2 Samuel 19 - MUKANDA USANDU WA ZAMBI 1975

¹ Yambulwila Joabe ngwo, Mwanangana kanalilila Absalome ni kulishimwoka.

² Kashika tangwa lize kukumba chalumukine kulishimwoka kuli atu eswe, mumu atu evwile tangwa lize ngwo, Mwanangana kanalinyenge mumu hali mwanenyi.

³ Mba e atu anjilile mu chihunda tangwa lize nikuliomba, ngwe waze hachina mu jita masewunuka mumu ha kwivwa sonyi.

⁴ Mwanangana walifukile meso Walilile ni liji linene ngwenyi, Mwanami Absalome! Mwanami Absalome! Mwanamie-e-e!

⁵ Joabe yanjila mu zuwo kuli mwanangana ngwenyi, Musono hinwakolesa sonyi tuvumbi twenu eswe waze anulamwinanga mwono wenu, ni mwono wa ana jenu a malunga ni a mapwo, ni mwono wa mapwo jenu ni wa *akonkubina jenu

⁶ se nwakuzanga akwa kole jenu nikuvwila kole waze kananuzange. Mumu musono hinwachisolola ngwenu, Miata ni tuvumbi kangulemene. Mumu ngunamono musono pundu, kachi Absalome hatwama ni mwono ni yetu eswe kachi twafwanga, kachi chanuwahila kanawa.

⁷ Kashika katukenu nutuhuke nuhanjike ni vumbi kuli tuvumbi twenu, mumu ngunanwambulwila pundu ni jina lia Yehova nyi kunuchi kutuhuka, chipwe lunga umuwika kunuchi kupwa nenyi ha ufuku uno. Mba muchihiana kupiha; yipi yize yeswe yanuwana chize ku ukweze ndo haliapwila muyipwa ngwe yamokomoko.

⁸ Kashika mwanangana yakatuka yatwama mu chikolo cha chihunda. Chafumana kuli atu eswe ngwo, Mwanangana kanatwama mu chikolo, mba atu eswe aswilile kumeso ja mwanangana. A-Izalele o te hanachinyina mutu mweswe ku zuwo lienyi.

⁹ Mba kwapwile kulitachika hakachi ka minyachi ya A-Izalele ngwo, Mwanangana watupulwile ku tachi ja akwa kole jetu; yatulamwina kuli A-Filistea; haliapwila hachina chifuchi mumu hali Absalome.

¹⁰ Alioze Absalome yoze twawayishile ni maji akapwe mwanangana wetu hanafu mu jita. Kashika kuchi te kunwahanjikile nilimwe liji lia kuhilwisa mwanangana nawa?

¹¹ Mwanangana David yatuma kuli Zadoke ni Abiatare asasendote ngwenyi, Hanjikenu ni makulwana ja A-Yunda ngwenu, Kuchi te nuli asula kuhilwisa mwanangana ku zuwo lienyi? Se liji lia A-Izalele eswe hiliaheta kuli mwanangana kumuneha ku zuwo lienyi.

¹² Enu nuli akwetu. Nuli a yifwaha yami ni a musunya wami. Kashika kuchi te nuli asula kuhilwisa mwanangana?

¹³ Ambenu kuli Amasa nawa ngwenu, Ngwami, uli wa yifwaha yami ni musunya wami. Zambi alinge chocho kuli yami nikuwezaho nawa kachi chakusele kapitau wa tujita matangwa eswe kusalakana Joabe.

¹⁴ Yazeyesa mbunge ja malunga eswe a mu Yunda ngwe mbunge ya mutu umuwika. O yatuma kuli mwanangana ngwo, Hilukenu, ni yenu ni tuvumbi twenu eswe.

¹⁵ Chocho mwanangana wejile, yaheta ku Yordau. A-Yunda yeza ku Ngilingali, akapatwize mwanangana amuzawise ku Yordau.

¹⁶ Shimei mwana Ngera Ka-Mbenjamine wa ku Mbahurime yatambuka hamwe ni malunga A-Yunda nikwiza kupatwiza mwanangana David.

¹⁷ Kwejile hamwe nenyi kanunu ka malunga A-Mbenjamine ni Ziba kavumbi wa zuwo lia Saulu, ni anenyi a malunga kumi ni atano ni ngamba jenyi makumi aali. O azaukile Yordau kumeso ja mwanangana.

¹⁸ Kwayile ulungu umwe kuzawisa akwa zuwo lia mwanangana nikulinga cheswacho mazanga iye. Shimei mwana Ngera yafulamana kumeso ja mwanangana muze hanazauka Yordau.

¹⁹ Yamba kuli mwanangana ngwenyi, Mwene wami, kanda nungumwena uhenge. Kanda nwiwuluka chize yami kavumbi kenu nalingile ni kupiya chami tangwa lize mwene wami mwanangana nwahichikile Yerusaleme. Mwanangana kanda nuchisa mbunge.

²⁰ Mumu yami kavumbi kenu ngunanyingika ngwami, Nanuvulumwine. Kashika hineza musono mwe mutangu hakachi ka munyachi wa José kupalumuka mukupatwiza mwene wami mwanangana.

²¹ Alioze Abishai mwana Zeluia yamba ngwenyi, Kutuchi kushiha Shimei mumu ha kutuka yoze amuwayishile ni maji kuli Yehova, nyi?

