1 Tesalonika 4 - MUKANDA USANDU WA ZAMBI 1975

¹ Ha yize yinasala, mandumbu, tunaliumbu, nikunushinjila muli Mwene Yesu, chizechene ngwe nwatambwile kuli yetu, ngwe chize Chanutamba kwenda ni kupemena kuli Zambi, chizechene ngwe nwakwenda, hanga nukalumbamemo nawa ni nawa.

² Mumu nunanyingika shimbi jize twanuhele ja kuli Mwene Yesu.

³ Mumu chino we upale wa Zambi, ngwetu, usandu wenu, nukachine utanji.

⁴ Mweswe wa kuli yenu akanyingike kufunga sapa yenyi mwene ni usandu ni ulemu.

⁵ Hi ni kusasaminya cha usolo ko, chizechene ngwe akwa mavungu waze kanyingikine Zambi.

⁶ Niumwe kanda ahiana akavulumune ndumbwenyi ha chuma chino: mumu Mwene iye mukwa kukala yino yuma yeswe, chizechene ngwe twanwambulwilile kulu twashindakenyene chikolo.

⁷ Mumu Zambi hanatutambika hi mukulinga luchisa ko, alioze ku usandu.

⁸ Kashika yoze malituna, malituna hi atu ko, alioze Zambi, yoze wakunwaha Spiritu yenyi Musandu.

⁹ Alioze ha kutwala ku kufwila cha mandumbu, kuchatambile kusoneka kuli yenu: mumu yenwene nunalongoloka kuli Zambi kulizanga umwe ni mukwo;

¹⁰ mumu chamwenemwene nwakuzanga mandumbu waze eswe ali mu Masendoniya mweswe. Alioze tunaliumbu, mandumbu, nukalumbamemo nawa ni nawa;

¹¹ nukeseke chikolo kuhola ni kulinga milimo ya yenwene, ni kukilikita ni moko ja yenwene, chizechene ngwe twanwambile;

¹² hanga nukende ngwe chinalite kuli waze ali haze, hanga kunuchi kahona nichimwe.

¹³ Alioze kutwazangile nukalajale, mandumbu, ha kutwala kuli waze hanayi tulo; kunuchi kevwa chinyengo ngwe akwo waze keshi kutalatala.

¹⁴ Mumu nyi hinafuliela ngwetu, Yesu yafwa, yahinduka, chocho waze nawa hanayi tulo, Zambi, kuli Yesu, kumakaaneha hamwe nenyi.

¹⁵ Mumu chino tunambe kuli yenu ku liji lia Mwene ngwetu, Yetu tuli ni mwono, tunasala ndo ku kuheta cha Mwene, kutuchi katetekela nichimwe waze hanayi tulo.

¹⁶ Mumu Mwene, iye mwene, kumakahulumuka mwilu, ni liji lia mutambi, ni liji lia mungelo wa lutwe, ni chitavwi cha Zambi: ni afu muli Kristu kumakalianga kuhinduka.

¹⁷ Mba kulutwe yetu, tuli ni mwono, twasala, kumakatupindumuna hamwe no mu malelwa, mukutakana ni Mwene mu tetela: chocho mutukapwa matangwa eswe hamwe ni Mwene.

¹⁸ Kashika lilembejekenu umwe ni mukwo ni maliji ano.