1 Timoteu 5 - MUKANDA USANDU WA ZAMBI 1975

¹ Kanda ukámbila mukulwana ni maliji akalu, alioze liumba kuli iye ngwe kuli tatenu;

² makulwana ja mapwo ngwe amama; mapwo ni miaka yikepe ngwe mapangi, ni kulinanga cheswe; kuli akweze ngwe anaakwenu.

³ Lemesa twamishi a mapwo waze anapu chamwenemwene twamishi.

⁴ Alioze nyi twamishi umwe mapwa ni ana, hanji ajikulu, akalilongese hatangu uwayilo ha kutwala ku mazuwo jo ene, akahilwise chimwe kuli yisemi jo. Mumu chino chinapemena chikolo kuli Zambi.

⁵ Achi, yoze chamwenemwene mapwa twamishi, hanamuhichika ukawenyi, kakutalatala hali Zambi, nikunyongonona mu kuliumba ni kulemba ufuku ni mwalwa.

⁶ Alioze yoze matwama ni kuliyukisa usona weswe, kanafu shimbu achili ni mwono.

⁷ Hana shimbi ha yino yuma nawa, hanga akapwe keshi kapalia.

⁸ Alioze kachi umwe keshi kulisa atu jenyi mwene, ni kuhiana chikolo akwa zuwo lienyi, kachi hanalikate Ufulielo, kapiha kuhiana yoze keshi kufuliela.

⁹ Kanda asoneka mu mukanda twamishi yoze kanda aheta makumi asambano a miaka, yoze amumbachile lunga umuwika,

¹⁰ kanamushindakenya ha yitanga yipema; kachi hanalele ana kachi hanazumbula ngeji, kachi hanasanyisa yiliato ya asandu, kachi hanakwasa akwa kuyindama, kachi hanakaula yitanga yeswe yipema.

¹¹ Alioze kanda usoneka twamishi a mapwo ni miaka yikepe: mumu muze masulumioka kuli Kristu mazanga kuya ulo;

¹² chocho mahia, mumu hanambila Ufulielo wo utangu.

¹³ Malilongesa nawa kulelumioka nikujingajinga ku zuwo ni zuwo; ni hi kulelumioka wika ko, alioze mapwa akwa kalundanganyishi, akwa moko a jiji, nikuhanjika yuma yize kuyatele.

¹⁴ Kashika ngunazange twamishi a mapwo ni miaka yikepe akaye ulo, akaseme ana, akayule yuma ya mu zuwo, kanda akahana unjililo kuli mukwa kulimika akatúke.

¹⁵ Mumu amwe hanakondoloka kulu mukukaula Satana.

¹⁶ Kachi umwe mukwa kufuliela mapwa ni twamishi a mapwo, akaakwase, kanda akalemena chikungulwila, hanga akakwase waze apwa chamwenemwene twamishi.

¹⁷ Makulwana waze akuyula kanawa, katela kwawezela ulemu, kuhiana chikolo kuli waze akukilikita mu milimo ya kwambujola liji ni kulongesa.

¹⁸ Mumu chisoneko chinambe ngwo, Kanda ukasa kata ku kanwa lia ngombe muze mazungula mbuto. Chikwo ngwo, Mukwa milimo kanatela fweto yenyi.

¹⁹ Kanda upanjika ku kusuma hali mukulwana, shina ku makanwa ja yela aali hanji atatu.

²⁰ Waze mavulumuna, ukaakumike kumeso ja atu eswe, hanga akwo nawa akapwe ni woma.

²¹ Shimbi ngunakwehe kumeso ja Zambi ni Kristu Yesu ni angelo a kutongola, ufunge yino yuma, kanda upatula Shimbu-kanda, kanda ulinga nichimwe ni katonde.

²² Kanda ukasayika moko nikawashi hali mutu niumwe, chipwe kanda ulikunda ni milonga ya mbala: ukalinange.

²³ Kanda ukanwa meya wika, alioze tambula kavinyu, mumu ha lufu we ni kukokoloka che chinji.

²⁴ Milonga ya atu amwe yinasoloka liakulu, nikutetekela ku upatwilo; ni yize ya atu amwe yinakaula kunyima.

²⁵ Chizechene nawa yitanga yipema ya amwe yinasoloka liakulu, ni yize muyipwa yeka kuyishi kuhasa kuswama.