2 Samuel 15 - MUKANDA USANDU WA ZAMBI 1975

¹ Kulutwe lia yino yuma Absalome yalilulikila temba-lia-jita ni tuvwalu ni makumi atano a malunga a kumutetekela.

² Absalome yalimeneka chimenemene, yamanyina mu jila ku unjililo mu chihunda. Muze umwe te kali ni chikuma chatamba kachi kuneha kuli mwanangana achipatule, mba Absalome mamusanyika ngwenyi, Ku chihunda chika unakatuka? Aye makumbulula ngwenyi, Ami kavumbi kenu nguli wa ku munyachi wa nganji wa mu Izalele.

³ Absalome mamba ngwenyi, Ewa, yikuma ye yipema, ya ululi, alioze mwanangana kaselele niumwe kukwivwa.

⁴ Absalome yaweza nawa ngwenyi, Nyi kachi nguli sopi mu chifuchi, kachi mutu mweswe kali ni chikuma hanji mulonga meza kuli yami, kachi mungumupatwila kanawa!

⁵ Chipwe umwe makundama kumuwayila, mazoza moko nikumukwata, ni kumwaha mbeju.

⁶ Chocho Absalome yalinga kuli A-Izalele eswe waze ejile kuli mwanangana atambule upatwilo. Chocho Absalome weyile mbunge ja malunga eswe A-Izalele.

⁷ Kulutwe lia makumi awana a miaka Absalome yamba kuli mwanangana ngwenyi, Ngutayizenu kama nguye ku Heprone ngukafwete yilakenyo yami kuli Yehova.

⁸ Mumu yami kavumbi kenu nalakenyene chilakenyo shimbu te ngunatwama mu Ngeshure mu Seria ngwami, Nyi Yehova manguhetesa nawa ku Yerusaleme chamwenemwene mba mungulingila Yehova.

⁹ Mwanangana ngwenyi, Uye kanawa. Chocho yakatuka, yaya ku Heprone.

¹⁰ Alioze Absalome yatuma ngendeshi ndusu mu minyachi yeswe ya Izalele ngwenyi, Ha kwivwa liji lia chitavwi mba munwamba ngwenu, Absalome iye mwanangana mu Heprone.

¹¹ Kwayile hamwe ni Absalome kulakaji aali a malunga a ku Yerusaleme. Te hanaalakenya, mba o ayile nikwalajala. Kanyingikine nichimwe.

¹² Absalome yasaka Ahitofele Ka-Ngilo ku chihunda chenyi cha Ngilo kuze analambula milambu. Iye te kaliamanga ka David. Mafwefwe apwile anji mumu atu okelele kuli Absalome tangwa ha tangwa.

¹³ Kwejile kuli David umwe kanganda ngwenyi, Mbunge ja malunga a Izalele hijaya kuli Absalome.

¹⁴ David yamba kuli tuvumbi twenyi eswe apwile hamwe nenyi mu Yerusaleme ngwenyi, Katukenu, tuchinenu; nyi ka, kutuchi kulilamwina kuli Absalome. Tambukenu, katukenu kuchina matuwana nikawashi matunehena chuma chipi, ni makalamba limbo ni katana.

¹⁵ Tuvumbi twa mwanangana yamba kuli mwanangana ngwo, Etu tuvumbi twenu mutulinga cheswacho mwene wetu mwanangana matongola.

¹⁶ Mwanangana watuhukile. Akwa zuwo lienyi eswe amukawile. Mwanangana wahichikile kumi lia mapwo te *akonkubina akafunge zuwo.

¹⁷ Mwanangana yatuhuka ni atu eswe yamukaula. Yamana ku Mbete-Merehake.

¹⁸ Tuvumbi twenyi eswe yamupalika ku lumbu. Ni A-Cherete, ni A-Pelete, ni A-Ngata eswe, kulakaji asambano a malunga akatukile ku Ngata nikumukaula. Yapalika kumeso ja mwanangana.

¹⁹ Henaho mwanangana yamba kuli Ka-Ngata Itaia ngwenyi, Kuchi te unayi ni yetu? Hiluka Utwame ni mwanangana. Se uli chilambala kanda mukwa kuhichika chifuchi che, hiluka kwe.

