2 Samuel 14 - MUKANDA USANDU WA ZAMBI 1975

¹ Joabe mwana Zeluia wamwene mbunge ya mwanangana yapwile kuli Absa lome.

² Kashika Joabe yatuma ku Tekoa yasaka umwe pwo mukwa mana. Yamba kuli iye ngwenyi, Ulionge kama kupwa ngwe umwe wafwisa mutu. Zala kama mazalo a tuliwa. Kanda ulikwita maji alioze pwako ngwe umwe halinyengena mufu shimbu linene.

³ Njila kuli mwanangana, uambe kuli iye maliji wano. Mba Joabe yamulongesa maliji mu kanwa lienyi.

⁴ Muze pwo wa ku Tekoa wahanjikile ni mwanangana yafulamana hashi nikumuwayila, ngwenyi, Mwanangana, ngukwasenu kama.

⁵ Mwanangana yamba ngwenyi, Kuchi unevu? Iye yakumbulula ngwenyi, Chamwenemwene nguli twamishi wa pwo. Lunga liami hanafu.

⁶ Ami kavumbi kenu napwile ni ana aali a malunga. Yalitachika mu yambu mba kukwapwule niumwe kuakandunwina, kashika umwe yalamba mukwo; yamushiha.

⁷ Haliapwila a usoko wetu eswe hanangukatukila yami kavumbi kenu ngwo, Twehenu yoze washiha mukwo, hanga tumushihe iye mumu ha mwono wa mukwo yoze washihile. Mutushiha mwe swana nawa. Chocho majima kala lize nguli nalio, mba kechi kuhichika kuli mukwetu-lunga mukwa jina lienyi chipwe yoze mamusalakana hano hashi.

⁸ Mwanangana ngwenyi, Yako ku zuwo lie. Munguyula chikuma che.

⁹ Pwo wa ku Tekoa yamba kuli mwanangana ngwenyi, Mwene wami mwanangana! Uhenge ukapwe hali yami ni hali munyachi wa tata, mwanangana akasambe ni ngunja yenyi.

¹⁰ Mwanangana ngwenyi, Mweswawo makwamba chimwe chuma, umunehe kuli yami mba kechi kukusunga nawa.

¹¹ Pwo yamba ngwenyi, Ngunaliumbu kuli yenu mwanangana, Iwulukenu Yehova Zambi yenu hanga mukwa kukala manyinga kanda ashiha nawa, kuchina mashiha mwanami. Iye yamba ngwenyi, Ni mwono wa Yehova, chipwe lukambu umuwika wa mwané kechi kaholoka hashi.

¹² Pwo yamba ngwenyi, Tayizenu kama kavumbi kenu kuhanjika limwe liji kuli yenu mwene wami mwanangana. Iye ngwenyi, Hanjika.

¹³ Pwo ngwenyi, Nyi chocho, kuchi te hinwahala chuma chino cha kulimika ni atu a Zambi? Mumu ha kuhanjika liji lino yenu mwanangana nuli ngwe umwe chivulumunyi se mwe mwanangana katumine kusaka mwanenyi yoze wahumine.

¹⁴ Mumu chatutamba kufwa. Tuli ngwe meya aze anamwangana hashi keshi kuhasa kwaanda nawa. Chipwe Zambi keshi kuchiza mwono alioze kakululika shimbi, keshi kumbila liakulu yoze hamuhuma.

¹⁵ Kashika nezanga kuhanjika liji lino ni mwene wami mwanangana, mumu atu hananguvwisa woma. Ami kavumbi kenu nambanga ngwami, Munguhanjika haliapwila ni mwanangana. Hanji mwanangana malinga chize yami kavumbi kenyi mungwita.

¹⁶ Mumu mwanangana kumevwa, kumakapulula kavumbi kenyi ku tachi ja yoze unafupu kutwonwona ni yami ni mwanami wa lunga hamuwika ku chihinga cha Zambi.

