2 Korintu 12 - MUKANDA USANDU WA ZAMBI 1975

¹ Changutamba kulisamba wate, chipwe kuchatele; alioze mungwiza ku yimona ni usolwelo wa Mwene.

² Ngunanyingika mutu muli Kristu, kumi lia miaka ni miaka yiwana kunyima, (shina mu mujimba Chanyingikine: shina haze lia mujimba Chanyingikine, Zambi kananyingika), umwe ngwe yono amupindumwine ndo mwilu mwamuchitatu.

³ Ngunanyingika mutu umwe (shina mu mujimba shina keshi mujimba Chanyingikine, Zambi kananyingika),

⁴ ngwe chize amupindumwine mwilu mu Paraisu, kuze evwile maliji aze kahashile kwahanjika atu, eno katayijile kuli atu kwahanjika.

⁵ Hali umwe ngwe yono mungulisamba; alioze hali yami mwene chichi kalisamba, shina ha ulelu wami.

⁶ Mumu kachi munguzanga kulisamba, chichi kapwa Chizuzuke; mumu ngunahanjika umwenemwene; alioze ngunalihumikiza kuchina umwe mangushinginyeka kupwa kuhiana chize mangumona kupwa, hanji chize mangwivwa kupwa.

⁷ Ni ha mukunda wa unene wahiana wa usolwelo, kuchina mungulinangamisa kuhiana naye, anguhele mutuwi mu mujimba, kanganda ka Satana, hanga akangumbufule, kuchina mungulinangamisa kuhiana naye.

⁸ Ha chuma chino naliumbile kuli Mwene katatu, hanga chikatuke kuli yami.

⁹ Iye wambile kuli yami ngwenyi, Vumbi liami linate hali yena; mumu tachi jami kakujipwisa jingunu mu ulelu. Ni kuwaha chahiana kashika mungulisamba Shinaho ha ulelu wami, hanga tachi ja Kristu jikatwame hali yami.

¹⁰ Kashika nakuwaha ni ulelu, ni sau, ni huli, ni yihungumiona, ni kupinda, mumu hali Kristu: mumu muze mungulela, hohene mungupwa ni tachi.

¹¹ Ngunapu Chizuzuke, nyi? Yenu nwachilinga; mumu chatamba kachi yenu munungusangalisa: mumu chasalile kunyima lia waze apostolo ahiana, nichimwe, chipwe nguli wamokomoko.

¹² Chamwenemwene twalingile yilayi ya upostolo hakachi kenu, ni utunu weswe, ni yilayi, ni yipekesa, ni yipupu.

¹³ Mumu neka nunasala kunyima yikungulwila yikwo, shina mu chino, yami chanulemenene? Ngukonekenenu kama chipi chino.

¹⁴ Talenu, chino chisuho chamuchitatu ngunalulika kwiza kuli yenu; chichi kanulemena: mumu chishi kufupa niyenu, alioze yenwene ngunafupu: mumu kuchatambile ana kutulikila hali yisemi jo, alioze chatamba yisemi kutulikila hali ana.

¹⁵ Ni kuwaha chahiana mungwecha yuma yami, ewa munguliecha yami mwene hali yenu. Kachi mungunuzanga kuhiana nawa, kachi mununguzanga chikepe nawa, nyi?

¹⁶ Alioze chikapwe chocho, chanulemenene, alioze nikupwa ni kalimbavuli ngwo, Nanukwachile ni kalimbalimba.

¹⁷ Nanwongele kuli umwe wa waze naatumine kuli yenu, nyi?

¹⁸ Naliumbile kuli Titu; natumine ndumbu hamwe nenyi. Titu wanwongele chimwe, nyi? Kutwendeleko ni spiritu yimuwika, nyi? Kutwendeleko mu ngano jimuwika, nyi?

¹⁹ Nunashinginyeka shimbu lino lieswe ngwe tunalisambisa kuli yenu, nyi? Tunahanjika kumeso ja Zambi muli Kristu: alioze yuma yeswe tunalingi kuli yenu, akwetu a Zango, tunayilingi hanga tukanukolese.

²⁰ Mumu ngunevu woma kuchina hanji muze mungwiza mungunuwana ngwe chize chazangile, ni yami mwene mununguwana ngwe chize yenu kunwazangile; kuchina hanji mukukapwa vunda, ni ukwa, ni ufwatulo, ni kulimanangana, ni kakowelo, ni kalundanganyishi, ni kulifuza ni yizungozungo.

²¹ Kuchina cheka nawa muze mungwiza, Zambi yami mangulelesa kumeso jenu, mungunenganyana hali anji a kuli waze hanavulumuna kunyima, ngwe kalikonyekeneko ha luchisa ni utanji ni upangala uze alingile.