1 Timoteu 1 - MUKANDA USANDU WA ZAMBI 1975

¹ Yami Paulu, postolo wa Yesu Kristu, nikulita ni chiyulo cha Zambi Chilamwina chetu, ni cha Kristu Yesu, iye kutalatala chetu;

² Kuli Timoteu, mwanami pundu mu Ufulielo: Vumbi, ni keke, ni sambukila ya kuli Zambi Tata yetu, ni Kristu Yesu Mwene wetu.

³ Ngwe nakushinjilile usale mu Efwesu, shimbu munguchiya ku Masendoniya, hanga ukakanjise amwe atu, kanda alongesa longeso lieka.

⁴ Chipwe kanda apanjika ku yishima yamokomoko, ni kujichika miya yize kuyishi songo, yenayo kuyakuneha mbandanga, alioze kuyishi kusenyesa kulutwe uselo wa Zambi, uze uli mu Ufulielo.

⁵ Alioze songo lia shimbi ngwo, Zango lia ku mbunge yitoma, ni shimbi yipema ya mbunge: ni Ufulielo uze kuushi ulembekese.

⁶ Ku yuma yino amwe se apiasukile, hanakondolokela ku pande jamokomoko.

⁷ Kanazange kupwa alongeshi a shimbi, alioze chize akwamba kuchaalumbunukine, chipwe ha kutwala ku chize akushindakenya ni tachi.

⁸ Alioze tunanyingika shimbi yinawaha, kachi umwe malinga nayo nikulita ni shimbi.

⁹ Nikunyingika chino, shimbi kayikolesele hali mukwa ululi, alioze ayikolesele hali yihulia ni akwa kulolema, ni yitanganyanyi ni yivulumunyi, ni akwa luchisa ni yijiluke, ni akwa kulamba atato, ni akwa kulamba anaye, ni yingalwe,

¹⁰ ni yitanji, ni akwa utumwa, ni yikwachi, ni akwa mahuza, ni akwa kulishinga ni mahuza, nyi kachi muchipwa chuma chimwe chikwo cha kulimika ni longeso lingunu;

¹¹ lize linate ni sango lipema lize hanangukunjika, lia uhenya wa Zambi wa kuwaha.

¹² Nakusakwilila yoze wakunguhashisa, iye Kristu Yesu Mwene wetu, mumu Wangumwene nguli wamwenemwene, hangusela ku uvumbiko;

¹³ chipwe napwile kunyima mukwa kushililika Zambi, mukwa kuhungumiona, mukwa kupopolola: alioze nawanyine keke, mumu nachilingile ni kwalajala, nikuhona Ufulielo.

¹⁴ Ni vumbi lia Mwene wetu lialumbamine kuhiana chikolo, hamwe ni Ufulielo, ni zango, lize lili muli Kristu Yesu.

¹⁵ Liji lino liatela kufuliela, linatambe kutá cheswe, ngwo, Kristu Yesu wejile hano hashi mukulamwina yivulumunyi; hakachi ko, yami nahiana.

¹⁶ Alioze ha chikuma chino nawanyine keke, hanga muli yami ngwe mutangu, Yesu Kristu akasolele uhomboloji wenyi weswe, chikapwe cheseko kuli waze mafuliela kuli iye ha mwono wa mutolo.

¹⁷ Haliapwila kuli Mwanangana wa mutolo, keshi kuhasa kupola, keshi kumoneka, mwe Zambi umuwika, ulemu ni uhenya ukapwe ndo ku miaka yeswe ya mutolo. Amene.

¹⁸ Shimbi yino ngunakukunjikayo, mwanami Timoteu, nikulita ni uprofeto wa kutwala kuli yena, hanga ukase nawo jita yipema.

¹⁹ Ukakakaminye ku Ufulielo ni mbunge yipema; amwe se hanalichinjiyo, asakaminyine mu jila ha kutwala ku Ufulielo.

²⁰ A kuli ayo kanapu Heweneu ni Alezandre; wano naakunjikile kuli Satana, hanga akafumbiwe alitwamine kushililika Zambi.