2 Petulu 2 - MUKANDA USANDU WA ZAMBI 1975

¹ Alioze kwapwile aprofeta a kwonga nawa hakachi ka atu, chizechene ngwe hakachi kenu nawa kumukukapwa alongeshi a kwonga, ku tenga kumakaneha longeso lia kuhandununa lia kwonwona, nikulikala chipwe Mwata yoze waalanjile, ni kuneha hali ayo ene kwonwona cha susumuku.

² Ni anji kumakakaula yilinga yo ya ujila; mumu hali ayo makashililika jila ya umwenemwene.

³ Ni ku kuzo, ni maliji a ulembekese, makanupwisa yuma ya kusepa nayo: upatwilo wo chize ku shakulu kuushi kushimbula, ni kwonwona cho kuchishi kufungunuka.

⁴ Mumu kachi Zambi kavwilile keke angelo muze avulumwine, aiioze waanyashine mu Tartaru, waakunjikile ku malenge ja milima mukwafunga ndo ku upatwilo.

⁵ Iye kavwilile keke akwa hashi ha shakulu, aiioze wafungile hamwe ni shimbiali akwo, Noe, kanganda ka ululi, muze anehene sanga lia meya hashi hali yitanganyanyi.

⁶ Wajindwolele membo ja Sondome ni Ngomora ku uto, waahishile ni kupupa, se waapwishile chilweza kuli waze menda ni utanganyanyi.

⁷ Wapulwile Lote, mukwa ululi, wamwene lamba ku kwenda cha ujila cha yingulungulu;

⁸ (mumu yoze mukwa ululi se watwamine hakachi ko, nikumona, nikwivwa, Wapinjishile mbunge yenyi ya ululi tangwa ha tangwa ni yitanga yo ya Utanguko).

⁹ Mwene kananyingika kupulula akwa kuwayila ku cheseko, ni kufunga yihenge kushi lia lamba ndo ku tangwa lia upatwilo;

¹⁰ aiioze kuhiana chikolo waze akwenda nikulita ni musunya ni usolo wa luchisa, akulelesa ulemu. Akwa kuhunuka, akwa pami, keshi woma wa kutuka alemu.

¹¹ Alioze angelo, chipwe kanaahiana ni ngolo ni tachi, keshi kwakumisa hi maliji a kutuka kumeso ja Mwene.

¹² Alioze wano ngwe tushitu yipama, akwa chisemewa, kanasemuka akaakwate akaashihe, kanahanjika chipi ha yuma yize kayinyingikine, kumatoka mu kupola cho ene, kumatambula fweto ya uhenge wo.

¹³ Kakuchinyonga chiseke kuhungumuka ni yipi ha mwalwa, yipeka ni tupalia, kanahungumuka mu yongo yo shimbu akuliangana ku yiteleka hamwe ni yenu.

¹⁴ Kali ni meso a tò ni utanji, keshi kuhasa kulitwamina ku shili; nikusongojola atu aze kajikijile; nikupwa ni mbunge ja kulifumba ni kuzo; akwa shingo.

¹⁵ Se hanehuka jila ya kululama, hanapianguka, se hanakaula jila ya Mbalau, mwana Mbeore, yoze wazangile fweto ya uhenge.

¹⁶ Alioze amwámbilile ha Utanguko wenyi mwene: chimbulu kamama wahanjikile ni liji lia mutu, wakanjishile uzaluke wa profeta.

¹⁷ Wano anapu mafuji waze keshi meya, malelwa a kuhungumioka ku kakundukundu: hanaalulikila kulá cha milima.

¹⁸ Mumu nikuhanjika maliji anene a kulivwimba amokomoko, kakusondojola mu usolo wa musunya, ni ujila, waze anambe kwomboka kuli waze akwenda mu maliji a kupiangula.

¹⁹ Kakwalakenya utuswilo, shimbu ayo ene anapu ndungo ja kupola; mumu ku chize makumba mutu, ku chize nawa mamupwisa ndungo.

²⁰ Mumu kachi muze te homboka ku luchisa wa hashi ku chinyingi cha Mwene kanda Chilamwina chetu Yesu Kristu, malimbalimbamo cheka nawa, akaakumbe, muhela wo wa kusula hiwapwa upi Wahiana.

²¹ Mumu hapwa hali ayo kachi kanyingikine jila ya ululi, shina, muze te hayinyingika, kuchinduluka ku liji lisandu lia shimbi lize aakunjikile.

²² Alioze hichinaawane nikulita ni chishima chamwenemwene ngwo, Kawa hanahilukila ku yisaza yenyi mwene; chikwo ngwo, Ngulu wa kusanyisa hanahilukila mukusandumioka mu malowa.