2 Korintu 6 - MUKANDA USANDU WA ZAMBI 1975

¹ Ni yetu nawa, ngwe ngamba-ni-akwenu, tunaliumbu kuli yenu ngwetu, Kanda nutambula vumbi lia Zambi mokomoko.

² (Mumu kanambe ngwenyi, Ha mwaka upema nahalakanyine kuli yena, ha tangwa lia ulamwino nakupulwile: tala, haliapwila we mwaka upema chikolo; tala, haliapwila lie tangwa lia ulamwino:)

³ kanda tusa chitalingiso nichimwe ha chuma nichimwe, kuchina masuma chitela uvumbiko wetu;

⁴ alioze ni yuma yeswe tukasolole chinyingi ngwe tuvumbi twa Zambi, ni uhumikizo wunji, ni luyinda, ni huli, ni kupinda,

⁵ ni mijiji, mu mazuwo ja ususu, mu yizungozungo, ni kukilikita, ni kulawoka kanji, ni zala;

⁶ ni kulinanga, ni yinyingi, ni uhomboloji, ni utu, ni Spiritu Musandu, ni zango lize kulishi ulembekese,

⁷ ku liji lia umwenemwene, ku tachi ja Zambi; ku yitwa ya ululi ku kwoko lia chindume, ni ku chimeso.

⁸ Ha kulemesa ni ha kulelesa, ku lufuma mupema ni lufuma mupi; ngwe akwa kwonga, hindu amwenemwene.

⁹ Ngwe katunyingikineko, hindu kanatunyingika kanawa; ngwe ni kufwa, hindu tuli ni mwono; ngwe anatulambe, hindu katushihileko.

¹⁰ Ngwe akwa yinyengo, hindu nikuwahilila matangwa eswe; ngwe yiswale, hindu nikupwisa anji pichi; ngwe kutushi chuma nichimwe, hindu twapita yuma yeswe.

¹¹ Makanwa jetu kanapakuka kuli yenu, A-Korindu, mbunge jetu jinatoho.

¹² Ukehe wakuhi muli yetu, niumwe, we ukehe uli mu mbunge jenu.

¹³ Achi, ha kukundulula chizechene (ngunahanjika ngwe kuli ana jami), mbunge jenu jikatohe nawa.

¹⁴ Kanda nulilema kanga yimuwika ni waze keshi kufuliela, mumu kulifutula chika ukwete ululi ni ungulungulu? Hanji kuliendela chika likwete pangu ni milima?

¹⁵ Ni kutá chika akwete Kristu ni Mbeliale? Hanji chihanda chika akwete mukwa kufuliela ni yoze keshi kufuliela?

¹⁶ Kutayiza chika yikwete tembele ya Zambi ni mahamba? Mumu yetu tuli tembele ya Zambi ya mwono; nikulita ngwe Zambi wambile ngwenyi, Mungukatwama muli ayo, mungukenda hakachi ko, mungukapwa Zambi yo, o kumakapwa atu jami.

¹⁷ Kashika tuhukenu mukachi ko, lihandununenu kuli ayo, chocho anambe Mwene, kanda nukwata ku chuma cha luchisa; mba mungukanutambula,

¹⁸ mungukapwa kuli yenu Tatenu, yenu munukapwa kuli yami, anami a malunga ni anami a mapwo, chocho anambe Mwene Mukwa-Ndundo-Jeswe.