2 Korintu 4 - MUKANDA USANDU WA ZAMBI 1975

¹ Kashika se uvumbiko uno tuli nawo, nikulita ni keke yino hitunawane, kutushi kulezumioka:

² alioze hitunalituna yuma ya kuhengama ya sonyi; kutwendele ni kalimbavuli, chipwe kutwalongesele liji lia Zambi ni kalimbalimba; alioze ha kwambulula umwenemwene, twakusoloka kanawa ku mbunge ya atu eswe kumeso ja Zambi.

³ Nyi kachi sango lietu linafukiwa, linafukiwa kuli waze anatoko:

⁴ muli ayo zambi ya mwakono hanapupuchisa manyonga ja waze keshi kufuliela, hanga kupanguka cha sango lipema lia uhenya wa Kristu, Mwenawo che kulifwa cha Zambi, kuchichi kapanguka hali ayo.

⁵ Mumu kutushi kuliambujola yetwene, alioze Kristu Yesu mwe Mwene, ni yetwene ndungo jenu mumu hali Yesu.

⁶ Mumu iye Zambi, yoze wambile ngwenyi, Pangu lipanguke mu milima, mwenawo hanapanguka mu mbunge jetu, mukutwaha kupanguka cha chinyingi cha uhenya wa Zambi kumeso ja Yesu Kristu.

⁷ Alioze upite uno tuli nawo mu yikwachilo ya uma, hanga kuhiana cha tachi chikapwe cha kuli Zambi, hi cha kuli yetwene ko.

⁸ Kakutushinda chikolo ku malumbu eswe, hindu kutushi kushinana; twakukakashana, hindu kutushi kwecha kutalatala;

⁹ kakutuhungumiona, hindu keshi kutwehuka; twakulambama hashi, hindu keshi kutwonwona;

¹⁰ matangwa eswe twakumbata mu mujimba kufwa cha Yesu, hanga mwono nawa wa Yesu ukasoloke mu mujimba wetu.

¹¹ Mumu shimbu tuli ni mwono, kakutukunjika ku kufwa matangwa eswe mumu hali Yesu, hanga nwono nawa wa Yesu ukasoloke mu musunya wetu wa kufwa.

¹² Chocho kufwa kuchakulinga muli yetu, alioze mwono kuwakulinga muli yenu.

¹³ Alioze se tuli ni Spiritu yimuwika ya Ufulielo, nikulita ni chize chinasonewa, ngwo, Nafulielele, kashika nahanjikile; ni yetu nawa kutwafuliela kashika twakuhanjika;

¹⁴ tunanyingika yoze wahindwishile Mwene Yesu Kristu, makatuhindwisa yetu nawa hamwe ni Yesu, kumakatuhetesa kumeso jenyi hamwe ni yenu.

¹⁵ Mumu yuma yeswe yinapu mumu hali yenu, hanga lie vumbi nikwoka kuli anji, likalumbamise kusakwila ha uhenya wa Zambi.

¹⁶ Kashika kutushi kulezumioka; alioze kachi chamwenemwene mutu wetu wa haze mapola, hindu kakupwisa mutu wa muchima mwaha tangwa ha tangwa.

¹⁷ Mumu luyinda wetu mulelu, wa kashimbu kano kakepekepe, kakulinga hali yetu kulumbama chahiana cha uhenya wa mutolo;

¹⁸ shimbu kutushi kutala ha yuma yize yakumoneka, alioze ha yuma yize kuyamonekene: mumu yuma yize yakumoneka, ya shimbu wika, alioze yize kuyamonekene, ya mutolo.