1 Yoano 4 - MUKANDA USANDU WA ZAMBI 1975

¹ Akwetu a zango, kanda nufuliela maspiritu eswe, aiioze esekenu maspiritu, kachi mapwa maspiritu a kuli Zambi; mumu aprofeta a kwonga anji haneza hano hashi.

² Ku chino nunanyingika Spiritu ya Zambi: Spiritu mweswawo matayiza ngwo, Yesu Kristu haneza mu musunya, iye wa kuli Zambi.

³ Ni Spiritu mweswawo keshi kutayiza ngwo, Yesu Kristu haneza mu musunya, hi wa kuli Zambi ko: iye Spiritu ya mukwa kulimika ni Kristu, yoze nwevwile ngwo, Kumeza; ni haliapwila hwali hano hashi kulu.

⁴ Yenu nuli a kuli Zambi, ana akepe, hinunaakumbu; mumu yoze uli muli yenu iye munene Wahiana yoze uli hano hashi.

⁵ O akwa hashi: kashika kakuhanjika ya hano hashi, ni akwa hashi kakwevwa.

⁶ Yetu tuli a kuli Zambi: yoze wakunyingika Zambi kakutwivwa; yoze hi wa kuli Zambi ko keshi kutwivwa. Ku chino tunanyingika Spiritu ya umwenemwene, ni Spiritu ya kupiangula.

⁷ Akwetu a zango, tulizangenu umwe ni mukwo ni mukwo: mumu zango lia kuli Zambi; ni mweswe mukwa kuzanga kanasemewa kuli Zambi, kananyingika Zambi.

⁸ Yoze keshi zango, kanyingikine Zambi; mumu Zambi iye zango.

⁹ Muno hanasolola zango lia Zambi ha kutwala kuli yetu, te Zambi hanatumu Mwanenyi wa wika hano hashi, hanga tukapwe ni mwono kuli iye.

¹⁰ Muno mulili zango, kuchapwile ngwe yetu twazangile Zambi, aiioze iye watuzangile yetu, watumine Mwanenyi kupwa kuka ha milonga yetu.

¹¹ Akwetu a zango, kachi chocho Zambi watuzangile, kachi yetu nawa chatutamba kulizanga umwe ni mukwo ni, mukwo.

¹² Niumwe wamwene Zambi niumwe mwaka: kachi mutulizanga umwe ni mukwo ni mukwo, kachi Zambi matwama muli yetu, ni zango lienyi mulipwa lingunu muli yetu.

¹³ Ku chino tunanyingika tuli muli iye, iye muli yetu, mumu hanatupangila Spiritu yenyi.

¹⁴ Yetu hitunamono, twakushindakenya ngwetu, Mwe Tangi hanatumu mwe Mwana akapwe Chilamwina cha akwa hashi.

¹⁵ Mweswawo matayiza ngwo, Yesu iye mwe Mwana Zambi, Zambi matwama muli iye, iye matwama muli Zambi.

¹⁶ Ni yetu tunanyingika, hitunafuliela zango lize Zambi ali nalio hali yetu. Zambi iye zango, ni mweswe matwama ni zango, matwama muli Zambi, ni Zambi matwama muli iye.

¹⁷ Muno zango linapu lingunu ni yetu, hanga tukapwe ni hamu ha tangwa lia upatwilo; mumu ngwe chize apwa iye, chizechene ni yetu nawa twapwa hano hashi.

¹⁸ Woma wakuhi mu zango, niumwe: aiioze zango lingunu mulikatwisa woma, mumu woma lamba ukwete; ni yoze wakwivwa woma kanda achimupwisa mungunu mu zango.

¹⁹ Yetu twakuzanga, mumu iye waliangile kutuzanga.

²⁰ Kachi umwe mamba ngwenyi, Ngunazange Zambi, hindu mapwa ni kole ni ndumbwenyi, iye mukwa mahuza; mumu yoze keshi kuzanga ndumbwenyi yoze hanamumono, ngwe kuchi mahasa kuzanga Zambi yoze kamumweneko.

²¹ Ni shimbi yino tuli nayo ya kuli iye, ngwo, yoze wakuzanga Zambi, akazange ndumbwenyi nawa.