1 Timoteu 3 - MUKANDA USANDU WA ZAMBI 1975

¹ Liji lino liamwenemwene ngwo, Kachi umwe mafupa milimo ya kalayi, kachi mazanga milimo yipema.

² Chatamba kashika kalayi akapwe keshi kapalia, lunga wa pwo umuwika, mukwa kukeyela, mukwa mana, mukwa kulita ha yilinga yenyi, mukwa kuzumbula ngeji, mukwa kujama ha kulongesa;

³ hi mukwa chimbangwinya ku vinyu ko; hi mukwa kumbufula, ko; alioze chimbovu, hi mukwa ndombo ko; hi mukwa kufwila mbongo ko;

⁴ mukwa kuyula zuwo lienyi kanawa, ni ana jenyi akumuzeyela, keshi lwelia;

⁵ (nyi mutu kanyingikine kuyula zuwo lienyi mwene, ngwe kuchi mafunga chikungulwila cha Zambi?)

⁶ hi yoze ko hafuliela shimbu likepe, kuchina ha kulifuza malimbuka mu uhie wa Ndiapu.

⁷ Chikwo nawa, chamutamba kupwa ni Shindakenyo yipema kuli waze ali haze; kuchina malimbuka mu luchoko ni mu muheto wa Ndiapu.

⁸ Tuvumbi chizechene hi akwa levelia ko, hi akwa malimi aali ko, hi akwa kunwa vinyu yinji ko, keshi chipululu cha upite wa sonyi;

⁹ akwa kulalaminya ku chijimbikilo cha Ufulielo ni shimbi yipema ya mbunge.

¹⁰ Ni wano aliange kwaeseka; mba, akavumbike ngwe tuvumbi kachi masamba.

¹¹ Mapwo chizechene hi akwa levelia ko, hi yilamikiji ko, akwa kukeyela, amwenemwene ha yuma yeswe.

¹² Kavumbi akapwe lunga lia pwo umuwika, kanayulu ana jo, ni mazuwo jo kanawa.

¹³ Mumu waze mavumbika kanawa malizukila chihela chipema, ni hamu linji mu Ufulielo uze uli muli Kristu Yesu.

¹⁴ Yino yuma ngunasoneka kuli yena, se ngunatatatata kwiza kuli yena nikawashi.

¹⁵ Alioze kachi munguvumiwa chikolo, hanga ukanyingike ngwe chatamba kwenda mu zuwo lia Zambi, che chikungulwila cha Zambi ya mwono, lie nguji ni fundamentu ya umwenemwene.

¹⁶ Ni kutayiza cheswe, chijimbikilo cha uwayilo chinene; yoze amusolwele mu musunya, amusambishile muli Spiritu, wamonekene kuli angelo, amwambujotele hakachi ka mavungu, a mufulielele hano hashi, amutambwile mwilu mu uhenya.