2 Samuel 1 - MUKANDA USANDU WA ZAMBI 1975

¹ Kulutwe lia kufwa cha Saulu, muze David hanahiluka ha kushiha A-Amaleke, David yatwama mu Zikalage matangwa aali.

² Ha tangwa liamuchitatu umwe lunga yakatuka ku chilombo cha Saulu, kali ni mazalo jenyi a kusonya ni mavu ha mutwe wenyi. Ha kuheta kuli David yafulamana hashi nikumuwayila.

³ David yamuhula ngwenyi, Kulihi unakatuka? Iye yakumbulula ngwenyi, Nachinyine ku chilombo cha A-Izalele.

⁴ David yamba kuli iye ngwenyi, Ungwambulwile. Kuchi chinakapwa? Iye yamba ngwenyi, Atu achinyine ku jita, ni anji hakachi ko hanalimbuka, hanafu. Chikwo nawa Saulu ni mwanenyi Jonatas hanafu.

⁵ David yamba kuli mukweze yoze wamunehenene liji ngwenyi, Kuchi unanyingika ngwe Saulu ni mwanenyi Jonatas hanafu?

⁶ Mba mukweze yoze wamunehenene liji yamba ngwenyi, Napalikanga chipalikila lume ha mulundu wa Ngilboa, kumanyi Saulu yeu, kanajikijila ha kunga lienyi, ni matemba-a-jita ni akwa tuvwalu kanamuhete.

⁷ Ha kutala kunyima yangumona, yangusanyika. Mba nakumbulula ngwami, Yami uno.

⁸ Iye yanguhula ngwenyi, Yena iya? Namukumbulula ngwami, Nguli Ka-Amaleke.

⁹ Iye yangwamba ngwenyi, Mana kuno ku lumbu liami ungushihe mumu ngunapinji chikolo, hindu mwono kuusolo kusutuka.

¹⁰ Chocho yingumanako; yingumushiha, mumu hinasa chinyingi ngwami, kechi kuhasa kumona mwono muze halimbuka. Yingumuchiza chipangula chapwanga ha mutwe wenyi ni lukano wapwanga ku kwoko lienyi. Nayineha kuno kuli yenu mwene wami.

¹¹ Henaho David yakwata mazalo jenyi, yaasonya, ni malunga eswe amanyine hamwe nenyi yalinga chimuwika.

¹² Ndo chingoloshi alishimwokene, nikulila, nikulitwamina kulia, mumu hali Saulu ni mwanenyi Jonatas, ni hali atu a Yehova, ni ha vungu lia Izalele, mumu hanafu ni katana.

¹³ David yamba kuli mukweze wamunehenene liji ngwenyi, Kulihi unakatuka? Iye yakumbulula ngwenyi, Nguli mwana kandaka Ka-Amaleke.

¹⁴ David yamba kuli iye ngwenyi, Kuchi te kwevwile woma wa kwolola kwoko lie mukushiha yoze hanamuwayisa ni maji kuli Yehova?

¹⁵ David yasanyika umwe hakachi ka akweze ngwenyi, Yako, umulambe. Yamulamba; chocho yafwa.

¹⁶ David yamba kuli iye ngwenyi, Manyinga je akapwile ha mutwe wa yena mwene, se kanwa lie hiliakushindakenya ngwe, Hinashiha yoze amuwayishile kuli Yehova.

¹⁷ David yalila mbimbi hali Saulu ni mwanenyi Jonatas ni maliji wano.

¹⁸ Yatuma akalongese kuli A-Yunda mwaso wa uta. Hanachisoneka mu mukanda wa Njasha. Ngwenyi,

¹⁹ Izalele-e-e! Uhenya we hanaushihi ha manangamo je. Akwa ndundo hanalimbuka Chichize!

²⁰ Kanda nuchambulula mu Ngata, kanda nuchifumanyishina mu matapalo a Asekalone, kuchina mapwo A-Filistea mawahilila, kuchina mapwo ja yilima malikwiza.

²¹ Enu, milundu ya Ngilboa, chipwe mume chipwe vula kanda yikapwila hali yenu, chipwe minda ya milambu, ka. Mumu kwenako lukepwe wa akwa ndundo wapihile, lukepwe wa Saulu, ngwe kamuwayishile ni maji.

²² Uta wa Jonatas kuwahilukile kunyima, chipwe ku manyinga a waze haashiha, chipwe ku maji a akwa ndundo. Katana ka Saulu kahilukile mokomoko.

²³ Saulu ni Jonatas aazangile, apwile apema mu mwono wo, ni mu kufwa kaahandunwine. Tambu jo jahianyine ja pupa, tachi jo jahianyine ja ndumba.

²⁴ Mapwo A-Izalele, lililenu Saulu, wanujikile kanawa ni mahina a ngengu, wanuselele yuma ya oru ya uhenya ha mazalo jenu.

²⁵ Akwa ndundo hanalimbuka Chichize he hakachi ka jita! Jonatas kanapombo wa kushiha ha manangamo je.

²⁶ Yaya Jonatas, ngunalifwichi mu mbunge mumu hali yena. Wapwile mupema chikolo kuli yami. Zango lie liapwile lia kukomwesa; liahianyine zango lia mapwo.

²⁷ Akwa ndundo hanalimbuka Chichize! Yitwa ya jita hayonwona.