2 Samuel 11 - MUKANDA USANDU WA ZAMBI 1975

¹ Mba ha kupalika cha mwaka, ha kakweji wa kuya mianangana ku jita David yatuma Joabe hamuwika ni atu jenyi ni A-Izalele eswe. Yonwona A-Amone mba yaseleka Raba. Alioze David wanamine ku Yerusaleme.

² Ha ngoloshi David yakatuka ha muhela wenyi, yaya nikwolola molu ha fulumba lia zuwo lia mwanangana. Ku fulumba yamona pwo umwe kanasane. Mwe pwo te mupema chikolo ku meso.

³ David yatuma kuhula ha kutwala kuli pwo. Ngwo, Mwe Bate-Shipa, mwana Eliame, pwo lia Uriya mwe Ka-Hete.

⁴ David yatuma tunganda, yamutambula, mba yanjila, yapomba nenyi (mumu pwo te halipemesa ku kupiha chenyi), mba yahiluka ku zuwo lienyi.

⁵ Pwo yaka ufumba mba yatuma kulweza David ngwenyi, Ufumba nguli nawo.

⁶ David aye yatuma liji kuli Joabe ngwenyi, Ungutumine Uriya Ka-Hete. Mba Joabe yatuma Uriya kuli David.

⁷ Muze Uriya haheta David yamuhula lusango wa Joabe, ni chize e atu atwama, ni chize jita yapwa.

⁸ Mba David yamba kuli Uriya ngwenyi, Palumuka ku zuwo lie usane ku molu. Uriya yakatuka ku zuwo lia mwanangana, mba kwamukawile kulia cha kuli mwanangana.

⁹ Alioze Uriya wapombele ku chikolo cha zuwo lia mwanangana hamuwika ni tuvumbi eswe a mwene wenyi. Kayile ku zuwo lienyi.

¹⁰ Muze hachilweza David ngwo, Uriya kayile ku zuwo lienyi, David yamba kuli Uriya ngwenyi, Ngwami, ku wenyi unakatuka. Kuchi te kwayile ku zuwo lie?

¹¹ Uriya yamba kuli David ngwenyi, We mushete, ni A-Izalele, ni A-Yunda, eswe mu yisakila anapombo. Ni mwene wami Joabe ni atu eswe a mwene wami hanase yilombo yo mu yambu, mba yami te munguya ku zuwo liami mukulia ni kunwa ni kupomba ni pwo liami nyi? Ni mwono wenu, ni mwono wa mbunge yenu, chichi kuchilinga.

¹² David yamba kuli Uriya ngwenyi, Namina kuno musono nawa, mba hamene mungukwecha ukaye. Chocho Uriya yatwama mu Yerusaleme tangwa lio liene ni ha kucha nawa.

¹³ Mba muze David hamusanyika yalia, yanwa kumeso jenyi. Yamuzengewesele. Ha ngoloshi yatuhuka akapombe ha muhela hamwe ni tuvumbi twa mwene wenyi, alioze kayile ku zuwo lienyi.

¹⁴ Ha kucha David yasoneka mukanda kuli Joabe. Yautuma mu kwoko lia Uriya.

¹⁵ Yasoneka mu mukanda ngwenyi, Sako Uriya kulutwe mu jita yize yahiana kusasaminya. Mba munumwehuka akamulambe, akafwe.

¹⁶ Chapwile muze Joabe watalile kanawa chihunda, wasele Uriya kuze kananyingika ngwenyi, Malunga a tachi aliko.

¹⁷ Malunga a chihunda yatuhuka, yasa jita ni Joabe, mba amwe atu afwile, e tuvumbi twa David. Ni Uriya Ka-Hete wafwile nawa.

¹⁸ Joabe yatuma kulweza David lusango mweswe wa jita.

¹⁹ Yamba kuli kanganda ngwenyi, Muze hiwamana kwambulwila mwanangana lusango mweswe wa jita,

²⁰ nyi mwanangana matenuka ngwenyi, Kuchi te nwakundamine Chichize ku chihunda mukwasa jita? Te kunwanyingikine ngwenu, Waze ali ha chipanga matwasa, nyi?

²¹ Washihile Apimeleke mwana Jerubeshete iya? Ngwami, pwo ha chipanga wamuholwelele luliwe lwa kutwa nalwo, mba yafwa mu Tebeze. Kuchi te nwakundamine ku chipanga kevwe? Mba muwamba ngwe, Ni kavumbi kenu Uriya Ka-Hete hafwa nawa.

²² Chocho mwe kanganda yaya, yaheta, yalweza David yino yeswe Joabe amutumine.

²³ Kanganda yamba kuli David ngwenyi, Malunga atukumbile. Yatuhuka kuli yetu mu yambu mba twaalambile ndo ku unjililo ku chikolo cha chihunda.

²⁴ Alioze ngashi ha chipanga yatwasa yetu tuvumbi twenu, mba amwe tuvumbi twa mwanangana hafwa. Ni kavumbi kenu Uriya Ka-Hete hafwa nawa.

²⁵ Mba David yamba kuli kanganda ngwenyi, Amba kuli Joabe ngwe, Chuma chino kanda chikupihila, mumu katana kakulia hanji au hanji mukwo. Kolesa jita ku chihunda ukachipupe. Ni yena umutakamise nawa.

²⁶ Muze pwo lia Uriya hevwa kufwa cha mukwo-lunga, yamulila mbimbi.

²⁷ Mba muze kulila hichahwa David yatuma, yamuneha ku zuwo lienyi yamumbata. Mba yamusemena mwana wa lunga. Alioze chuma halinga David chapihililile Yehova.