2 Korintu 11 - MUKANDA USANDU WA ZAMBI 1975

¹ Ngunazange nuhase kulihumikiza ni yami ni uzuzuke ukepe; alioze chamwenemwene nwakulihumikiza.

² Mumu ngunanuvwila ukwa umwe wa kuli Zambi: mumu nanulakenyene kuli lunga umuwika hanga ngukanutumbikile kuli Kristu ngwe *virgem wa kulinanga.

³ Alioze ngunevu woma, kuchina ku chuma chimwe, chizechene ngwe kapela wongele Eva ni kalimbavuli kenyi, chocho mapihisa manyonga jenu ku kutuwika cha mbunge ni kulinanga chize chili kuli Kristu.

⁴ Mumu kachi yoze meza, mambujola umwe Yesu mukwo, yoze yetu kutwamwambujolele, hanji munutambula Spiritu yeka, yoze kunwamutambwile, hanji sango lipema lieka, lize kunwatambwile, munulinga kanawa kulihumikiza, kumanyi

⁵ Mumu ngunashinginyeka yami mwene chasalile kunyima nichimwe ha kutwala kuli waze apostolo ahiana.

⁶ Alioze kachi nguli chikukumi ha kuhanjika hindu hi ha yinyingi ko. Alioze mu majila eswe hitunasolola chino kuli yenu ni yuma yeswe.

⁷ Hanji navulumwine mulonga, nyi? Mumu nalilelesele hanga akanunangamise, mumu nambujolele sango lipema lia Kristu chawana, nyi?

⁸ Nahupile yikungulwila yikwo, nikutambula fweto kuli ayo, hanga ngukanuvumbike;

⁹ muze napwile hamwe ni yenu, nahonene, chalemenene niumwe; mumu mandumbu, muze ejilile ku Masendoniya, anguhele chize nahonene; ni yuma yeswe nalifungile hanga chishi kunulemena, chocho mungukalifunga.

¹⁰ Nikulita ngwe umwenemwene wa Kristu uli muli yami, niumwe kechi kanguholesa ha kulisamba chino mu yifuchi ya Akeya.

¹¹ Kuchi te? Mumu chishi kunuzanga, nyi? Zambi kananyingika.

¹² Alioze chize nakulinga, chizechene mungukachilinga hanga ngukajike jila ya waze akuzanga kulisamba; hanga muze akulisamba, akaawane chizechene ngwe yetu.

¹³ Mumu wano kanapu apostolo ja mahuza, akwa kulinga tulimbalimba, nikulihipula ngwe apostolo ja Kristu.

¹⁴ Achi kuchatushimine, mumu chipwe Satana kakulihipula ngwe mungelo wa pangu.

¹⁵ Kashika hi chuma chinene ko kachi tuvumbi twenyi nawa malihipula ngwe tuvumbi twa ululi; songo lio kumulikapwa nikulita ni yitanga yo.

¹⁶ Ngunambe cheka nawa ngwami, Niumwe kanda akangumona ngwe nguli Chizuzuke; alioze kachi nunangumono chocho, hindu ngutambulenu ngwe Chizuzuke, hanga yami nawa ngukahase kulisamba chimwe chikepe.

¹⁷ Chize ngunahanjika, chishi kuhanjika nikulita ni Mwene, alioze ngwe ni uzuzuke, ni ukolelo uno wa kulisamba.

¹⁸ Se anji kakulisamba nikulita ni musunya, ni yami nawa mungulisamba.

¹⁹ Mumu yizuzuke nwakwatayiza ni chiseke mu ukanyame wenu.

²⁰ Mumu munutayiza mutu kachi manutwala ku undungo, kachi manuumbula, kachi manwonga, kachi malinangamisa kachi manulamba ku meso.

²¹ Ngunahanjika ngwe kulisaula, ngwe, twapwile alelu. Hindu mweswamo umwe mahamuka (ngunahanjika ni uzuzuke), yami nawa ngunahamuka.

²² O A-Hepreu, nyi? Yami nawa. O A-Izalele, nyi? Yami nawa. O munyachi wa Apalahama, nyi? Yami nawa.

²³ O tuvumbi twa Kristu, nyi? (Ngunahanjika ngwe ngunazaluka) yami nahianaho; nikukilikita kuhiana chikolo, mu mazuwo ja ususu kuhiana chikolo, ni mijiji yahiana naye, ni kufwa kanji.

²⁴ Kuli A-Yunda natambwile katano makumi awana a mijiji kuhona umuwika.

²⁵ Katatu angulambile ni shikote; kamuwika angwashile mawe; katatu nalilamwinyine muze wato te muushimbama; ufuku ni mwalwa napwile mu kalunga-lwiji.

²⁶ Mu mawenyi kanji, ni Utoji wa mu njiji, ni Utoji wa mihuza; ni Utoji kuli akwa munyachi wami; ni Utoji kuli akwa mavungu: ni Utoji mu membo; ni Utoji mu puya; ni Utoji ha kalungalwiji; ni Utoji hakachi ka mandumbu a kwonga;

²⁷ nikukilikita nikuhondangana, nikulawoka kanji; ni zala ni pwila, nikulitwamina kulia kanji; ni chishika ni uvu.

²⁸ Ni kuweza ku yuma yize yili haze, kuchili chize chakungushata tangwa ha tangwa, che kulema cha yikungulwila yeswe.

²⁹ Iya malela, ni yami chishi kulela? Iya mamutalingisa, ni yami chishi kufuluka?

³⁰ Kachi changutamba kulisamba, mungukalisamba mu yuma yize ya kutwala ku ulelu wami.

³¹ Zambi kanda Tato ya Mwene Yesu Kristu, yoze wafumuna ndo ku miaka ya mutolo, kananyingika chishi kuhanjika mahuza.

³² Mu Ndamaseku, nguvulu wa kuyula kushi lia mwanangana Areta, wafungile limbo lia A-Ndamaseku, hanga akangukwate.

³³ Ndusu mu kapenda mu chiseke anguhulumwishine ku chipanga, mba naputukile ku moko jenyi.