1 Timoteu 2 - MUKANDA USANDU WA ZAMBI 1975

¹ Ngunashinjila kashika, kuhiana yeswe, akaliumbe, akalembe, akahakwile, akasakwile hali atu eswe:

² hali mianangana ni hali waze eswe ali mu yitwamo ya ulemu; hanga tukatwame nikuhwima ni sambukila, ni uwayilo weswe, kukushi lwelia.

³ Mumu chino chinawaha, chinapemena chikolo kuli Zambi Chilamwina chetu,

⁴ yoze unazange atu eswe kulilamwina, akahete ku chinyingi cha umwenemwene.

⁵ Mumu kwali Zambi umuwika, ni chitakanyishi umuwika hakachi ka Zambi ni atu, iye mwe mutu Kristu Yesu,

⁶ yoze waliechele ndando ya ukule hali eswe; Shindakenyo yawo akayambujole ha mwaka uze unalite.

⁷ Ha chuma chino hanangusela mukwa kwambujola ni postolo (ngunahanjika umwenemwene, chahanjikile mahuza), nguli longeshi ya akwa mavungu mu Ufulielo ni umwenemwene.

⁸ Ngunazange malunga akalembe kweswako, nikuzundula moko asandu, keshi utenu hanji kuyambashana.

⁹ Chizechene nawa, mapwo aliwahise ni mazalo aze analite, ni kuhomboka ku meso ni mana; hi ni kuyinda cha kambu ko, hanji oru, hanji kakanga, hanji mahina ja ndando yikalu;

¹⁰ alioze aliwahise ni yitanga yipema ngwe chinatambe mapwo akutayiza uwayilo wa Zambi.

¹¹ Pwo akalilongese nikuhola ni kuzeyela cheswe.

¹² Alioze chishi kutayiza pwo kulongesa, chipwe kuyula mwe lunga, alioze akahole.

¹³ Mumu ahangile kutanga Alama, kulutwe atangile Eva;

¹⁴ ni Alama kongolokele, alioze pwo se ongolokele walimbukile mu Utanguko.

¹⁵ Alioze kumamulamwina ha kusema ana, kachi manyongonona mu Ufulielo, ni zango, ni usandu, hamwe ni mana.