1 Yoano 5 - MUKANDA USANDU WA ZAMBI 1975

¹ Mweswawo mafuliela ngwenyi, Yesu iye mwe Kristu, kanasemuka kuli Zambi; ni mweswe mazanga yoze wasemene, mazanga nawa yoze wasemuka kuli iye.

² Ku chino tunanyingika tunazange ana a Zambi, muze tunazange Zambi, ni muze tunafungu shimbi jenyi.

³ Mumu lino lie zango lia Zambi, ngwo, Tukafunge shimbi jenyi: ni shimbi jenyi hi jikalu ko.

⁴ Mumu mweswawo masemuka kuli Zambi, makumba hashi: ni chino che kukumba chize hichinakumbu hashi, te Ufulielo wetu.

⁵ Iya yoze makumba ya hano hashi shina yoze mafuliela ngwenyi, Yesu iye mwe Mwana Zambi?

⁶ Yoze wejile ku meya ni manyinga, iye Yesu Kristu; hi ku meya wika ko, aiioze ku meya ni ku manyinga.

⁷ Yoze wakushindakenya iye mwe Spiritu, mumu Spiritu iye umwenemwene.

⁸ Mumu waze akushindakenya atatu: mwe Spiritu, ni e meya, ni e manyinga: ni wano atatu kakulikunda muli umuwika.

⁹ Kachi tunatambula Shindakenyo ya atu, kachi Shindakenyo ya Zambi yinene yahiana: mumu Shindakenyo ya Zambi yino, hanashindakenya ha kutwala kuli Mwanenyi.

¹⁰ Yoze mafuliela kuli mwe Mwana Zambi kali ni Shindakenyo muli iye mwene: yoze keshi kufuliela Zambi hanamupwisa mukwa mahuza; mumu kafulieleleko ku Shindakenyo yize hanashindakenya Zambi ha kutwala kuli Mwanenyi.

¹¹ Ni yino ye Shindakenyo ngwo, Zambi hanatwehe mwono wa mutolo; ni mwono uno uli muli Mwanenyi.

¹² Yoze uli ni mwe Mwana kali ni mwono; yoze keshi ni mwe Mwana Zambi mwono keshi nawo.

¹³ Yino yuma hinasoneka kuli yenu hanga nukanyingike mwono wa mutolo nuli nawo, yenu nwakufuliela ku jina lia mwe Mwana Zambi.

¹⁴ Ni lino lie hamu tuli nalio kuli iye, kachi mutwita chuma chimwe cha kulita ni upale wenyi, kachi matwivwa.

¹⁵ Nyi kachi tunanyingika matwivwa cheswacho mutwita, kachi tunanyingika hitwatambula chize hitunamwichi.

¹⁶ Kachi umwe mamona ndumbwenyi kanavulumuna mulonga, hi wa kufwa ko, kachi akete, iye makamwaha mwono hali waze keshi kuvulumuna mulonga wa kufwa. Kuuli mulonga wa kufwa; chambile nukalembele uno.

¹⁷ Uhenge weswe shili, aiioze kuuli mulonga hi wa kufwa ko.

¹⁸ Tunanyingika ngwetu, Mweswawo wasemuka kuli Zambi keshi kuvulumiona; aiioze yoze wasemuka kuli Zambi kakulifunga mwene, ni mwe chingulungulu keshi kumukwata.

¹⁹ Tunanyingika yetu tuli a kuli Zambi, ni hashi heswe lukombo kuhakupomba mu chiyulo cha mwe chingulungulu.

²⁰ Tunanyingika mwe Mwana Zambi haneza, iye hanatwehe malinjekela, hanga tukanyingike yoze wamwenemwene; te muli Mwanenyi Yesu Kristu, iye mwe Zambi wamwenemwene ni we mwono wa mutolo.

²¹ Ana akepe, lifungenu ku mahamba. Amene.