2 Samuel 18 - MUKANDA USANDU WA ZAMBI 1975

¹ David yalula atu aze apwile no. Yaasela tupitau twa tununu ni tupitau twa makulakaji.

² David yatuma e atu mu yihanda yitatu: chihanda chimuwika mu chiyulo cha Joabe, chihanda chikwo mu chiyulo cha Abishai mwana Zeluia, mwanakwo wa Joabe, ni chihanda chikwo mu chiyulo cha Itaia Ka-Ngata. Mwanangana yamba kuli atu ngwenyi, Ni yami nawa kumunguya ni yenu.

³ Alioze e atu yamba ngwo, Kanda nuya, mumu nyi yetu mutuchina kechi kuchilemesa. Chipwe chihanda cha ha muchima cha yetu mutufwa kechi kuchilemesa. Alioze yenu nunalite ni kumi lia tununu twa yetu, kashika hapwa nutwame mu chihunda nukahase kutukwasa.

⁴ Mwanangana ngwenyi, Cheswacho chanupemena ami mungulinga. Mwanangana wamanyine ku kulwa chikolo cha chihunda shimbu atu atuhukile ha makulakaji jo, ni ha tununu two.

⁵ Mwanangana yahana shimbi kuli Joabe, ni Abishai, ni Itaia ngwenyi, Lingenu ni vumbi ni mwe mukweze, ngwami, Absalome, mumu hali yami. Atu eswe te kanevu shimbu mwanangana mahana shimbi yino kuli tupitau ha kutwala kuli Absalome.

⁶ Chocho atuhukile e atu mu yambu akase jita ni A-Izalele. Jita yapwile te mu musenge wa Eframe.

⁷ Atu a David yakumbako A-Izalele. Yashihako anji tangwa lize; makumi aali a tununu a malunga.

⁸ Mumu jita yamwanganyine chifuchi cheswe ni waze afwile mu usaki anji; afwile ni tutana, akepe.

⁹ Absalome yatakana chitakanyina ni atu a David. Absalome te kanende ha mula mba mula yenyi yapalika mushi lia mitango yinji ya umwe mutondo unene wa carvalho. Mutwe wenyi yiusakaminya mu mitango ya carvalho, yazezala mu tetela, mba mula yoze anendesa yaya lume.

¹⁰ Umwe yachimona yambulwila Joabe ngwenyi, Hinamona Absalome kanazezala mu mutondo wa carvalho.

¹¹ Joabe yamba kuli lunga yoze unamulwezacho ngwenyi, Nyi wamumona yika wachina kumulamba hashi lume? Kachi hinakwaha kumilia mbongo ja prata, ni muya.

¹² Lunga yamba kuli Joabe ngwenyi, Chipwe mangwaha kanunu ka mbongo ja prata mu kwoko, hindu chichi kwolola kwoko liami kulimika ni mwana wa mwanangana. Mumu mwe mu matwi jetu mwanangana wanwambanga yenu ni Abishai ni Itaia ngwenyi, Nukanyame, niumwe kanda alinga chimwe kuli mukweze Absalome.

¹³ Nyi ka, kachi nakwata ku mwono wenyi ni mafwefwe, kachi ni yenu nwangwehuka, se nichimwe kechi kuhasa kuchiswekela mwanangana.

¹⁴ Joabe ngwenyi, Chichi kulaluka chocho ni yena. Yanda mivu yitatu mu kwoko lienyi, yatuwa nayo mbunge ya Absalome shimbu achili ni mwono hakachi ka carvalho.

¹⁵ Kumi lia akweze akwa kumbata yitwa ya Joabe yajingilika Absalome nikumulamba nikumushiha.

¹⁶ Joabe yahumuna chitavwi mba atu eswe yalitwamina kuhanga A-Izalele, yahiluka mumu Joabe yaakwika.

¹⁷ O yanda Absalome, yamumbila mu wina umwe unene mu usaki, yamulumbika mulumba unene chikolo wa mawe, mba A-Izalele eswe yachinyina mutu ku zuwo lienyi, mutu ku zuwo lienyi.

