1 Tesalonika 5 - MUKANDA USANDU WA ZAMBI 1975

¹ Alioze ha kutwala ku tungonde ni miaka, mandumbu, kuchatambile kusoneka nichimwe kuli yenu.

² Mumu yenwene nunanyingika pundu, tangwa lia Mwene chocho muliza ngwe mwiji ha ufuku.

³ Mumu muze mamba ngwo, Sambukila, kutwama kawape, hohene kwenyeka muchitulumuka hali ayo ngwe kufumbajala hali pwo yoze uli ni ufumba; no kechi komboka nichimwe.

⁴ Alioze yenu, mandumbu, kunushi mu milima, tangwa lize likanuwane ngwe mwiji.

⁵ Mumu yenu eswe nuli akwa pangu, akwa mwalwa: hi tuli akwa ufuku ko, chipwe akwa milima, ka.

⁶ Chocho kevwe kanda tuya tulo ngwe akwo, alioze tulénu, tukeyelenu.

⁷ Mumu waze akuya tulo, kakuya tulo ha ufuku; ni waze akuzengewa, kakuzengewa ha ufuku.

⁸ Alioze yetu, se tuli akwa mwalwa, tukeyelenu, tukazale chipwiko cha utale cha Ufulielo ni zango; ni ha ngalau, tuzale kutalatala cha ulamwino.

⁹ Mumu Zambi katuselele ku atenu, alioze tukazuke ulamwino kuli Mwene wetu Yesu Kristu,

¹⁰ yoze watufwilile, hanga chipwe tunalaula, chipwe tuli mu tulo, tukatwame ni mwono hamwe nenyi.

¹¹ Kashika lishinjilenu umwe ni mukwo, likolesenu umwe ni umwe, chizechene ngwe nwakulinga.

¹² Tunaliumbu kuli yenu, mandumbu, nukanyingike waze akukilikita hakachi kenu, ni waze akunwendesa muli Mwene, ni waze akunukanyamisa;

¹³ nukaalemese kuhiana chikolo mu zango, mumu ha milimo yo. Pwenu ni sambukila hakachi kenu.

¹⁴ Alioze tunaliumbu kuli yenu, mandumbu, nukakanyamise yilumbuke, sangulwisenu akwa ulenda ku mbunge, kolesenu akwa kulela, lihumikizenu ni eswe.

¹⁵ Kanyamenu niumwe kanda afwetesa kuli mukwo yipi ha yipi; alioze kaulenu yipema matangwa eswe, umwe kuli mukwo, ni kuli eswe.

¹⁶ Wahililenu matangwa eswe.

¹⁷ Lembenu, nikulitwamina nichimwe.

¹⁸ Ha yuma yeswe Sakwilenu; mumu chino we upale wa Zambi muli Kristu Yesu hali yenu.

¹⁹ Kanda nujima Spiritu.

²⁰ Kanda nupwisa wamokomoko uprofeto;

²¹ alioze esekenu yuma yeswe; kakaminyenu ku yize yinapeme.

²² Súlenu ku milali yeswe ya ungulungulu.

²³ Haliapwila Zambi ya sambukila iye mwene akanusele ku usandu liakulu; akafunge maspiritu jenu ni alma jenu ni mijimba yenu ya muwundu, yikapwe kuyishi chitela ha kuheta cha Mwene wetu Yesu Kristu.

²⁴ Mukwa kunutambika wamwenemwene, iye kumakachilinga.

²⁵ Mandumbu, lembenu hali yetu.

²⁶ Menekenu mandumbu eswe ni mbeju yisandu.

²⁷ Ngunanushinji kuli Mwene akatange mukanda uno kuli mandumbu eswe asandu.

²⁸ Vumbi lia Mwene Yesu Kristu lipwe ni yenu.