2 Korintu 9 - MUKANDA USANDU WA ZAMBI 1975

¹ Mumu ha kutwala ku uvumbiko hali asandu, kuchangutambile kusoneka kuli yenu:

² mumu ngunanyingika kulipupwisa chenu, chize nakulisamba nacho hali yenu kuli A-Masendoniya, ngwe akwa Akeya hanalulika chize ku mwaka waali; nikulinga chenu cha mbunge yeswe hichinakasumuna anji a kuli ayo.

³ Alioze hingunatumu mandumbu, hanga kulisamba chetu hali yenu kuchichi kapwa chamokomoko ha kutwala ku chino; hanga chizechene ngwe hinamba nukapwe akwa kululika;

⁴ kuchina hanji kachi meza hamwe ni yami A-Masendoniya amwe, manuwana kanda nutulika, yetu matukolesa sonyi ha ukolelo uno, hi yenu ko.

⁵ Nachinyongene ngwe chinatambe kuliumba kuli mandumbu, hanga atetekele kuli yenu, akamanunune shimbukanda, uwape wenu alilakenyene kulu, hanga ukalulike ngwe uwape, hi ngwe lufutu ko.

⁶ Alioze chino ngunambe ngwami, Yoze makuwa mbuto yikepe, makacha nawa mbuto yikepe; ni yoze makuwa yinji, makacha yinji.

⁷ Mutu ni mutu akahane nikulita ngwe hanalisela mu mbunge yenyi: hi ni chinyengo ko, hanji ha kukapwola: mumu Zambi kakuzanga chihanyi wa kusehejela.

⁸ Alioze Zambi kanahase kulumbamisa yawana yeswe ya vumbi kuli yenu; hanga yenu, nukapwe matangwa eswe ni kulumbama cheswe ha yuma yeswe, nukahiane mu milimo yeswe yipema:

⁹ nikulita ngwe chinasonewa ngwo, Iye hanamwanga mwamwa, hanahana kuli yiswale, ululi wenyi kuwalinduluka ndo ku miaka ya mutolo.

¹⁰ Achi, yoze wakumwesa mbuto chikuwa, ni mbolo ha kulia, kumakanumwesa mbuto yenu ya kukuwa, makayokesa, makatatwisa mihuko ya ululi wenu.

¹¹ Manupichisa ha yuma yeswe hanga nukapwe ni kuvungumiona cheswe, chenacho kuchakulinga kuli yetu kusakwila kuli Zambi.

¹² Mumu kuvumbika chino kuchishi kuyukisa asandu ni yize anahono wika, alioze kuchakulumbama nawa ku kusakwila chinji kuli Zambi;

¹³ se ku kweseka cha yenu ku uvumbiko uno, o kakuchichimieka Zambi ha kuzeyela cha kutayiza chenu ku sango lipema lia Kristu, ha kuvungumiona cha kulianyina chenu kuli ayo ni kuli eswe;

¹⁴ shimbu ayo ene nawa nikuliumba hali yenu kakunuvwila usona, mumu ha mukunda wa vumbi liahiana lia Zambi muli yenu.

¹⁵ Tusakwilenu kuli Zambi ha chawana chenyi chize keshi kuhasa kuchambujola.