2 A-TESALONIKA 3 - MUKANDA USANDU WA ZAMBI 1975

¹ Ha kusula, mandumbu, lembenu hali yetu, hanga liji lia Mwene likatambuke, likafumane, chizechene ngwe hakachi kenu;

² hanga tukapuluke kuli yihepuke ni yingulungulu; mumu hi eswe ko ali ni Ufulielo.

³ Alioze Mwene wamwenemwene, mwenawo kumakanujikijisa, makanufunga ku yipi.

⁴ Tunalikolela kuli Mwene ha kutwala kuli yenu, ngwetu, Nwakulinga, hindu munukalinga yuma yize tunanwambe.

⁵ Mwene akatondekeze kama mbunge jenu ku zango lia Zambi, ni ku uhumikizo wa Kristu.

⁶ Achi, shimbi tunanwehe, mandumbu, mu jina lia Mwene wetu Yesu Kristu, ngwetu, Nukalihandunune kuli ndumbu mweswe menda ni kulumbuka, keshi kwenda nikulita ni ndongo yize nwatambwile kuli yetu.

⁷ Mumu nunanyingika yenwene ngwe chize Chanutamba kutwimbulula; mumu kutwendele ni kulumbuka hakachi kenu;

⁸ chipwe kutwahle mbolo chawana kuli niumwe, alioze nikukilikita nikuhondangana, twalingile ufuku ni mwalwa, hanga kutuchi kalemena niumwe hakachi kenu.

⁹ Kuchapwile ngwe kutushi chiyulo, alioze hanga tukalisele chilweza kuli yenu, hanga nukatwimbulule.

¹⁰ Mumu chipwe muze twapwile hamwe ni yenu, chino twanwambile, ngwetu, Nyi umwe kazangile kulinga milimo, kanda alia.

¹¹ Mumu tunevu ngwo, Kwali amwe anende hakachi kenu ni kulumbuka, waze keshi kulinga milimo niyimwe, alioze kapwa akwa kalundanganyishi.

¹² Achi wano, shimbi tunaahe, tunaashinjila muli Mwene Yesu Kristu, akahole, akalinge milimo, akalie mbolo yo ene.

¹³ Alioze yenu, mandumbu, kanda nulezumuka ha kulinga kanawa.

¹⁴ Nyi kachi umwe keshi kwononoka ku liji lietu ku mukanda uno, nukamuse chinyingi, kanda nukaliendela nenyi, hanga akevwe sonyi.

¹⁵ Hindu kanda numunyonga ngwe mukwa kole, alioze nukamukanyamise ngwe ndumbu.

¹⁶ Haliapwila Mwene wa sambukila iye mwene akanwehe sambukila matangwa eswe mu majila eswe. Mwene apwe hamwe ni yenu eswe.

¹⁷ Kumeneka cha yami Paulu, ni kwoko lia yami mwene, chenacho chinyingi mu mitonda yeswe, chocho nakusoneka.

¹⁸ Vumbi lia Mwene wetu Yesu Kristu lipwe hamwe ni yenu eswe.