2 Samuel 16 - MUKANDA USANDU WA ZAMBI 1975

¹ Muze te David hahiana hakehe helu lia mulundu kumanyi Ziba ngamba ya Mefiposhete yamupatwiza. Kali ni yimbulu aali ni seleyi jo, mba kanambata kulakaji aali a mbolo, ni kulakaji lia yichakata ya uva jomu, ni kulakaji lia yichakata ya mihuko ya lwiza, ni mulange wa vinyu.

² Mwanangana yamba kuli Ziba ngwenyi, Yino yuma kuchi yinalumbunuka? Ziba ngwenyi, Akwa zuwo lia mwanangana menda hali yimbulu; mbolo ni mihuko ya lwiza akweze mayilia; mba mweswawo mahonga mu puya manwa ye vinyu.

³ Mwanangana ngwenyi, Mwana wa mwata we kulihi ali? Ziba yamba kuli mwanangana ngwenyi, Kanatwama mu Yerusaleme mumu kanambe ngwenyi, Musono munyachi wa Izalele mahilwisa kuli yami wanangana wa tata.

⁴ Henaho mwanangana yamba kuli Ziba ngwenyi, Yuma yeswe yapwile ya Mefiposhete hiyalumuka ya yena. Ziba ngwenyi, Ngunafulamana kuli yenu. Ngukawane vumbi kumeso ja mwene wami mwanangana.

⁵ Muze mwanangana David haheta ku Mbahurime kwejileko umwe lunga usoko wa munyachi wa Saulu, jina lienyi Shimei mwana Ngera. Te kaneza nikutukatuka.

⁶ Washile mawe David ni tuvumbi eswe a mwanangana David. Atu eswe ni malunga a ndundo te kanamana kwa kumujingilika sali lia chindume ni sali lia chimeso.

⁷ Shimei yatukatuka David ngwenyi, Katukako! Katukako! Ena lunga wa manyinga; lunga wamokomoko.

⁸ Yehova hanakuhilwisa manyinga eswe a munyachi wa Saulu yoze unasalakana mu wanangana. Yehova hahana wanangana kuli mwané Absalome, ni yena hiwakwachika mu uhuka we, mumu uli lunga wa manyinga.

⁹ Mba Abishai mwana Zeluia yamba kuli mwanangana ngwenyi, Kuchi te yono kawa mufu kanatuku mwene wami mwanangana? Ngutayizenu kama, nguye ngumutape mutwe.

¹⁰ Mwanangana ngwenyi, Enu ana ja Zeluia yika yili hakachi ka yenu ni yami? Se kanatuku, se Yehova hanamwambe ngwenyi, Tuka David, mba yoze mamba ngwenyi, Kuchi te hiwachilinga, iya?

¹¹ David yamba kuli Abishai ni kuli tuvumbi twenyi eswe ngwenyi, Mwanami yoze wasemukine ku mujimba wami kanafupu kungushiha. Mba yono Ka-Mbenjamine aye, ngwami, mahiana. Mwechenu atuke, mumu Yehova hamutuminacho.

¹² Hanji Yehova matala ku chipi chino anangulingi, hanji Yehova mangukundulula chipema mumu ha matuka jenyi kuli yami musono.

¹³ Chocho David ni malunga jenyi ayile mu jila, ni Shimei kanalisese no ha mulundu Chichize hatalanganyi nenyi. Kanayi nikutukatuka nikumukonga mawe ni kumukuwila fufuta.

¹⁴ Mwanangana ni atu eswe aneza no kanende te ni yikatalo mba henaho yalihuzulula.

¹⁵ Absalome ni atu eswe malunga a Izalele yeza ku Yerusaleme, ni Ahitofele hamuwika.

¹⁶ Muze Hushai Ka-Arke sepa lia David haheta kuli Absalome, Hushai yamba kuli Absalome ngwenyi, Vulie mwanangana! Vulie mwanangana!

¹⁷ Absalome yamba kuli Hushai ngwenyi, Lie vumbi lie kuli sepa lie lienalio? Kuchi te kwayile ni sepa lie?

¹⁸ Hushai yamba kuli Absalome ngwenyi, Hi chocho ko. Alioze yoze hanamutongola kuli Yehova ni ku vungu lino, ni kuli malunga eswe A-Izalele, ami mungupwa niwenyi; mungutwama nenyi.

¹⁹ Chikwo nawa, changutamba kuvumbika iya? Te kuchangutambile kuvumbika kumeso ja mwanenyi, nyi? Chizechene navumbikile kumeso ja tatenu, chocho mungupwa kumeso jenu.

²⁰ Absalome yamba kuli Ahitofele ngwenyi, Utulongese mana. Kuchi chatutamba kulinga?

²¹ Ahitofele yamba kuli Absalome ngwenyi, Njilenu kuli *akonkubina aze a tatenu ahichikile kufunga zuwo. Mba A-Izalele eswe manyingika ngwo, Vumba lipi ali nalio kuli tato mba waze hanalifutula ni yena mapwa ni tachi.

²² Kashika o yálila mbalaka Absalome ha fulumba lia zuwo ni Absalome yanjila kuli *akonkubina ja tato kumeso ja A-Izalele eswe.

²³ Mana ja Ahitofele alongesele ha matangwa aze apwile ngwe mutu hahula ku liji lia Zambi. Chocho apwile mana eswe a Ahitofele ni kuli David ni kuli Absalome.