²² David yamba ngwenyi, Enu ana ja Zeluia, kuchi ni yenu ni yami, nupwe akwa kulimika ni yami musono? Kechi kushiha niumwe mu Izalele musono. Te chachinyingikine ngwami, Nguli mwanangana wa Izalele musono, nyi?

²³ Mwanangana yamba kuli Shimei ngwenyi, Kuchi kufwa. Mba yalishinga.

²⁴ Mefiposhete mwana Saulu Yapalumuka mukupatwiza mwanangana. Chize ku tangwa lize mwanangana wakatukile ndo tangwa lize ahilukile ni sambukila ku zuwo lienyi Mefiposhete kasanyine ku molu, chipwe wevu kaululikile, chipwe mazalo jenyi kaakosele.

²⁵ Muze heza ku Yerusaleme kupatwiza mwanangana, mwanangana yamba kuli iye ngwenyi, Mefiposhete kuchi te kwayile ni yami?

²⁶ Iye yakumbulula ngwenyi, Mwene wami mwanangana, ngamba yami wangwongele. Mumu yami kavumbi kenu nambile ngwami, Mungululika chimbulu ngukendeleho ngukaye ni mwanangana se yami kavumbi kenu nguli chilema.

²⁷ Iye hanangulamikiza yami kavumbi kenu kuli mwene wami mwanangana. Alioze mwene wami mwanangana kapwa ngwe mungelo wa Zambi. Kashika cheswacho Chinapeme kumeso jenu hilingenu.

²⁸ Mumu akwa munyachi wa tata eswe twapwile afu kumeso ja mwene wami mwanangana, hindu nwasele yami kavumbi kenu hakachi ka waze akulia ku mesa ya yenu mwene. Kashika te poko nguli nayo kuteta nawa kuli mwanangana?

²⁹ Mwanangana yamba kuli iye ngwenyi, Kanda uhanjika nawa ya yikuma ye. Ngwami, Yena ni Ziba tetenu chifuchi hakachi kenu.

³⁰ Mefiposhete yamba kuli mwanangana ngwenyi, Achizuke cheswe iye; se mwene wami mwanangana haneza ni sambukila ku zuwo lienyi.

³¹ Bazilai Ka-Ngiliate wakatukile ku Rogelime. Yazauka Yordau hamwe ni mwanangana akamutwale mu sali lia Yordau.

³² Bazilai te mukulwana chikolo, kali ni makumi nake a miaka. Iye te wazumbwile mwanangana shimbu apwile ku Mahaneme, mumu mutu munene chikolo.

³³ Mwanangana yamba kuli Bazilai ngwenyi, Zauka hamwe ni yami mba mungukakuhoka hamwe ni yami mu Yerusaleme.

³⁴ Alioze Bazilai yamba kuli mwanangana ngwenyi, Matangwa a miaka ya mwono wami angahi hanga nguye ni mwanangana ku Yerusaleme?

³⁵ Nguli ni makumi nake a miaka. Te ngunahase kusa chinyingi hakachi ka yipema ni yipi? Yami kavumbi kenu te ngunahase kwivwa kanawa chize ngunali hanji chize ngunanu? Te ngunahase kwivwa liji lia njimba a malunga hanji a mapwo? Mba yami kavumbi kenu kuchi te mungupwa chiteli kuli mwene wami mwanangana?

³⁶ Yami kavumbi kenu ngunazange kuya hakehe wika mu sali lia Yordau hamwe ni mwanangana. Ha chikuma chika mwanangana manguhela kwononona chipwa haha?

³⁷ Ngutayizenu kama yami kavumbi kenu nguhiluke kunyima ngukafwe mu chihunda chami mwene ku mafuka ja tata ni mama. Alioze kavumbi kenu Chimame kuno kwali. Akaye iye hamuwika ni mwene wami mwanangana nukamulinge cheswe muchinupemena.

³⁸ Mwanangana yamba ngwenyi, Chimame kumazauka ni yami; mungumulinga cheswacho chinakupemena. Mba cheswacho muwita mungukulingila.

³⁹ Atu eswe azaukile Yordau, ni mwanangana wazaukile. Mwanangana wambejele Bazilai, yamuwahisa, iye yahiluka kwenyi.

⁴⁰ Chocho mwanangana yaya ndo ku Ngilingali, ni Chimame yaya hamwe nenyi. Atu eswe A-Yunda atwalile mwanangana ni chihanda cha ha muchima cha A-Izalele.

⁴¹ Kumanyi, malunga eswe a Izalele yeza kuli mwanangana ngwo, Kuchi te akwetu e malunga a Yunda hanwiya? Kuchi te haneha mwanangana ni atu jenyi kuzauka Yordau ni malunga eswe a David hamuwika?

⁴² Malunga eswe a Yunda yakumbulula kuli malunga a Izalele ngwo, Mumu mwanangana iye usoko wa ha muchima kuli yetu. Kuchi te nunatenuka ha chikuma chino? Te hitwalia upite wa mwanangana? Hanji hatwaha yimwe yawana nyi?

⁴³ Malunga a Izalele yakumbulula kuli malunga a Yunda ngwo, Etu tuli ni kumi lia yihanda muli mwanangana kashika tuli ni chihinga chinene muli David kuhiana yenu. Kashika kuchi te nwatulelesele kunwatuhulile chiyulo ha kuhilwisa mwanangana wetu? Alioze maliji a malunga a Yunda ahianyine ni tachi maliji a malunga a Izalele.