2 A-TESALONIKA 1 - MUKANDA USANDU WA ZAMBI 1975

¹ Yetu, Paulu, ni Selevwanu, ni Timoteu, Ku chikungulwila cha A-Tesalonika muli Zambi Tata yetu ni Mwene Yesu Kristu:

² Vumbi kuli yenu, ni sambukila ya kuli Zambi Tata yetu ni Mwene Yesu Kristu.

³ Chatutamba kusakwila kuli Zambi matangwa eswe hali yenu, mandumbu, ngwe chinalite, mumu Ufulielo wenu kuwakutatuka kuhiana, ni zango umwe kuli mukwo ni mukwo hakachi ka yenu eswe kuliakuiumbama.

⁴ Chocho yetwene twakulisamba hali yenu mu yikungulwila ya Zambi, ha utunu wenu ni Ufulielo mu yihungumiona yenu yeswe ni mu luyinda yoze nwakulihumikiza nenyi.

⁵ Chenacho chinyingi pundu cha upatwilo wa ululi wa Zambi, hanga akanunyonge akwa kutela wanangana wa Zambi, uze nwakuvwila lamba;

⁶ se chapwa chuma cha ululi kuli Zambi kufweta luyinda kuli waze akunupinjisa;

⁷ ni kuli yenu, kananupinjisa, munukahwima hamwe ni yetu, ha usolwelo wa Mwene Yesu mwilu hamwe ni angelo ja tachi jenyi,

⁸ mu kahia ka kulekwoka, akakale milonga ya waze kanyingikine Zambi, ni waze keshi kwononoka ku sango lipema lia Mwene wetu Yesu.

⁹ Kumakaafwetesa ha milonga yo, kwenyeka cha mutolo muma mwa kuhandunuka kumeso ja Mwene, ni ku uhenya wa ngolo jenyi;

¹⁰ muze meza ha tangwa lize, hanga akamuchichimieke muli asandu jenyi, hanga akamukomoke muli waze eswe akwa kufuliela, mumu nwafulielele Shindakenyo yetu kuli yenu.

¹¹ Kashika twakunulembela matangwa eswe, Zambi yetu akanumone akwa kutela kutambika chenyi, hanga akamanunune kuwaha cheswe cha upeme, ni yitanga yeswe ya Ufulielo, ni tachi;

¹² hanga akachichimieke jina lia Mwene wetu Yesu muli yenu, ni yenu muli iye, nikulita ni vumbi lia Zambi yetu ni lia Mwene Yesu Kristu.