2 Korintu 1 - MUKANDA USANDU WA ZAMBI 1975

¹ Yetu, Paulu postolo wa Yesu Kristu ku upale wa Zambi, ni ndumbu Timoteu, Ku chikungulwila cha Zambi chize chili ku Korindu, hamwe ni asandu waze eswe ali mu chifuchi cha Akeya:

² Vumbi kuli yenu ni sambukila ya kuli Zambi Tata ni Mwene Yesu Kristu.

³ Zambi kanda Tato ya Mwene wetu Yesu Kristu akafumane, Tato ya keke, kanda Zambi ya kulembejeka cheswe;

⁴ yoze wakutulembejeka mu luyinda wetu mweswe, hanga tukahase kulembejeka waze mapwa mu luyinda umwe, ni kulembejeka chize yetwene kakutulembejeka nacho kuli Zambi.

⁵ Mumu chizechene ngwe lamba lia Kristu kuliakulumbama kuli yetu, chocho kulembejeka chetu nawa kuchakulumbama ku tachi ja Kristu.

⁶ Alioze chipwe mutupwa mu luyinda, muchipwa ha kulembejeka chenu ni ulamwino wenu; chipwe matulembejeka, muchipwa ha kunulembejeka, chenacho kuchakulinga utunu mu lamba limuwika ni lize yetu nawa twakwivwa.

⁷ Ni kutalatala chetu hali yenu kuchakola; se tunanyingika, chizechene ngwe nuli akwa kulianyina ha lamba, chocho nawa nuli akwa kulianyina ha kulembejeka chetu.

⁸ Mumu tunazange nunyingike, mandumbu, ha kutwala ku luyinda wetu yoze watuwanyine mu Eshia, ngwe twalemewene kuhiana naye tachi jetu, chocho twanyongene himutufwa.

⁹ Ewa, twapwile ni upatwilo wa kufwa muli yetwene, kanda tulifuliela yetwene, alioze tukafuliele Zambi yoze wakuhindwisa afu:

¹⁰ yoze watupulwile ku kufwa chipwa haha, ewa kumakapulula; hali iye hitunase kutalatala chetu ngwetu, Hindu kumakatupulula;

¹¹ ni yenu nawa nikulikwasa hamwe ni yetu ha kuliumba chenu; hanga ha chawana cha vumbi chize atuhelecho mumu ha mukunda wa anji, atu anji akasakwile mumu hali yetu.

¹² Mumu kulisamba chetu chino ngwetu, Shindakenyo ya mbunge jetu, ngwe ni usandu ni kutuwika cha mbunge kumeso ja Zambi, hi ni mana ja musunya ko alioze ni vumbi lia Zambi, hitunende hano hashi, ni kuhiana kuli yenu.

¹³ Mumu kutushi kusoneka yuma yikwo kuli yenu, shina yize nwatangile hatangu, ewa, yize nunatayiza, ngunatalatala ngwami, Munukatayiza ndo ku songo:

¹⁴ chizechene nawa ngwe nwaatayijile hakehe, ngwe yetu tunapu kulisamba chenu, chizechene ngwe yenu nawa nunapu kulisamba chetu ha tangwa lia Mwene wetu Yesu.

¹⁵ Mumu ha ukolelo uno nambile kwiza kuli yenu kulu, hanga nukapwe ni uwape wamuchiali;

¹⁶ mba kuli yenu ngupalikile ndusu ku Masendoniya, ngukatuke cheka nawa ku Masendoniya nikwiza kuli yenu, hanga nukangushinjikile ha wenyi wami ku Yundeya.

¹⁷ Kashika muze nahalile chocho, nalingile ni lwelia, nyi? Hanji yuma yize mungupala, munguyipala nikulita ni musunya, hanga kuli yami yikapwe ewa, ewa, ni ka, ka, nyi?

¹⁸ Alioze ni umwenemwene wa Zambi, liji lietu kuli yenu kulishi kupwa ewa ni ka.

¹⁹ Mumu mwe Mwana Zambi, Yesu Kristu, yoze twamwambujolele hakachi kenu, (teyami ni Selvwanu, ni Timoteu,) kapwile ewa ni ka, alioze muli iye ewa.

²⁰ Mumu yilakenyo yeswe ya Zambi cheswacho muyipwa, muli iye hiyapwa ewa, muli iye nawa hiyapwa Amene, hanga kuli yetu uhenya ukapwe kuli Zambi.

²¹ Achi, yoze wakutukolesa hamwe ni yenu muli Kristu, nikutuwayisa, iye Zambi:

²² iye watujikile ni Chijikilo chenyi, watuhele chifungo cha Spiritu mu mbunge jetu.

²³ Alioze Zambi akapwe chela ha mbunge yami, ngwe ha kunuvwila keke chejile ku Korindu.

²⁴ Kuchapwile ngwe twakuyula Ufulielo wenu, alioze tuli yikwashi ya uwahililo wenu: mumu ku Ufulielo nunamana.