Samuel 21 - MUKANDA USANDU WA ZAMBI 1975

¹ Kwapwile kapunga ha matangwa a David miaka yitatu mwaka ha mwaka. David wahulile kuli Yehova. Yehova yamba ngwenyi, Chino chuma chapwa mumu hali Saulu ni munyachi wenyi wa kumwanga manyinga, mumu washihile A-Ngibeone.

² Mwanangana yasanyika A-Ngibeone. A-Ngibeone kapwile a kuli A-Izalele. O te masalila ja A-Amore. A-Izalele te halikata no ni shingo, alioze Saulu wafupile kwashiha mumu ha kushinjika chikolo ulemu wa A-Izalele ni A-Yunda.

³ David yamba kuli A-Ngibeone ngwenyi, Kuchi mungunulingila hanga ngukafuke mulonga uze, ni yenu nukawahise chihinga cha Yehova?

⁴ A-Ngibeone yamukumbulula ngwo, Kuchapwile chuma cha prata hanji oru hakachi ka yetu ni Saulu hanji munyachi wenyi. Chikwo nawa hi milimo yetu ko kushiha mutu mu Izalele. Aye yamba ngwenyi, Cheswacho munwamba, mungunulingila.

⁵ O yamba kuli mwanangana ngwo, Mutu yoze watwonwene nikututakila chipi akatunongese mweswe mu manjiza ja Izalele,

⁶ atwehe shimbiali a ana jenyi a malunga mba mutwasukika kumeso ja Yehova mu Ngibia ya Saulu yoze amutongwele kuli Yehova. Mwanangana ngwenyi, Mungunwaho.

⁷ Alioze mwanangana walamwinyine Mefiposhete mwana Jonatas mwana Saulu mumu ha shingo lia Yehova lize liapwile hakachi ko, ngwami, hakachi ka David ni Jonatas mwana Saulu.

⁸ Alioze mwanangana wakwachile Armoni ni Mefiposhete ana ja Rizipa, mwana wa Aya, waasemene ni Saulu; ni ana a malunga atano a Mikale mwana Saulu aze asemene ni Adriele mwana Bazilai Ka-Meholate.

⁹ Yaakunjika kuli A-Ngibeone, o yaasukika ha mulundu kumeso ja Yehova; yafwa eswe shimbiali hamuwika. Yaashiha ha matangwa a kucha, ha matangwa atangu ha kuputuka kucha sevada.

¹⁰ Rizipa mwana wa Aya wa pwo yanda chikeleyi. Yalizazulwilacho ha liwe chize ha kuputuka cha kucha ndo vula wanokene munji. Katayijile tujila a mu tetela kupwila hali ayo ha mwalwa, chipwe tushitu a mu yambu ha ufuku.

¹¹ Yalweza David chize Rizipa mwana Aya, *konkubina ya Saulu, halinga.

¹² David yaya, yatambula yifwaha ya Saulu ni yifwaha ya mwanenyi Jonatas kuli malunga a Njabeshe-Ngiliate, mumu o te hayiya mu tapalo lia Mbete-Shane kuze A-Filistea yaasukika ha tangwa lize A-Filistea ashihile Saulu mu Ngilboa.

¹³ Yachizako yifwaha ya Saulu ni yifwaha ya mwanenyi Jonatas hamwe ni yifwaha ya waze aasukikile.

¹⁴ Yafunda yifwaha ya Saulu ni ya mwanenyi Jonatas mu chifuchi cha Mbenjamine mu Zela mu chifuka cha tato Kishi. Yalinga yuma yeswe mwanangana hatuma. Mba Zambi wevwile waze alembelele chifuchi.

¹⁵ A-Filistea ashile jita cheka nawa ni A-Izalele. David wayile ni atu jenyi hamuwika nikwasa jita ni A-Filistea. David yaputuka kuhonga.

¹⁶ Ishebi-Mbenobe umwe mwana wa mwe chindululu, pezu ya kunga lienyi te ya kulakaji atatu a shekele ja unengu, se kali ni katana mwaha mu zalilo, yanyonga ngwenyi, Mungushiha David.

¹⁷ Alioze Abishai mwana wa Zeluia yamukwasa; yalamba Ka-Filistea ni kumushiha. Henaho malunga a David yalishinga ngwo, Kunuchi kwiza ni yetu ku jita nawa, kuchina hanji munujima ndeya ya Izalele.

¹⁸ Kulutwe nawa kwapwile jita ni A-Filistea ku Ngobe, mba Sibekai Ka-Husha yashiha Safa wa kuli ana ja mwe chindululu.

¹⁹ Kulutwe kwapwile nawa jita ni A-Filistea ku Ngobe, mba Elehana mwana… Ka-Mbeteleme yashiha Ngoliate Ka-Ngata yoze kali ni chikukundo cha kunga lienyi ngwe nguji lia mukwa kuseleka.

²⁰ Kulutwe nawa kwapwile jita ku Ngata kuze kwatwamine umwe chindululu mukwa kasambano, makumi aali a minwe ni minwe yiwana. Iye nawa mwana wa mwe chindululu.

²¹ Ha kutomba A-Izalele, Jonatas mwana wa Shimei yayo ya David yamushiha.

²² Wano eswe ni awana asemukine kuli mwe chindululu mu Ngata; eswe afwile ku kwoko lia David ni ku moko ja atu jenyi.