²⁰ Ngwe zau unakeza, mba muchipema yami ngukwendese ku tunda ni ku mwanda hamwe ni yetu se ngunayi kweswako lume? Hiluka utwale akwenu nawa. Keke ni umwenemwene yipwe ni yenu.

²¹ Mba Itaia yakumbulula kuli mwanangana ngwenyi, Ni mwono wa Yehova, ni mwono wa yenu mwene wami mwanangana, kweswako mwene wami mwanangana mapwa, hanji ha kufwa, hanji ha mwono, kwenako mungupwa yami kavumbi kenu.

²² David yamba kuli Itaia ngwenyi, Yako uzauke. Chocho Ka-Ngata Itaia yazauka ni malunga jenyi eswe ni ana eswe apwile no.

²³ Akwa chifuchi cheswe alilile mbimbi, ni atu eswe azaukile. Ni mwanangana mwene wazaukile chitwetwe Kendrone, ni atu eswe azaukile nikutalikisa ku puya.

²⁴ Ni Zadoke wejile nawa hamwe ni A-Levi eswe nikumbata mushete wa usendo wa Zambi. O yatula mushete wa Zambi, ni Abiatare yakanduka ndo atu eswe hamana kukatuka kwimbo.

²⁵ Mba mwanangana yamba kuli Zadoke ngwenyi, Hilwisa mushete wa Zambi mwimbo. Nyi munguwana vumbi kumeso ja Yehova manguhilwisako nikungulwezawo nawa ni zuwo lienyi.

²⁶ Alioze nyi mamba ngwenyi, Chawahililile ni yena, mba yami uno akangulinge chize chamupemena.

²⁷ Mwanangana yamba kuli sasendote Zadoke nawa ngwenyi, Ngwami uli mukwa kumona, nyi? Hiluka kwimbo ni sambukila, ni ana je a malunga aali hamuwika, Ahimaze mwané, ni Jonatas mwana Abiatare.

²⁸ Ami mungutwama ku chau cha ku puya ndo mungutambula liji lia kuli yena lia kungulweza kanawa.

²⁹ Kashika Zadoke ni Abiatare yatwala mushete wa Zambi ku Yerusaleme nawa. Yatwamako.

³⁰ David yakandukila ku jila ya ku mulundu wa Olevwe, nikwenda nikulila. Yafuka mutwe, yazula haku. Mba waze eswe endele hamwe nenyi afukile mitwe yo. Yakanduka nikulila shimbu machenda.

³¹ Umwe yalweza David ngwenyi, Ahitofele hanalifutula ni waze akwa punga ya Absalome. David yamba ngwenyi, Yehova, ngukulembe, alumuna mana a Ahitofele akapwe uhepuke.

³² Chapwile muze te David haheta helu lia mulundu kuze akuwayila Zambi, kumanyi Hushai Ka-Arke yamupatwiza ni chikuto chenyi cha kusonya, ni mavu ha mutwe wenyi.

³³ David yamba kuli iye ngwenyi, Nyi muoya ni yami muopwa ngwe chiteli kuli yami,

³⁴ alioze Shinaho uhiluke kwimbo uambe kuli Absalome ngwe, Mwanangana, kumungupwa kavumbi kenu. Chizechene ngwe napwile kavumbi ka tatenu ha miaka ya kunyima chocho mungupwa kavumbi kenu. Chocho muhasa kungutangwila mana a Ahitofele.

³⁵ Chikwo nawa, asasendote Zadoke ni Abiatare uli no. Kashika cheswacho muwivwa ku zuwo lia mwanangana, ambulula kuli asasendote Zadoke ni Abiatare.

³⁶ O kali ni ana jo aali kuze kwene, Ahimaze mwana Zadoke, ni Jonatas mwana Abiatare. Cheswacho muwivwa uatume kuli yami akangulwezecho.

³⁷ Chocho Hushai sepa lia David yanjila mwimbo, ni Absalome nawa yeza ku Yerusaleme.