2 Korintu 2 - MUKANDA USANDU WA ZAMBI 1975

¹ Alioze napatwile chino hali yami mwene, ngwami, Chichi keza cheka nawa kuli yenu ni chinyengo.

² Mumu kachi mungunuvwisa chinyengo, iya kevwe yoze manguvwisa chiseke, shina yoze namuvwishile chinyengo yami?

³ Nasonekene chino chene, kuchina, muze mungwiza, manguvwisa chinyengo kuli waze chaatamba kunguvwisa kuwahilila; mba nikulikolela kuli yenu eswe ngwami, Uwahililo wami we uwahililo wa yenu eswe.

⁴ Mumu mu luyinda munji ni kupinda cha mbunge, nasonekene kuli yenu ni masoji anji; chazangile nukevwe chinyengo, alioze hanga nukanyingike zango lize lia kulumbama nakunuzanga nalio.

⁵ Alioze kachi umwe hanevwisa chinyengo, hanevwisa chinyengo hi yami ko, alioze yenu eswe hamwe hakehe (hanga chichi kulemena kuhiana naye).

⁶ Kunahu kuli umwe ngwe yono upatwilo uno amuhelewo kuli anji;

⁷ chocho Shinaho, Chanutamba kumukonekena ni kumulembejeka, kuchina hanji umwe ngwe yono mamushata ni yinyengo yinji naye.

⁸ Kashika ngunaliumbu kuli yenu, nukakolese zango lienu kuli iye.

⁹ Mumu ha chino nawa nasonekene, hanga ngukanyingike, ha kunweseka, kachi nwakwononoka ha yuma yeswe.

¹⁰ Alioze yoze munumukonekena chuma chimwe, ni yami nawa mungumukonekena; mumu chize yami nawa hingunakonekena, kachi hingunamukonekenacho, hichapwa hali yenu, kumeso ja Kristu;

¹¹ hanga Satana kechi kutuhepwisa; mumu kutwalajalile ha yitaka yenyi.

¹² Achi, muze nahetele ku Troa mukwambujola sango lipema lia Kristu, muze angwazulwilile pito muli Mwene,

¹³ chapwile ni uhwimino mu spiritu yami, mumu chawanyine ndumbwami Titu: alioze nikushika no, nakatukile, ngukaye ku Masendoniya.

¹⁴ Alioze tusakwilenu kuli Zambi, yoze wakututwala funge mu kukumba cha Kristu, wakusolola ku mwono wetu vumba lia chinyingi cha iye muma mweswe.

¹⁵ Mumu tuli lupembo mupema wa Kristu kuli Zambi muli waze anaalamwina, ni muli waze anatoko;

¹⁶ kuli amwe vumba lia kufwa ndo ku kufwa; alioze kuli akwo vumba lia mwono ndo ku mwono. Yino yuma iya mayihasa?

¹⁷ Mumu yetu kutwapwile ngwe anji, nikusepa liji lia Zambi: alioze ngwe akwa kutuwika ku mbunge, alioze ngwe a kuli Zambi, kumeso ja Zambi, twakuhanjika muli Kristu.