2 Petulu 1 - MUKANDA USANDU WA ZAMBI 1975

¹ Yami Semone Petulu, ndungo kanda postolo wa Yesu Kristu, Kuli waze hanazuku Ufulielo ulemu wa kulita ni uze niwetu, ku ululi wa Zambi yetu kanda Chilamwina Yesu Kristu:

² Vumbi ni sambukila yikalumbame kuli yenu, mu yinyingi ya Zambi ni ya Yesu Mwene wetu.

³ Se tachi jenyi ja Uzambi hijinatwehe chawana yuma yeswe ya kutwala ku mwono ni uwayilo, ku chinyingi cha yoze watutambikile ni uhenya wenyi mwene ni kuhiana chenyi mwene.

⁴ Ku yino hanatwehe yilakenyo yenyi yilemu ni yinene yahiana; hanga ku yino, nukapwe akwa kulianyina ha chisemewa cha Zambi, se hinunapuluka ku kupola chize chili hano hashi ku usolo.

⁵ Ewa, mumu ha mukunda uno wene, Wezenu yenwene kulipupwisa cheswe, ha Ufulielo wenu, Wezenu tachi; ha tachi jenu wezenu yinyingi.

⁶ Ha yinyingi yenu, wezenu kusúla; ha kusúla chenu wezenu kunyongonona; ha kunyongonona chenu wezenu uwayilo;

⁷ ha uwayilo wezenu kufwila cha mandumbu; ha kufwila cha mandumbu wezenu zango.

⁸ Mumu kachi yuma yino yili muli yenu ya kulumbama, kuyakunupwisa hanga kunuchi kulelumioka chipwe kunuchi kuseka ha kutwala ku yinyingi ya Mwene wetu Yesu Kristu.

⁹ Mumu yoze wakuhona yino yuma iye kapuputa, chitalawili, se hanavulama chize amupemesene ku milonga yenyi yikulu.

¹⁰ Kashika, mandumbu, lipupwisenu kukolesa chinyingi cha kwamba ngwenu, Hanatutambika, hanatutongola; mumu kachi munulinga yino yuma kachi kunuchi kalimbuka nilimwe tangwa.

¹¹ Mumu chocho, kumakanwaha unjililo Wahiana mu wanangana wa mutolo wa Mwene wetu kanda Chilamwina Yesu Kristu.

¹² Kashika mungulipupwisa matangwa eswe kunwiwulula yino yuma, chipwe nunayinyingika, nunajikiza mu umwenemwene uze uli hamwe ni yenu.

¹³ Nakuchinyonga chipema, shimbu lieswe mungupwa mu mbalaka yino, kunukasumuna ha kunwiwulula;

¹⁴ se ngunanyingika kuzula cha mbalaka yami muchikapwa kulutwe lia shimbu likepe, chizechene ngwe Mwene wetu Yesu Kristu wangulwezele.

¹⁵ Ewa, mungulipupwisa hanga ha shimbu lieswe kulutwe lia kukatuka chami nukahase kwiwuluka yino yuma.

¹⁶ Mumu kutwakawile yishima ya kutaka ni mana amokomoko, muze twanunyingikishine tachi ni kuheta cha Mwene wetu Yesu Kristu, aiioze twapwile yela ja ulamba wenyi.

¹⁷ Mumu watambwile kuli Zambi mwe Tata ulemu ni uhenya, muze ahanjikile liji lino kuli iye ku uhenya wa ulamba ngwo, Yono mwe Mwanami, ngunamuzange chikolo, muli iye ngunawahilila.

¹⁸ Liji lino yetu twevwile, lia kukatuka mwilu, muze twapwile hamwe nenyi ha mulundu usandu.

¹⁹ Ni yetu, liji lia uprofeto tuli nalio, hanalikolesa kuhiana chikolo; munulinga kanawa nuliononokene ngwe ku ndeya ya kupanguka mu milima, ndo tangwa mulicha, ni mukwa pangu mavumbuka mu mbunge jenu.

²⁰ Nyingikenu chino hatangu, ngwe uprofeto wa chisoneko hi wa ku ulumbunwiso wawo wene ko.

²¹ Mumu uprofeto niumwe kuwejile niumwe mwaka ku upale wa atu: aiioze atu ahanjikile cha kuli Zambi, ni kuhungumuka kuli Spiritu Musandu.