2 Samuel 13 - MUKANDA USANDU WA ZAMBI 1975

¹ Kulutwe lia yino yuma Absalome mwana David te kali ni umwe ndu mbwenyi mupema chikolo, jina lienyi Tama, ni Amnone mwana David wamuzangile.

² Ha kulifwita mu mbunge hali ndumbwenyi Tama, Amnone wayijile. Mumu chapwile chikalu kuli Amnone kumulinga chuma chipi se iye *virgem.

³ Alioze te kali ni umwe sepa, jina lienyi Jonadabe mwana wa Shimea, yayo ya David. Yono Jonadabe mukwa malinjekela anji.

⁴ Yamba kuli iye ngwenyi, Ena mwana wa mwanangana kuchi te unayi nikuwangama chocho tangwa ha tangwa? Kuchi te kwangulwezele? Amnone wamulwezele ngwenyi, Mumu ha zango lia Tama ndumbwa mwanakwetu Absalome.

⁵ Jonadabe yamba kuli iye ngwenyi, Pomba ha muhela we ulionge ngwe unayiji. Mba muze tatenu meza kukumona amba kuli iye ngwe, Tayiza kama ndumbwami Tama eze angwehe mbolo ngukalie; alulike kulia kumeso jami nguchimone, ngukalie ku kwoko lienyi.

⁶ Chocho Amnone wapombele waliongele kuyiza. Mba muze mwanangana wejile kumumona Amnone yamba kuli mwanangana ngwenyi, Tayiza kama ndumbwami Tama eze angulingile jimwe mbolo jiali kumeso jami, ngukalie ku kwoko lienyi.

⁷ David yatuma ku zuwo kuli Tama ngwenyi, Yako haliapwila ku zuwo lia ndumbwe Amnone umulingile kulia.

⁸ Chocho Tama yaya ku zuwo lia ndumbwenyi Amnone, iye te kanapombo. Yanda wunga; yauchika; yalinga mbolo kumeso jenyi; yocha j e mbolo.

⁹ Yanda chikango; yazukula mbolo kumeso jenyi, alioze kasolo kulia. Amnone yamba ngwenyi, Malunga eswe angukatuke. Eswe yamukatuka.

¹⁰ Amnone yamba kuli Tama ngwenyi, Neha kulia mu chipatulo cha muchima ngukalie ku kwoko lie. Tama yanda mbolo jize halinga, yajineha mu chipatulo cha muchima kuli ndumbwenyi Amnone.

¹¹ Muze hajineha kuli iye akalie, yamukwata, yamba kuli iye ngwenyi, Ndumbwami, tweya upombe ni yami.

¹² Iye yamukumbulula ngwenyi, Hi chocho ko ndumbwami, kanda unguvulumuna ni tachi, mumu keshi kulinga chuma chipwa haha mu Izalele. Kanda ulinga uhepuke uno.

¹³ Ni yami, kulihi mungutwala sonyi jami? Mba ha kutwala kuli yena kumuopwa ngwe chihepuke mu Izalele. Kashika ngunaliumbu. Hanjika ni mwanangana, mumu kechi kukukwika kungumbata.

¹⁴ Hindu kapanjikile liji lienyi alioze se wamuhianyine ni tachi yamukumba, yapomba nenyi.

¹⁵ Mba Amnone yamuvwila kupiha chahiana chikolo. Kupiha chize amuvwilile chahianyine zango lize amuzangile nalio hatangu. Amnone yamwamba ngwenyi, Katuka! Yako!

¹⁶ Pwo yamba kuli iye ngwenyi, Hi chocho ko. Mumu mulonga uno wa kunguhuma wahiana uno ukwo wangulinga. Hindu kamupanjikile.

¹⁷ Yasanyika ngamba yoze wakumulingila milimo ngwenyi, Huma yono pwo kumeso jami haliapwila, uyike pito muze haya.

¹⁸ Pwo kali ni uzalo wa ulombo weka ni weka mumu chocho azalile ana ja mianangana aze apwa *virgem. Ngamba yenyi yamutuhwisa yayika pito muze hatuhuka.

¹⁹ Tama yasa uto ha mutwe wenyi, yasonya uzalo wenyi wa ulombo weka ni weka uze azalile, yalikwata suswa mutwe, yaya kwenyi nikulila mbimbi.

