2 Petulu 3 - MUKANDA USANDU WA ZAMBI 1975

¹ Akwetu a zango, uno mukanda wamuchiali ngunasoneka kuli yenu; mu yeswe yiali ngunakasumuna kunyonga chenu cha kutuwika ha kunwiwulula.

² Ngwami, Chanutamba kwiwuluka maliji aze ahanjikile Shimbu-kanda ku makanwa ja aprofeta asandu, ni shimbi ya Mwene kanda Chilamwina anwambile ni makanwa ja apostolo jenu.

³ Chuma chitangu nyingikenu ha matangwa a kusula, akwa kukekuna kumakeza ni kukekuna, nikwenda nikulita ni usolo wo ene.

⁴ Mamba ngwo, Chilakenyo cha kuheta chenyi Chilihicho? Mumu hanga tulamba ayile tulo, yuma yeswe kuyakutwama chizechene ngwe yapwile chize ku uputukilo wa kutanga.

⁵ Mumu chino ku upale wo ene kakuvulama ngwe kwapwile malilu chize ku shakulu, ni hashi haze lia meya ni mu meya, ku liji lia Zambi;

⁶ kuli ayo hashi hakulu, se liazalile ni sanga lia meya, hatokele.

⁷ Alioze malilu aze a haliapwila, ni hashi, ku liji limuwika hanayitulikila kahia, kanayifungu ndo ku tangwa lia upatwilo ni kwonwona cha yitanganyani.

⁸ Alioze kanda nuvulama chuma chino chimuwika, akwetu a zango, ngwe tangwa limuwika kuli Mwene linapu ngwe kanunu ka miaka, kanunu ka miaka kanapu ngwe tangwa limuwika.

⁹ Mwene keshi kuvumiwa ni chilakenyo chenyi, ngwe amwe akunyonga kupwa kuvuma; aiioze iye chihomboloji kuli yenu, se kazangile niumwe kutoka, aiioze eswe alikonyeke.

¹⁰ Alioze tangwa lia Mwene kumulikeza ngwe mwiji ha ufuku: muze malilu makahwa ni lundunjila, ni yuma ya mwilu muyikasangunuka ni chivukuminya cha kahia, ni hashi ni yitanga yize yiliho muyikawema wupu.

¹¹ Se yino yuma yeswe chocho muyikajindwoka, kuchi Chanutamba kupwa ni kwenda chisandu ni uwayilo?

¹² Ni kutalatala, nikupupwisa kuheta cha tangwa lia Zambi, ha mukunda walio malilu nikuwema makajindwoka, ni yuma ya mwilu muyikasangunuka ni chivukuminya cha kahia?

¹³ Alioze, nikulita ni chilakenyo chenyi, twakutalatata malilu aha ni hashi haha, haze hakutwama ululi.

¹⁴ Kashika, akwetu a zango, se nwakutalatala yino yuma, lipupwisenu hanga akanuwane kuli iye ni sambukila, kunushi chipeka hanji kapalia.

¹⁵ Nyongenu uhomboloji wa Mwene kupwa ulamwino; nikulita ngwe Paulu nawa, ndumbwetu wa zango, nikulita ni mana aze hanamwehe hanasoneka kuli yenu;

¹⁶ ngwe mu mikanda yenyi yeswe nawa, nikuhanjikamo ha kutwala ku yino yuma; mu yenayo muyili yuma yimwe yikalu kuyinyingika, yize waze kalongolokele ni waze kajikijile kakuhengesa, chizechene ngwe akulinga ku yisoneko yikwo nawa, hanga, akalionwone ayo ene.

¹⁷ Yenu kashika, akwetu a zango, nikunyingika yino yuma shimbu kanda, keyelenu kuchina manutwala ni maliji a kupiangula a yingulungulu, munulimbuka ku kujikiza cha yenwene.

¹⁸ Alioze tatukenu mu vumbi ni yinyingi ya Mwene wetu kanda Chilamwina chetu Yesu Kristu. Uhenya ukapwe kuli iye, ni haliapwila, ni ndo ku miaka ya mutolo. Amene.