2 Korintu 7 - MUKANDA USANDU WA ZAMBI 1975

¹ Kashika se yilakenyo yino tuli nayo, akwetu a zango, tulipemesenu ku luchisa mweswe wa musunya ni Spiritu, tukamanunune usandu mu woma wa Zambi.

² Nututambule mu mbunge jenu: kutwalingile chipi kuli niumwe, kutwapihishile niumwe, kutwongele niumwe.

³ Chambile chino kunuhisa: mumu hingunambe kulu ngwami, Yenu nuli mu mbunge jetu tukafwe hamuwika, tukatwame ni mwono hamuwika.

⁴ Hamu liami lia kuhanjika, linene kuli yenu, kulisamba chami chinene ha kutwala kuli yenu; ngunazala tò ni kulembejeka; ngunalumbama kuhiana chikolo mu uwahililo mu luyinda wetu mweswe.

⁵ Mumu chipwe muze twahetele ku Masendoniya, musunya wetu kuwahwimine, alioze twayindamine ku sali ni sali; haze kulitachika, muchima woma.

⁶ Hindu Zambi yoze wakulembejeka akwa kulikehesa, watulembejekele ha kuheta cha Titu;

⁷ kuchapwile ngwe kuheta chenyi wika, alioze nawa ni kulembejeka chize amulembejekele nacho muli yenu, shimbu atwambulwilile usona wenu, ni kunenganyana chenu ni zango lienu lia tachi kuli yami; chocho nawahililile kuhiana.

⁸ Mumu chipwe nanuvwishile chinyengo ni mukanda wami, chishi kuchipihilila: chipwe napihililile (mumu ngunamono mukanda uze wene wanuvwishile chinyengo, chipwe ha shimbu wika).

⁹ Haliapwila ngunawahilila, Chawahililile ngwe anuvwishile chinyengo; alioze anuvwishile chinyengo hanga nukalikonyeke; mumu anuvwishile chinyengo nikulita ni Zambi, hanga kunuchi kafulwa nichimwe kuli yetu.

¹⁰ Mumu chinyengo cha kulita ni Zambi kuchakulinga kulikonyekena ku ulamwino, chize kechi kachipihilila nawa: alioze chinyengo cha hano hashi kuchakulinga kufwa.

¹¹ Mumu chikuma chino chene, cha kunuvwisa chinyengo nikulita ni Zambi, talenu kulipupwisa chipwa haha chalingile muli yenu, ewa, kulisambisa chipwa haha! Ewa, kwivwa kupiha chinene chipwa haha! Ewa, woma upwa haha! Ewa, usona upwa haha! Ewa, tachi ja mbunge jipwa haha! Ewa kulikala chipwa haha! Kweswe hinwasamba ha chuma chino.

¹² Chocho chipwe nasonekene kuli yenu, chasonekene mumu hali yoze walingile chipi, chipwe mumu hali yoze amulingile chipi, alioze hanga kulipupwisa chetu hali yenu chikanulumbunuke kumeso ja Zambi.

¹³ Kashika hanatulembekeja. Mba se hatulembejeka twawahililile kuhiana ha uwahililo wa Titu, mumu Spiritu yenyi ayihwimishine kuli yenu eswe.

¹⁴ Mumu nyi ha chuma chimwe nalisambile kuli iye mumu hali yenu, kangukolesele sonyi; alioze chizechene ngwe twahanjikile yuma yeswe kuli yenu ni umwenemwene, chocho kulisamba chetu nawa achiwanyine kupwa umwenemwene kumeso ja Titu.

¹⁵ Ni kuzanga chenyi kuchalumbama chikolo kuli yenu, shimbu anewuluka kwononoka cha yenu eswe, ngwe ni woma nikuchikima nwamutambwile.

¹⁶ Ngunawahilila mumu ni yuma yeswe ukolelo nguli nawo ha kutwala kuli yenu.