1 Yoano 2 - MUKANDA USANDU WA ZAMBI 1975

¹ Anami akepe, yino yuma ngunasoneka kuli yenu, hanga kunuchi kuvulumuna, nyi kachi umwe mavulumuna, Hako tuli nenyi kumeso ja mwe Tata, Yesu Kristu, mwe mukwa ululi.

² Iye lie kuka ha milonga yetu; hi ha milonga yetu wika ko, alioza nawa ha milonga ya akwa hashi eswe.

³ Ku chino tunase chinyingi ngwetu, tunamunyingika, kachi tunafungu shimbi jenyi.

⁴ Yoze mamba ngwenyi, Ngunamunyingika, aiioze keshi kufunga shimbi jenyi, iye mukwa mahuza, ni umwenemwene kuushimo muli iye;

⁵ aiioze mweswe mafunga liji lienyi, muli iye chamwenemwene zango lia Zambi linapu lingunu. Ku chino tunanyingika ngwetu, Tuli muli iye;

⁶ yoze mamba ngwenyi, Ngunatwama muli iye, chamutamba nawa kwenda chizechene ngwe endele iye.

⁷ Akwetu a zango, shimbi yaha Chasonekene kuli yenu, aiioze shimbi yikulu yize nwapwile nayo chize ku uputukilo: shimbi yikulu lie liji lize nwevwile.

⁸ Cheka nawa shimbi yaha ngunasoneka kuli yenu; chenacho chamwenemwene muli iye ni muli yenu; mumu milima yinapalika, ni pangu liamwenemwene linapanguka kulu.

⁹ Yoze mamba ngwenyi, Nguli mu pangu, mba mavwila kole ndumbwenyi, mu milima ali ndo haliapwila.

¹⁰ Yoze mazanga ndumbwenyi, matwama mu pangu, ni chitalingiso chakuhi muli iye, nichimwe.

¹¹ Alioze yoze mavwila kole ndumbwenyi mu milima ali, kakwenda mu milima, kanyingikine kuze maya, mumu milima hiyinapupuchisa meso jenyi.

¹² Ngunasoneka kuli yenu, anami akepe, mumu hananukonekena milonga yenu mumu ha jina lienyi.

¹³ Ngunasoneka kuli yenu, atata, mumu nunanyingika yoze wapwa chize ku uputukilo. Ngunasoneka kuli yenu, akweze, mumu hinunakumbu mwe chingulungulu. Ngunasoneka kuli yenu, ana, mumu nunanyingika mwe Tata.

¹⁴ Nasonekene kuli yenu, atata, mumu nunanyingika yoze wapwa chize ku uputukilo. Nasonekene kuli yenu, akweze, mumu nwatakama, ni liji lia Zambi kuliakutwama muli yenu, hinunakumbu mwe chingulungulu.

¹⁵ Kanda nuzanga hano hashi, chipwe yuma yize yili hano hashi. Kachi umwe mazanga hano hashi, kachi zango lia Tata kulishimo muli iye.

¹⁶ Mumu yize yeswe yili hano hashi, usolo wa musunya, ni usolo wa meso, ni kulizata cha mwono, hi ya kuli Tata ko, aiioze ya hano hashi.

¹⁷ Ni hano hashi muhapalika, ni usolo waho: aiioze yoze malinga upale wa Zambi matwama ndo ku miaka ya mutolo.

¹⁸ Yenu ana, haliapwila ye ola ya kusula: ngwe nwevwile ngwo, Mukwa kulimika ni Kristu kumeza, chipwe haliapwila akwa kulimika ni Kristu anji haneza; ku chino tunanyingika haliapwila ye ola ya kusula.

¹⁹ Atuhukile mukachi ketu, aiioze kapwile a kuli yetu; mumu kachi apwile a kuli yetu, kachi atwamine hamwe ni yetu, aiioze hanga akaasolole ngwo, O eswe hi a kuli yetu ko.

²⁰ Ni yenu kuwayisa nuli nacho cha kuli mwe Musandu, nunanyingika yuma yeswe.

²¹ Chasonekene kuli yenu mumu kunwanyingikine umwenemwene, aiioze mumu nunaunyingika, ni mahuza niamwe hi a ku umwenemwene ko.

²² Iya mukwa mahuza shina yoze malikala ngwenyi, Yesu hi Kristu ko? Yono mwe mukwa kulimika ni Kristu, te yoze malikala ni mwe Tata ni mwe Mwana.

²³ Mweswawo malikala mwe Mwana keshi ni mwe Tata nawa: yoze matayiza mwe Mwana, kali ni mwe Tata nawa.

²⁴ Ha kutwala kuli yenu, chize nwevwile katu ku uputukilo chikatwame muli yenu. Kachi chize nwevwile katu ku uputukilo muchitwama muli yenu, kachi ni yenu nawa munukatwama muli mwe Mwana ni muli mwe Tata.

²⁵ Ni chino che chilakenyo chize hanatulakenya, te mwono wa mutolo.

²⁶ Yino yuma hinasoneka kuli yenu ha kutwala kuli waze akunupiangula.

²⁷ Ha kutwala kuli yenu, kuwayisa chize hinunatambula kuli iye kuchakutwama muli yenu, mba kunushi kufupa umwe anulongese; aiioze ngwe kuwayisa chenyi kuchakunulongesa ha kutwala ku yuma yeswe, chinapu chamwenemwene, hi mahuza ko, chizechene ngwe hichinanulongesa, nwakutwama muliiye.

²⁸ Haliapwila, ana akepe, twamenu muli iye; hanga muze makamusolola, tukapwe ni hamu, kutuchi kevwa sonyi kumeso jenyi ha kuheta chenyi.

²⁹ Kachi nunanyingika iye mwe mukwa ululi, nyingikenu mweswe wakulinga ululi kanasemewa kuli iye.