2 Korintu 10 - MUKANDA USANDU WA ZAMBI 1975

¹ Achi, yami mwene Paulu, ngunaliumbu kuli yenu ku kushimbika ni ku umbovu wa Kristu, yami kumeso jenu nguli mukwa kulikehesa hakachi kenu, alioze muze chishiko ngunahamuka kuli yenu.

² Ewa, ngunaliumbu kuli yenu, hanga muze mungupwa hamwe ni yenu chichi kahamuka ni Ufulielo uze ngunashinginyeka kuhamuka nawo kuli amwe, waze akutumona ngwe twakwenda nikulita ni musunya.

³ Mumu chipwe twakwenda mu musunya, kutushi kwasa jita nikulita ni musunya.

⁴ (Mumu yitwa yetu ya jita hi ya musunya ko, alioze ya tachi nikulita ni Zambi ya kupupa yuma ya tachi;)

⁵ twakupupa malinjekela ni yuma yeswe ya kwilu, yize yakulinangamisa kulimika ni chinyingi cha Zambi, twakutwala manyonga eswe ku ufunge akononoke kuli Kristu;

⁶ tunazange kukala uhulia weswe muze kwononoka chenu muchimanunuka.

⁷ Yenu nwakutala yuma yili kulutwe lia meso jenu. Kachi umwe malikolela ngwenyi, Yami wa Kristu, ashinginyeke chino cheka nawa ni muli iye mwene, chizechene ngwe iye wa Kristu, chocho nawa yetu tuli a Kristu.

⁸ Mumu chipwe mungulisamba chimwe chahiana ha kutwala ku chiyulo chetu (chize hanatwehe Mwene mukunukolesa, hi mukunulimbwisa ko), kechi hangukolesa sonyi:

⁹ hanga chichi kupwa ngwe mungunuvwisa woma chikolo ku mikanda yami.

¹⁰ Mumu kanambe ngwo, Mikanda yenyi yilemu, ya tachi; alioze iye mwene mu mujimba mulelu, ni kuhanjika chenyi chamokomoko.

¹¹ Umwe ngwe yono ashinginyeke chino, cheswacho tuli ni liji lia mu mikanda muze kutushiko, chizechene nawa twapwa ni yilinga muze mutupwa hamwe ni yenu.

¹² Mumu kutushi kuhamuka kulialula hanji kulipalakenya ni amwe a kuli waze akulisangalisa: alioze ayo ene nikulieseka ene ni ene, nikulipalakenya ene ni ene keshi malinjekela.

¹³ Alioze kutuchi kalisamba kuhiana cheseko chetu, alioze nikulita ni cheseko cha njiza, yize hanatwanyina Zambi, ngwe cheseko cha kuheta ndo kuli yenu.

¹⁴ Mumu kutushi kuzoza kuhiana naye, ngwe kachi kutwahetele ndo kuli yenu ni sango lipema lia Kristu:

¹⁵ kutushi kulisamba kuhiana naye, ngwe mutunjila mu kukilikita cha mukwo, ka; alioze twakutalatala, ngwe mu kutatuka cha Ufulielo wenu, mutukatoha hakachi kenu nikulita ni njiza yetu ndo ku kuhiana nawa.

¹⁶ Hanga tukambujole sango lipema kuze kanda lia yenu, hi nikulisamba ko ha njiza ya mbala ayilulikile kulu.

¹⁷ Alioze yoze malisamba akalisambe muli Mwene.

¹⁸ Mumu hi yoze ko malisangalisa mamusela Shindakenyo yipema, alioze yoze Mwene mamusangalisa.