2 Samuel 2 - MUKANDA USANDU WA ZAMBI 1975

¹ Kulutwe lia yino yuma David yahula Yehova ngwenyi, Ngukanduke ku chimwe chihunda cha Yunda nyi? Yehova yamukumbulula ngwenyi, Kanduka. David yamba ngwenyi, Ku chihunda chika munguya? Iye ngwenyi, Ku Heprone.

² Chocho David wayileko, ni mapwo jenyi aali nawa, Ahinoame wa Yezerele ni Abigale yoze wapwile pwo lia Nabale wa ku Karmela.

³ David yaneha malunga jenyi waze endele nenyi, mutu mweswe ni akwa zuwo lienyi. O atwamine mu yihunda ya Heprone.

⁴ Malunga a Yunda yeza, yawayisa David ni maji akapwe mwanangana wa munyachi wa Yunda. Muze alwezele David ngwo, Waze afunjile Saulu malunga a Njabeshe-Ngiliate,

⁵ David yatuma tunganda kuli malunga a Njabeshe-Ngiliate ngwenyi, Nukawahe kuli Yehova mumu nwasolwele utu wa zango kuli mwene wenu Saulu ha kumufunda.

⁶ Yehova akasolole utu wa zango ni umwenemwene kuli yenu. Ni yami mungunuwahisa mumu hinwalinga chuma chino.

⁷ Kashika moko jenu atakame; hamukenu. Mumu mwene wenu Saulu hanafu, ni akwa munyachi wa Yunda hananguwayisa ni maji ngukapwe mwanangana wo.

⁸ Abenere, mwana wa Nere, kapitau ka tujita twa Saulu te handa Isheboshete mwana wa Saulu; yamutwala ku Mahaneme;

⁹ yamupwisa mwanangana wa Ngiliate, ni A-Ashure, ni Yezerele, ni Eframe, ni Mbenjamine, ni A-Izalele eswe.

¹⁰ Isheboshete mwana Saulu te kali ni makumi awana a miaka muze haputuka kuyula A-Izalele. Yayula miaka yiali. Alioze munyachi wa Yunda o yakaula David.

¹¹ Shimbu lize lia David kupwa mwanangana wa munyachi wa A-Yunda mu Heprone liapwile lia miaka shimbiali ni tukweji asambano.

¹² Abenere mwana Nere wakatukile ku Mahaneme yaya ku Ngibeone hamwe ni atu ja Isheboshete mwana Saulu.

¹³ Ni Joabe mwana Zeluia yaya ni atu ja David, yatakana ku Chitende cha Ngibeone. Yatwama, wano muno mu sali, akwo muze mu sali lia Chitende.

¹⁴ Abenere yamba kuli Joabe ngwenyi, Akweze akatuke, ahehe kumeso jetu. Joabe ngwenyi, Akatuke.

¹⁵ Chocho yakatuka, yapalika nikulita ni kwalula cho; hali Mbenjamine ni Isheboshete mwana Saulu kumi ni aali, ni hali atu ja David kumi ni aali.

¹⁶ Mutu mweswe yakwata mukwo ku mutwe, yanjisa katana kenyi mu lumbu lia yoze analitachika nenyi. Chocho yalimbuka hashi hamuwika. Kashika yaluka kuma kuze ngwo, Helekata-hazurime, chili ku Ngibeone.

¹⁷ Jita yapwile yisasu chikolo tangwa lize. Atu a David akumbile Abenere ni malunga a Izalele.

¹⁸ Acho e ana atatu a malunga a Zeluia apwileko, Joabe, ni Abishai, ni Asahele. Asahele aye kuzomboka chenyi chapwile ngwe cha kai.

¹⁹ Asahele yahanga Abenere, mba shimbu machimuhanga, kakondolokele chipwe ku chindume, chipwe ku chimeso. Kasolo kwecha Abenere.

²⁰ Abenere yatala kunyima, yamba ngwenyi, Yena Asahele, nyi? Iye yakumbulula ngwenyi, Yami.

²¹ Abenere yamba kuli iye ngwenyi, Kondoloka ku chindume, hanji ku chimeso, Ukakwate umwe mukweze umupupe upite. Alioze Asahele kasolo kukondoloka akamweche.

²² Abenere yamba cheka nawa kuli Asahele ngwenyi, Kondoloka Ungweche. Kuchi te mungukulamba hashi? Nyi munguchilinga kuchi munguhasa kumona meso ja yayenu Joabe.

²³ Alioze iye kasolo kukondoloka, kashika Abenere yamutuwa mu jimo ni shina lia kunga lienyi, chocho kunga yilituhukila kunyima. Yalimbukilako; yafwa kuze kwene. Waze eswe ahetele kuma kuze Asahele yalimbukila nikufwa yamanako.

²⁴ Alioze Joabe ni Abishai yahanga Abenere, mba ha kunjila cha tangwa yeza ku mulundu wa Ama kulutwe lia Ngia mu jila ya kuya ku puya ya Ngibeone.

²⁵ A-Mbenjamine yakungulukila kunyima ya Abenere yamana mbunga yimuwika helu lia mulundu.

²⁶ Henaho Abenere yatambika kuli Joabe ngwenyi, Katana makanongesa atu ndo ku miaka yeswe, nyi? Kwanyingikine songo mulipwa Usasu? Tangwa lika mutuma atu je akalitwamine kuhanga usoko wo?

²⁷ Joabe yamba ngwenyi, Ni mwono wa Zambi nyi kwahanjikile kachi niumwe kechi kulitwamina kuhanga akwo ndo chimene.

²⁸ Chocho Joabe yemba chitavwi, mba malunga eswe yalitwamina. Kahangile A-Izalele nawa chipwe kwasa no jita nawa.

²⁹ Abenere ni malunga jenyi endele ufuku weswe ndusu mu Arapa. Yazauka Yordau, mba nikwenda ndusu mu Mbitrone, yaheta ku Mahaneme.

³⁰ Joabe yahiluka ha kuhanga Abenere mba ha kukungulula atu eswe hamuwika kwahonene hakachi ka atu a David kumi lia malunga ni malunga livwa, ni Asahele nawa.

³¹ Alioze atu a David te hanashihi kulakaji atatu a atu ni makumi asambano a atu a Abenere a ku Mbenjamine.

³² Yanda Asahele yamufunda mu chifuka cha tato chili ku Mbeteleme. Joabe ni malunga jenyi endele ufuku weswe, mba tangwa liaavumbukilile ku Heprone.