¹⁸ Shimbu te achili ni mwono Absalome halitungila kaposhi, kali mu mungulunga wa mwanangana. Mumu wambile ngwenyi, Chishi ni mwana wa lunga yoze mahasa kulindulula jina liami. Yaluka kaposhi jina lienyi, mba ndo musono kakumuvuluka ngwo, Kaposhi wa Absalome.

¹⁹ Henaho Ahimaze mwana Zadoke yamba ngwenyi, Nguzomboke ngutwale lusango kuli mwanangana chize Yehova hanamulambila akwa kole jenyi.

²⁰ Joabe yamba kuli iye ngwenyi, Ena kuchi kutwala lusango musono, alioze tangwa lieka mutwala. Musono kuchi kutwala lusango mumu mwana wa mwanangana hafwa.

²¹ Mba Joabe yamba kuli mwe Ka-Kushe ngwenyi, Yako uambulwile mwanangana chize hiwamona. Mwe Ka-Kushe yahetamina kumeso ja Joabe, yazomboka.

²² Alioze Ahimaze mwana Zadoke yamba cheka nawa kuli Joabe ngwenyi, Chipwe chocho ngutayize kama nguzomboke kunyima lia Ka-Kushe. Joabe ngwenyi, Mwanami, yika muzombokela se kuchi kutambula kwononona ha lusango?

²³ Hindu yakumbulula ngwenyi, Chipwe chocho, munguzomboka. Iye yamba ngwenyi, Zomboka nyi. Kashika Ahimaze yazombokela jila ya ku chana, yahiana Ka-Kushe.

²⁴ David kanatwama hakachi ka yikolo yiali ya chihunda. Kalayi yanyina helu lia fulumba lia chikolo he ha chipanga. Yahetuka nikutala, kumanyi, umwe lunga kanazomboka ukawenyi.

²⁵ Kashika kalayi yatambika kulweza mwanangana. Mwanangana ngwenyi, Nyi aneza ukawenyi, kananeha lusango. Mwe lunga kaneza fuji nikukundama.

²⁶ Kalayi yamona lunga mukwo nikuzomboka, kashika kalayi yatambika kuli kafunga ka pito ngwenyi, Mukwo kanazomboka ukawenyi. Mwanangana ngwenyi, Iye nawa kananeha lusango.

²⁷ Kalayi ngwenyi, Ngunamono kuzomboka cha mutangu chapwa ngwe kuzomboka cha Ahimaze mwana Zadoke. Mwanangana ngwenyi, Iye mutu mupema; kananeha lusango mupema.

²⁸ Ahimaze yatambika kuli mwanangana ngwenyi, Cheswe chinawaha! Yahetamina hashi kumeso ja mwanangana ngwenyi, Yehova Zambi yenu afumane se iye hanakunjika malunga aze azundwile moko jo kulimika ni mwene wami mwanangana.

²⁹ Mwanangana yamba ngwenyi, Mukweze Absalome kanawaha nyi? Ahimaze yakumbulula ngwenyi, Muze Joabe atuma kavumbi ka mwanangana, ngwami, yami kavumbi kenu, namwene zungo limwe linene alioze Chanyingikine chize Unalumbunuka.

³⁰ Mwanangana ngwenyi, Jinga umane kuno. Iye yajinga yamana lume.

³¹ Ka-Kushe yeza ngwenyi, Lusango kuli mwene wami mwanangana! Yehova musono hanulambila waze eswe anukatukilile.

³² Mwanangana yamba kuli Ka-Kushe ngwenyi, Mukweze Absalome kanawaha nyi? Ka-Kushe yakumbulula ngwenyi, Akwa kole eswe a mwene wami mwanangana ni waze eswe akunukatukila kunulinga chipi akapwe chize ngwe mwe mukweze nunambe!

³³ Mwanangana wapinjile chikolo mu mbunge. Yaya ku chipatulo chili helu lia chikolo cha chihunda nikulila. Shimbu machiya yamba ngwenyi, Mwanami Absalome! Mwanamie, mwanami Absalome! Mu jina lia Zambi kachi nakufwilile! Absalome mwanami, mwanamie-e-e!