1 Yoano 3 - MUKANDA USANDU WA ZAMBI 1975

¹ Nyongenu zango lipwa haha hanatwehe mwe Tata atuvuluke ngwo, Ana a Zambi. Ha chikuma chino akwa hashi katunyingikineko, mumu kamunyingikineko iye.

² Akwetu a zango, tuli ana a Zambi kulu, ni chize mutukapwa kanda chisoloka, aiioze tunanyingika muze mamusolola iye, yetu mutukalifwa nenyi, mumu mutukamumona ngwe chize apwa.

³ Ni mweswe uli ni kutalatala chino muli iye, kakulitomesa chizechene ngwe iye mutoma.

⁴ Mweswawo mavulumiona, iye chihulia nawa; ni shili we uhulia.

⁵ Ni yenu nunanyingika hanamusolola hanga akachize milonga, ni muli iye shili yakuhi niyimwe.

⁶ Mweswawo matwama muli iye, keshi kuvulumiona: mweswawo mavulumiona kamumwene, chipwe kamunyingikineko.

⁷ Yenu ana akepe, niumwe kanda akanwonga: yoze wakulingalinga ululi iye mukwa ululi, chizechene ngwe iye mukwa ululi.

⁸ Yoze wakuvulumiona iye wa kuli Ndiapu; mumu chize ku uputukilo Ndiapu kakuvulumiona. Mumu ha chino hanasolola mwe Mwana Zambi hanga akonwone yitanga ya Ndiapu.

⁹ Mweswawo masemewa kuli Zambi keshi kuvulumiona, mumu chisemewa chenyi kuchakutwama muli iye: iye kahashile kuvulumiona, mumu hanasemewa kuli Zambi.

¹⁰ Muno kanasoloka ana a Zambi, ni ana a Ndiapu: mweswawo keshi kulinga ululi hi wa kuli Zambi ko, ni yoze keshi kuzanga ndumbwenyi.

¹¹ Mumu lino lie liji lize nwevwile chize ku uputukilo, ngwetu, Chatutamba kulizanga umwe ni mukwo ni mukwo.

¹² Hi ngwe Kene ko wapwile wa kuli mwe chingulungulu, washihile mwanakwo; ha chikuma chika amushihilile? Mumu yitanga yenyi yapwile ya ungulungulu, ni yize ya mwanakwo ya ululi.

¹³ Kanda nukomoka, mandumbu, kachi akwa hashi manuvwila kole.

¹⁴ Tunanyingika hitunakatuka ku kufwa ndo ku mwono, mumu twakuzanga mandumbu. Yoze keshi kuzanga, kanatwama mu kufwa.

¹⁵ Mweswawo mapwa ni kole kuli Ndumbwenyi iye chingalwe, mba nunanyingika chingalwe niumwe uli ni mwono wa mutolo muli iye.

¹⁶ Ku chino tunanyingika zango, mumu iye watumbikile mwono wenyi hali yetu: chatutamba yetu kutumbika mwono wetu hali mandumbu.

¹⁷ Alioze yoze mapwa ni yikumba ya hano hashi, mamona ndumbwenyi kanahono, makalisa mbunge yenyi kuli iye, ngwe kuchi zango lia Zambi mulitwama muli iye?

¹⁸ Anami akepe, kanda tuzanga ni liji, chipwe ni limi; aiioze ni yitanga ni umwenemwene.

¹⁹ Ku chino mutukanyingika tuli a ku umwenemwene, mutukakununa mbunge jetu kumeso jenyi.

²⁰ Mumu kachi mbunge jetu mujituhisa, kachi Zambi iye munene wahiana mbunge jetu, kananyingika yuma yeswe.

²¹ Akwetu a zango, kachi mbunge jetu kujishi kutuhisa, kachi hamu tuli nalio kuli Zambi;

²² ni cheswacho mutwita, mutuchitambula kuli iye, mumu twakufunga shimbi jenyi, twakulinga yuma yize ya kupemena kumeso jenyi.

²³ Ni yino ye shimbi yenyi, tukafuliele ku jina lia Mwanenyi Yesu Kristu, tukalizange umwe ni mukwo ni mukwo, chizechene ngwe hanatwehe shimbi.

²⁴ Ni waze mafunga shimbi jenyi, matwama muli iye, iye matwama muli ayo; ni ku chino tunanyingika katwama muli yetu, te kuli Spiritu yoze hanatwehe.