¹⁷ Mba yami kavumbi kenu nambanga ngwami, Liji lia mwene wami mwanangana likapwe lia kuhwimisa. Mumu mwene wami mwanangana wapwa ngwe mungelo wa Zambi kusa chinyingi hakachi ka yipema ni yipi. Yehova Zambi yenu apwe hamwe ni yenu.

¹⁸ Mwanangana yakumbulula kuli pwo ngwenyi, Chize mungukuhula kanda unguswekelacho. Pwo ngwenyi, Mwene wami mwanangana ahanjike.

¹⁹ Mwanangana yamba ngwenyi, Ngwami, kwoko lia Joabe lili hamwe ni yena mu pande jino jeswe nyi? Pwo yakumbulula ngwenyi, Ni mwono wenu, mwene wami mwanangana, niumwe mahasa kupiasukila ku chindume hanji ku chimeso ku chimwe chuma mwene wami mwanangana hanahanjika. Pundu kavumbi kenu Joabe iye wangutumanga, ni iye nawa wasanga maliji wano eswe mu kanwa lia yami kavumbi kenu.

²⁰ Kavumbi kenu Joabe halinga chuma chino hanga akatewulule yuma. Mwene wami mana anji ali no nikulita ni mana a mungelo wa Zambi akanyingike yuma yeswe yili hano hashi.

²¹ Mwanangana yamba kuli Joabe ngwenyi, Tala, hinalinga chuma chino. Kashika yako unehe mukweze Absalome nawa.

²² Joabe yafulamana hashi nikuwayila mwanangana ni kumuhalisa. Joabe ngwenyi, Mba musono yami kavumbi kenu hananyingika, ngwami, hinawana vumbi kumeso ja yenu mwene wami mwanangana se mwanangana halinga chize yami kavumbi kenyi namwita.

²³ Chocho Joabe yakatuka, yaya ku Ngeshure, yaneha Absalome ku Yerusaleme.

²⁴ Mwanangana yamba ngwenyi, Akaye ku zuwo lienyi, kanda amona meso jami. Chocho Absalome yaya ku zuwo lienyi, kamwene meso ja mwanangana.

²⁵ Mu Izalele mweswe kumwapwile niumwe amuchichimiekene ha kupema chenyi shina Absalome wika. Chize ku yiliato yenyi ndo ku mbanda-mutwe kukwapwile kachipa nikamwe.

²⁶ Muze alitewile, wapezalishile kambu ja ha mutwe wenyi—kulakaji aali a shekele nikulita ni pezu ja mwanangana. Walitewile miaka yeswe ha songo lia mwaka; wevwile kulema cha kambu, kashika walitewile.

²⁷ Absalome wasemene ana atatu a malunga, wa pwo umuwika, jina lienyi Tama, iye te chileza.

²⁸ Absalome Watwamine miaka yiali ya muwundu mu Yerusaleme; kamwene meso ja mwanangana.

²⁹ Mba Absalome watumine kusanyika Joabe amutume kuli mwanangana; alioze iye katayile. Yatuma chisuho chamuchiali hindu katayile.

³⁰ Kashika yamba kuli ngamba jenyi ngwenyi, Munda wa Joabe walihata ni munda wami. Kuuli ni sevada. Yénu nuwoche. Ngamba ja Absalome yocha we munda.

³¹ Mba Joabe yakatuka yeza kuli Absalome ku zuwo lienyi ngwenyi, Kuchi te ngamba je hocha munda wami?

³² Absalome yakumbulula kuli Joabe ngwenyi, Natuma kuli yena ngwami, Tweya kuno ngukutume kuli mwanangana uambe ngwe, Kuchi te nakatukile ku Ngeshure? Shinaho kachi nasalile kuze. Kashika ngutayize ngumone meso ja mwanangana. Nyi uhenge nguli nawo, angushihe.

³³ Mba Joabe yaya kuli mwanangana; yamulweza. Muze hasanyika Absalome iye yeza kuli mwanangana, yafulamana kumeso ja mwanangana. Mwanangana yamwaha mbeju.