²⁰ Ndumbwenyi Absalome yamba kuli iye ngwenyi, Ndumbwe Amnone kapwanga ni yena nyi? Hola ndumbwami. Iye ndumbwe, kashika kanda upinda nacho mu mbunge. Chocho Tama watwamine utwamishi mu zuwo lia ndumbwenyi Absalome.

²¹ Alioze muze mwanangana David wevwile yuma yino yeswe yatenuka chikolo.

²² Absalome aye kahanjikile kuli Amnone chipwe chipema chipwe chipi. Mumu Absalome wavwilile kole Amnone mumu havulumuna ndumbwenyi Tama ni tachi.

²³ Kulutwe lia miaka yiali ya muwundu Absalome wapwile ni akwa kutewula mapanga ku Mbale-Hazore hakamwihi ni Eframe. Absalome yalakenya ana eswe a malunga a mwanangana.

²⁴ Absalome yeza kuli mwanangana ngwenyi, Ami kavumbi kenu nguli ni akwa kutewula mapanga. Ngunaliumbu, mwanangana ni tuvumbi twenu eswe eze ni yami kavumbi kenu.

²⁵ Mwanangana yamba kuli Absalome ngwenyi, Hi chocho ko, mwanami, kutuchi kuya eswe kuchina mutupwa chiteli kuli yena. Iye yamushinjika, hindu katayile, alioze yamuwahisa.

²⁶ Mba Absalome yamba ngwenyi, Nyi chocho, tutayizenu kama yaya Amnone kuya ni yetu. Mwanangana ngwenyi, Kuchi te maya ni yena?

²⁷ Alioze Absalome yamushinjika atayize Amnone ni ana a malunga eswe a mwanangana aye nenyi.

²⁸ Absalome yatuma ngamba jenyi ngwenyi, Talenu kanawa, muze mbunge ya Amnone muyiwaha kanawa ni vinyu, ni yami mungunwamba ngwami, Lambenu Amnone, himushihenu, kanda nwivwa woma. Ngwami, hinanwaha shimbi. Hamukenu; takamenu.

²⁹ Ngamba ja Absalome yalinga kuli Amnone nikulita ni shimbi ya Absalome. Mba ana eswe a mwanangana yakatuka, yanyina mutu mweswe ha mula wenyi, yachina.

³⁰ Shimbu achili mu jila lusango yaheta kuli David ngwo, Absalome hashiha ana a malunga eswe a mwanangana. Kukwasalile chipwe umuwika.

³¹ Mwanangana yakatuka, yasonya mazalo jenyi, yapomba mu mavu. Ngamba jenyi eswe amanyineko ni mazalo a kusonya.

³² Alioze Jonadabe, mwana Shimea yayo ya David, yakumbulula ngwenyi, Mwene wami kanda nunyonga ngwe hashiha akweze ana a malunga eswe a mwanangana. Amnone wika hafwa. Mumu ku shimbi ya Absalome hahala chuma chino chize ku tangwa avulumwine ni tachi ndumbwenyi Tama.

³³ Kashika mwene wami mwanangana, chuma chino kanda nuchisa mbunge nukanyonge ngwe ana a malunga eswe a mwanangana hafwa. Amnone wika hafwa.

³⁴ Alioze Absalome yachina. Mwe mukweze kalayi yahetuka, yatala kumanyi atu anji kanejila jila ya mulundu kunyima yenyi.

³⁵ Jonadabe yamba kuli mwanangana ngwenyi, Talenu, ana a malunga a mwanangana kaneza. Yami kavumbi kenu chize nambanga, mba chocho chapwa.

³⁶ Muze hamba chocho ana a malunga a mwanangana yeza; yakalumioka nikulila mbimbi. Mba mwanangana nawa ni ngamba jenyi eswe yalila chikolo.

³⁷ Alioze Absalome yachina, yaya ku Talamai mwana wa Amihude, mwanangana wa Ngeshure. David aye yalishimwoka hali mwanenyi tangwa ha tangwa.

³⁸ Chocho Absalome yachina, yaya ku Ngeshure. Watwamineko miaka yitatu.

³⁹ Mbunge ya mwanangana David yevwa usona wa kuya kuli Absalome, mumu yalilembejeka ha kutwala kuli Amnone, se iye hanafu kulu.