2 Samuel 17 - MUKANDA USANDU WA ZAMBI 1975

¹ Ahitofele yamba nawa kuli Absalome ngwenyi, Ngutayizenu kama, ngusakule kumi lia tununu ni tununu aali a malunga, ngukatuke, nguhange David musono ufuku.

² Mungumuwana shimbu ali ni yikatalo kanahongo, mungumukolesa woma. Atu aze eswe ali no machina, mba mungulamba mwanangana wika.

³ Munguneha atu eswe kuli yenu. Mutu yoze nunafupu hapwa ngwe haneza eswe. Atu eswe meza ni sambukila.

⁴ Shimbi yino yiyiwahila Absalome chikolo, ni makulwana eswe A-Izalele.

⁵ Alioze Absalome yamba ngwenyi, Sanyikenu Hushai Ka-Arke nawa, twivwe chize mamba iye.

⁶ Muze te Hushai heza kuli Absalome, Absalome yamba kuli iye ngwenyi, Ahitofele hamba chichi ni chichi. Tukaule shimbi jenyi nyi? Nyi ka, hihanjika yena.

⁷ Hushai yamba kuli Absalome ngwenyi, Mana Ahitofele hanwaha kapemene jila yino.

⁸ Hushai yaweza ngwenyi, Nunanyingika tatenu ni malunga jenyi, eswe malunga a ndundo. Chikwo nawa wuli ali nawo ngwe ursu wa mu yambu yoze hamwiya ana jenyi. Ni tatenu iye kajita mukulu, kechi kupomba hamuwika ni e atu.

⁹ Haliapwila haswama mu wina umwe hanji kweka. Muchipwa nyi amwe atu mahanga kufwa mweswawo machivwa mamba ngwenyi, Hashiha anji hakachi ka waze anakaula Absalome.

¹⁰ Mba chipwe mukwa hamu yoze uli ni mbunge ngwe ya ndumba malezumuka, mumu A-Izalele eswe kananyingika ngwe tatenu mukwa ndundo, ni waze eswe ali no malunga a hamu.

¹¹ Alioze kuli yami ngunamono hapwa A-Izalele eswe akungulukile kuli yenu chize ku Ndane ndo ku Mbia-shipa ngwe masekeseke a ku ngenge ya kalunga-lwiji mumu ha kupwa anji. Ni yenu nukaye ku jita yenwene.

¹² Chocho mutumuwana kweswako ali mba mutumulundumukina ngwe mume wakwiza hashi. Hakachi ka iye ni malunga aze eswe ali no kutuchi kuhichika chipwe umuwika.

¹³ Chipwe hanjila mu chihunda chimwe A-Izalele eswe matwalako mihipu mba mutuchikoka nikuchimbila mu lwiji ndo kukuchi kusalako chipwe kaliwe kamuwika.

¹⁴ Absalome ni malunga eswe a Izalele yamba ngwo, Mana ja Hushai Ka-Arke Shinaho; ja Ahitofele ka. Mumu Yehova hanafunjika kulu kulelesa chiyulo chipema cha Ahitofele hanga Yehova akakokele yipi hali Absalome.

¹⁵ Henaho Hushai yamba kuli asasendote Zadoke ni Abiatare ngwenyi, Chocho ni chocho alongesanga mana Ahitofele kuli Absalome ni kuli makulwana a Izalele. Ni yami chichi ni chichi naalongesa.

¹⁶ Kashika tumenu nikawashi nukambulwile David ngwenu, Kanda nupomba musono ku yau ya ku puya. Zaukenu cheswacho, kuchina mwanangana manonga ni atu eswe ali no.

¹⁷ Jonatas ni Ahimaze yatwama hakamwihi ni Ene-Rogele. Umwe ngamba wa pwo wapwile nikuyaya nikwatwala liji. O yaya nikwambulwila mwanangana David kuchina maamona nikunjila mwimbo.

¹⁸ Alioze umwe mwana-lunga yaamona, yambulwila Absalome. E malunga yaya fuji eswe aali, yaheta ku zuwo lia umwe lunga mu Mbahurime kali ni shima lisuku mu yize yenyi. O yanjilamo.

¹⁹ Mba pwo waseleho chifuko nikwanyikinaho mbuto ya kutwa. Kachinyingikine niumwe.

²⁰ Ngamba ja Absalome yaya kuli pwo ku zuwo, yamba ngwo, Ahimaze ni Jonatas kuli ali? Pwo yamba kuli ayo ngwenyi, Hanazauka kulu kachitwetwe. Yaafupa, kaawanyine, kashika yahiluka ku Yerusaleme.

²¹ Muze o hanayi malunga akatukile mu shima, yaya, yalweza mwanangana David. Yamba kuli David ngwo, Katukenu, nuzauke lwiji nikawashi mumu chocho ni chocho Ahitofele hanaalongesa ha kutwala kuli yenu.

²² Mba David yakatuka ni atu eswe wapwile no, yazauka Yordau. Ha kucha chimene kukwasalile niumwe, chipwe umuwika yoze kanda azauka Yordau.

²³ Muze Ahitofele yamona ngwe kakawile mana jenyi, yalulika chimbulu chenyi, yakatuka, yaya kwenyi ku chihunda chenyi. Yalulika zuwo lienyi, yalisukika. Chocho yafwa, yamufunda mu chifuka cha tato.

²⁴ David yeza ku Mahaneme. Absalome yazauka Yordau ni malunga a Izalele eswe hamwe nenyi.

²⁵ Absalome yasela Amasa helu lia tujita mukusalakana Joabe. Amasa te mwana wa umwe lunga jina lienyi Itara Ka-Izalele yoze wanjilile kuli Abigale mwana Nahashi mwanakwo wa Zeluia naye ya Joabe.

²⁶ A-Izalele ni Absalome asele chilombo cho ku Ngiliate.

²⁷ Ha kuheta David ku Mahaneme kumanyi Shobi, mwana Nahashi wa ku Raba wa kuli A-Amone, ni Makire mwana Amiele wa ku Lo-Devale ni Bazilai Ka-Ngiliate wa ku Rogelime

²⁸ yaneha mihela, ni mbasia, ni milondo, ni tiliku, ni sevada, ni wunga, ni mbuto yomu, ni makunde, ni landa ni ya kwanyika,

²⁹ ni wuchi, ni maji a yamwa, ni mapanga, ni keju ya ngombe, hanga David ni atu jenyi akalie. Mumu yamba ngwo, E atu kali ni zala, kanahongo ni pwila mu puya.