2 Samuel 12 - MUKANDA USANDU WA ZAMBI 1975

¹ Yehova watumine Natane kuli David. Iye yaheta, yamba ngwenyi, Kwapwile malunga aali mu chihunda chimuwika; mukwo pichi, mukwo chiswale.

² Pichi te kali ni mapanga, ni pembe, ni ngombe.

³ Chiswale nichimwe keshi nacho shina kamwe kachihwo ka panga. Te wamulanjile ni kumulela, chocho watatukile hamwe nenyi, ni hamwe ni ana jenyi. Yalila ku kakulia kenyi; yanwina ku musenge wenyi mwene; yapomba mu kondo yenyi; yapwa kuli iye ngwe mwanenyi wa pwo.

⁴ Kwejile umwe ngeji kuli mwe pichi, alioze kazangile kuchiza chimuna wa ku tanga lienyi amuteleke hali ngeji yenyi. Yatambula mwana-panga wa chiswale, yamuteleka hali ngeji yenyi.

⁵ Utenu wa David yiukasumukina yoze lunga. Yamba kuli Natane ngwenyi, Ni mwono wa Yehova, yono lunga halinga chuma chino katela kufwa.

⁶ Chikwo nawa akahilwise ana-mapanga awana mumu hachilinga, ni keke kapwile nayo.

⁷ Natane yamba kuli David ngwenyi, Mwe lunga, yena. Yehova mwe Zambi ya Izalele kanambe ngwenyi, Nakuzujilile maji ukapwe mwanangana wa Izalele. Nakupulwile kuli Saulu.

⁸ Nakuhele zuwo lia mwata we, ni mapwo ja mwata we nakuhelo mu kondo. Nakuhele munyachi wa Izalele ni munyachi wa Yunda. Nyi kachi chakukehelele kachi nakuwezele nawa chichi ni chichi.

⁹ Kuchi te hiwalelesa liji lia Yehova ukalinge chize chamupihila? Uriya Ka-Hete hiwamushihisa ni katana. Hiwatambula mukwo-pwo akapwe pwo lie. Iye te wamushihisa ni katana ka A-Amone.

¹⁰ Kashika, katana kechi kukatuka ku zuwo lie, mumu hiwangulelesa, hiwambata pwo lia Uriya Ka-Hete.

¹¹ Yehova kanambe ngwenyi, Mungukuvundwila yipi mwe mu zuwo lia yena mwene. Mungutambula mapwo je kumeso je nikwahana kuli akwenu, mba mapomba ni mapwo je, he ha mwalwa uno lume.

¹² Mumu yena wachilingile ku tenga, alioze yami mungulinga chuma chino kumeso ja A-Izalele eswe ni ha mwalwa uno.

¹³ David yamba kuli Natane ngwenyi, Yehova hinamuvulumuna. Natane yamba kuli David ngwenyi, Yehova hakuchiza mutonga we. Kuchi kutwa.

¹⁴ Hindu mwe mwana hiwasema kumafwa lume, mumu ha chino chitanga hiwahana kuli akwa kole ja Yehova unjililo wa kusaula.

¹⁵ Mba Natane yaya ku zuwo lienyi. Yehova walambile mwana yoze David wasemene ni pwo lia Uriya. Wayijile chikolo.

¹⁶ David walembelele mwana kuli Zambi. David kalile. Wanjilile nikupomba ha mavu ufuku weswe.

¹⁷ Makulwana a zuwo lienyi yakundama kuli iye akamuhindwise, alioze katayile. Chipwe kulia, kalile no.

¹⁸ Ha tangwa liamuchishimbiali mwana yafwa. Tuvumbi twa David evwile woma kumulweza ngwo, Mwana hafwa. Mumu yamba ngwo, Shimbu te mwana achili ni mwono tunakahanjika nenyi, hindu katupanjikile. Nyi mutumulweza kufwa cha mwana, malifwita kuhiana.

¹⁹ David yamona tuvumbi twenyi kanaliswaswata hakachi ko, yanyingika ngwenyi, Mwana hafwa. Mba David yamba kuli tuvumbi twenyi ngwenyi, Mwana hafwa, nyi? O ngwo, Ewa, hafwa.

²⁰ Mba David yakatuka ha mavu, yasana, yalikwita maji, yazala mazalo eka, yanjila mu zuwo lia Yehova yawayila. Mba yaya ku zuwo lienyi. Muze heta kuli ayo yamwaha kulia, yalia.

²¹ Tuvumbi twenyi ambile kuli iye ngwo, Chuma chino nwalinga, kuchi chinalumbunuka? Nwalilile ni kulitwamina kulia mumu hali mwana shimbu achili ni mwono. Alioze muze hafwa hinwakatuka, hinwalia.

²² Iye yamba ngwenyi, Shimbu mwana achili ni mwono nalilile ni kulitwamina kulia mumu nambile ngwami, Kwiji, hanji Yehova manguvwila vumbi, mwana atwame ni mwono.

²³ Alioze haliapwila hanafu, kuchi te mungulitwamina kulia? Te munguhasa kumuhilwisa? Yami munguya kuli iye. Aye kechi kwiza kuli yami.

²⁴ David yalembejeka mukwo-pwo Bate-Shipa, yanjila kuli iye, yapomba nenyi, yasema mwana wa lunga. Iye yamuluka ngwenyi, Solomone. Yehova wamuzangile,

²⁵ mba watumine ku kwoko lia Natane mwe profeta, yamuluka Jededia mumu ha mukunda wa Yehova.

²⁶ Joabe washile jita ni Raba wa A-Amone. Watambwile limbo lia mwanangana.

²⁷ Joabe yatuma tunganda kuli David ngwenyi, Hinasa jita ni Raba; hinatambula limbo lia ku meya.

²⁸ Kashika kungululenu masalila ja atu nukeze nuseleke chihunda nuchitambule kuchina munguchitambula yami mba machiluka jina liami.

²⁹ Kashika David yakungulula atu eswe, yaya ku Raba, yasako jita, yachitambula.

³⁰ Yachiza chipangula ku mutwe wa mwanangana wo. Pezu yacho te *talentu yimuwika ya oru, ni mawe anji a ndando yilemu apwileko. Yachisa ha mutwe wa David. Mba iye yatuhwisa upite wa kupupa ku chihunda, wunji kuhiana.

³¹ Yachizamo atu aze apwilemo nikwasela ku selalo, ni ku yikungo ya kulima nayo, ni ku njimbu ja utale, nikwalingisa ku utengelo wa tijolo. Chocho walingile ku yihunda yeswe ya A-Amone. Mba David ni atu eswe yahiluka ku Yerusaleme.