2 Samuel 10 - MUKANDA USANDU WA ZAMBI 1975

¹ Kulutwe lia yino yuma mwanangana wa A-Amone wafwile mba mwanenyi Hanune yamusalakana mu wanangana.

² David yamba ngwenyi, Mungulinga vumbi kuli Hanune mwana Nahashi chizechene ngwe tato wangulingile vumbi. Kashika David watumine tuvumbi twenyi akamulembejeke mumu hali tato. Tuvumbi twa David yaheta ku chifuchi cha A-Amone.

³ Alioze miata ja A-Amone yamba kuli mwene wo Hanune ngwo, Kanda nunyonga ngwe David kananutumu akwa kulembejeka hanga akalemese tatenu. Hi chocho ko. David hatuma tuvumbi twenyi kuli yenu akendese chihunda, akachimone kanawa, akachipupe.

⁴ Kashika Hanune yakwata tuvumbi twa David; yatewula chihanda cha hakachi cha wevu wo; yateta mazalo jo hakachi ndo ku matako; yaahuma.

⁵ Muze hambulwila David, iye yatuma kwapatwiza mumu sonyi jinji evwile. Kashika mwanangana yamba ngwenyi, Twamenu ku Yeriku ndo wevu wenu hiwasuha, mba munwiza.

⁶ Muze A-Amone hamona ngwo, Tunanuku kuli David, yatuma nikufweta A-Seria a ku Mbete-Rehobo ni A-Seria a ku Zoba, makumi aali a tununu a maswalale akwa kwenda hashi, ni mwanangana wa Maka ni kanunu ka malunga, ni akwa Tope kumi lia tununu ni tununu aali a malunga.

⁷ Ha kuchivwa David yatuma Joabe ni tujita eswe akwa ndundo.

⁸ A-Amone yatuhuka. Yalulika mikana ya jita kwe ku chikolo cha limbo. A-Seria a ku Zoba ni a ku Rehobo ni malunga a ku Tope ni malunga a ku Maka, o apwile kwa ukawo mu yambu.

⁹ Ha kumona chize halulika mikana ya jita kulutwe ni kunyima, Joabe yasakula malunga eswe apema a mu Izalele; yaasa akalimike ni A-Seria.

¹⁰ Waze hasala yaahana kuli mwanakwo Abishai, iye yaasa akalimike ni A-Amone.

¹¹ Ngwenyi, Nyi A-Seria mangukumba ni tachi, ena mukangukwasa. Alioze nyi A-Amone makukumba yena ni tachi, mba yami mungwiza mukukukwasa.

¹² Tuhamukenu; tupwenu tuli malunga mumu hali atu jetu ni ha yihunda ya Zambi yetu. Yehova akalinge chize chamupemena.

¹³ Chocho Joabe ni atu jenyi akundamine ase jita ni A-Seria. O yamuchina.

¹⁴ Muze A-Amone amwene ngwo, A-Seria hachina, no nawa yachina kumeso ja Abishai, yanjila mu chihunda. Mba Joabe yahichika A-Amone, yahiluka ku Yerusaleme.

¹⁵ Muze A-Seria hamona ngwo, Hatukumba kuli A-Izalele yalikungulula.

¹⁶ Hadarezere yatuma, yasaka A-Seria a mu sali lia Lwiji. O yeza ku Helame hamuwika ni Shobake, kapitau ka tujita a Hadarezere kulutwe lio.

¹⁷ Yalweza David mba iye yakungulula A-Izalele eswe, yazauka Yordau, yeza ku Helame. A-Seria yalulika mikana yo ya kulimika ni David, yasa nenyi jita.

¹⁸ A-Seria yachina kumeso ja A-Izalele, mba David yashiha malunga a mu kulakaji shimbiali a matemba-a-jita hakachi ka A-Seria, ni makumi awana a tununu a maswalale a tuvwalu. Yalamba mwe Shobake kapitau ka tujita two, mba iye nawa wafwileko.

¹⁹ Muze mianangana waze eswe azeyele kuli Hadarezere hamona ngwo, Hatukumba kuli A-Izalele o yatá kuli A-Izalele, yaalingila. Chocho A-Seria evwile woma kukwasa A-Amone nawa.