2 Korintu 5 - MUKANDA USANDU WA ZAMBI 1975

¹ Mumu tunanyingika kachi zuwo lietu lia hano hashi, mbalaka yino, mulijindwoka, zuwo tuli nalio lia kuli Zambi, zuwo kalitungile ni moko, lia mutolo mu malilu:

² mumu chamwenemwene mu zuwo lino twakutwa mikuma, nikuzanga ni usona wunji kuzala zuwo lietu lize liakukatuka mwilu:

³ se nyi chocho twazala kechi katuwana ni uselesele.

⁴ Mumu chamwenemwene, yetu, tuli mu mbalaka yino twakutwa mikuma, mumu tunalemewa; kuchapwile ngwe tunazange kuzula, alioze tunazange kuzala, hanga chize cha kufwa chikajimuke mu mwono.

⁵ Achi, yoze watulingilile chuma chino chene iye Zambi, yoze nawa hanatwehe chifungo cha Spiritu.

⁶ Kashika twakuhamuka matangwa eswe, se tunanyingika shimbu tuli muno mu mujimba, kutushiko ku mahietu hamwe ni Mwene:

⁷ (mumu twakwenda ku Ufulielo, hi ku meso ko);

⁸ twakuhamuka ngwetu, Tunawaha Shinaho kuhichika mujimba, tukapwe ku mahietu hamwe ni Mwene.

⁹ Kashika nawa twakweseka, chipwe ku mahietu, hanji kweka, kupemena chikolo kuli iye.

¹⁰ Mumu chatamba akatusolole eswe kulutwe lia chitwamo cha upatwilo wa Kristu; hanga eswe akatambule yuma yize alingile mu mujimba, nikulita ni chize alingile, chipwe chipema, chipwe chipi.

¹¹ Kashika se tunanyingika woma wa Mwene, twakukununa atu; alioze kanatusolola kuli Zambi; mba ngunatatatata tukalumbunuke ku mbunge jenu.

¹² Mumu kutushi kulisangalisa cheka nawa kuli yenu, alioze tunanwehe chikuma cha kulisamba nacho hali yetu, hanga nukapwe ni chize cha kukumbulula kuli waze akulisamba ku kusoloka cha meso, hi ku mbunge ko.

¹³ Mumu chipwe tunazaluka, chili kuli Zambi; chipwe mutupwa ni mana, mumu hali yenu tuli ni mana.

¹⁴ Mumu zango lia Kristu kuliakutulingisa; mumu chocho tunapatula, ngwetu, Umuwika wafwilile eswe, kashika eswe afwile;

¹⁵ iye wafwilile eswe, hanga waze ali ni mwono, kechi kupwa ni mwono nawa kuli ayo ene, alioze kuli yoze waafwilile mba wahindukile.

¹⁶ Kashika, chize ku haliapwila ndo ku miaka, kutushi kunyingika niumwe nikulita ni musunya: chipwe kachi twanyingikine Kristu nikulita ni musunya, hindu haliapwila kutwamunyingikine chocho nawa.

¹⁷ Kashika kachi umwe mapwa muli Kristu, kachi iye chitanga chaha; yuma yikulu hiyinahu; yuma yeswe yinapu yaha.

¹⁸ Alioze yuma yeswe, ya kuli Zambi, yoze hanatuwanyisa ni iye mwene, ku tachi ja Yesu Kristu, hanatwehe uvumbiko wa uwanyino;

¹⁹ ngwetu, Zambi wapwile muli Kristu nikuwanyisa akwa hashi kuli iye mwene, kaasele milonga yo; iye hatukunjika lie liji lia uwanyino.

²⁰ Kashika yetu tuli tunganda twa Kristu, ngwe Zambi kanaliumbu ku liji lietu: tunahanjikila Kristu nikuliumba ngwetu, Wanenu ni Zambi.

²¹ Yoze kanyingikineko shili, amupwishile shili mumu hali yetu; hanga tukapwe ululi wa Zambi muli iye.