2 Samuel 20 - MUKANDA USANDU WA ZAMBI 1975

¹ Kwapwileko umwe lunga wamokomoko, jina lienyi Shipa, mwana Mbi kiri Ka-Mbenjamine. Iye yahumuna chitavwi ngwenyi, Etu kutushi chihanda muli David, chipwe chihinga kutushi nacho muli mwana Yese. Kashika enu malunga a Izalele yénu ku mazuwo jenu.

² Chocho malunga eswe a Izalele alitwaminyine kukaula David, yakaula Shipa mwana Mbikiri. Alioze malunga a Yunda yalalaminya kuli mwanangana wo chize ku Yordau ndo ku Yerusaleme.

³ David yaheta ku zuwo lienyi mu Yerusaleme, yanda e kumi lia mapwo *akonkubina jenyi waze te ahichikile kufunga zuwo, yaasela mu zuwo limwe lia kwafunga, yaaha kulia, alioze kanjilile kuli ayo. Chocho yaajililamo ndo tangwa lia kufwa cho utwamishi.

⁴ Mba mwanangana yamba kuli Amasa ngwenyi, Ungusanyikine malunga a Yunda akaswile kuno, ni matangwa atatu kanda ahwa. Ni yena ukapweko.

⁵ Chocho Amasa wayile ukakungulule A-Yunda, alioze yalaluka; kejile ha matangwa aze amuselele.

⁶ David yamba kuli Abishai ngwenyi, Haliapwila Shipa mwana Mbikiri matupinjisa kuhiana Absalome. Anda atu ja mwene we ukamuhange kuchina manjila mu yihunda ya kukolesa ni yipanga, akomboke kumeso jetu.

⁷ Malunga a Joabe, ni A-Cherete, ni A-Pelete ni malunga eswe a ndundo atuhukile kumuhanga. Yakatuka ku Yerusaleme akaliange Shipa mwana Mbikiri.

⁸ Ha kuheta ku luliwe lwa mu Ngibeone, kumanyi Amasa kaneza nikwapatwiza. Joabe te hazala mazalo jenyi a jita. Kali ni muya wa kujichika mu zalilo ni katana mu chindalo. Ha kwenda watuhukilemo.

⁹ Joabe yamba kuli Amasa ngwenyi, Unahinduka mwanakwetu? Joabe yasa kwoko lienyi lia chindume ha wevu wa Amasa akanwehe mbeju.

¹⁰ Alioze Amasa katalile ku katana mu kwoko lia Joabe. Yamulamba nenyi mu jimo, yamwanga mijingwa yenyi hashi. Kamulambile nawa; yafwa. Mba Joabe ni mwanakwo Abishai yahanga Shipa mwana Mbikiri.

¹¹ Umwe mukweze wa Joabe kanamanako yamba ngwenyi, Mweswe kanazange Joabe ni mweswe mukwa David akaule Joabe.

¹² Amasa te kanapombo nikulitunya mu manyinga jenyi hakachi ka tapalo. Mba muze mwe lunga hamona atu eswe kanamanako, yachiza Amasa mu tapalo yamusa mu yambu hikumufuka ni hina mumu wamwene atu eswe ha kuhetako yamana.

¹³ Muze hamuchiza mu tapalo atu eswe yaya nikukaula Joabe akaliange Shipa mwana Mbikiri.

¹⁴ Iye yapalika ndusu minyachi yeswe ya Izalele ndo ku Abele ni Mbete-Maka ni A-Mberi eswe. O eswe yakunguluka, yamukaula.

¹⁵ Yeza ku Abele wa Mbete-Maka yamuselekelamo. Yalumbikila mulumba unene wa kulimika ni chihunda kwe ku chipanga, mba atu eswe apwile hamwe ni Joabe alambile chipanga akachipuzule.

¹⁶ Haze hene umwe pwo mukwa mana wa mu chihunda watambikile ngwenyi, Ivwenu, ivwenu. Ambenu kama kuli Joabe ngwenu, Akundame ku kuno nguhanjike nenyi.

¹⁷ Iye wakundamine, mba pwo yamba ngwenyi, Mwe Joabe yena? Iye ngwenyi, Yami. Yamba kuli iye ngwenyi, Panjika ku maliji a yami kavumbi ke. Iye ngwenyi, Ngunapanjika.

¹⁸ Pwo yamba ngwenyi, Ha shakulu ambile ngwo, Mahula chiyulo ku Abele mba chocho chikuma chapatukile.

¹⁹ Yami nguli wa kuli akwa sambukila, amwenemwene mu Izalele. Alioze ena unafupu kwonwona chihunda hamwe ni anaye mu Izalele. Kuchi te mupupa chihinga cha Yehova?

²⁰ Joabe yakumbulula ngwenyi, Chikapwe kusuku chikolo ni yami kupupa hanji kwonwona.

²¹ Chikuma kuchapwile chocho. Alioze umwe lunga wa ku milundu ya Eframe, jina lienyi Shipa, mwana Mbikiri, hanazundula kwoko lienyi lia kulimika ni mwe mwanangana David, twehenuye mba mungukatuka ku chihunda. Pwo yamba kuli Joabe ngwenyi, Makukongela mutwe wenyi helu lia chipanga.

²² Pwo wayile kuli atu eswe ni mana jenyi, mba O atapile mutwe wa Shipa mwana Mbikiri, yaukonga kuli Joabe. Aye yahumuna chitavwi; atu eswe amwanganyine ku chihunda, mutu mweswe ku zuwo lienyi. Joabe yahiluka yeza ku Yerusaleme kuli mwanangana.

²³ Joabe wapwile helu lia tujita eswe a Izalele. Benaia mwana Jehoiada wapwile helu lia A-Cherete ni A-Pelete.

²⁴ Adorame wapwile helu lia lijimu. Yehosofate mwana Ahilude wapwile mukwa kusoneka yuma ya wanangana.

²⁵ Sheva wapwile mukwa kusoneka mikanda. Zadoke ni Abiatare apwile asasendote.

²⁶ Ira iye Ka-Njaire wapwile sasendote wa David.