1 Tesalonika 3 - MUKANDA USANDU WA ZAMBI 1975

¹ Kashika muze kutwahashile kulihumikiza nawa, twashinginyekene chipema atuhichike kunyima ku Atene ukawetu.

² Twatumine Timoteu, ndumbwetu, kanda kavumbi ka Zambi mu sango lipema lia Kristu, mukunutakamisa, nikunulembejeka ha kutwala ku Ufulielo wenu;

³ kuchina amwe makokoloka mu luyinda yono, mumu nunanyingika yenwene hanatusela ku chino.

⁴ Mumu chikwo nawa, muze twapwile hamwe ni yenu, twanwambulwilile Shimbu-kanda ngwetu, Mutukapwa mu luyinda; chizechene ngwe wejile ni yenu nunanyingika.

⁵ Ha chikuma chino ni yami nawa se Chahashile kulihumikiza nawa, natumine hanga ngukanyingike Ufulielo wenu, kuchina hanji mukwa kuzeza hanweseka kulu, kukilikita chetu chikapwe chamokomoko.

⁶ Alioze muze te Timoteu heza kuli yetu ha kukatuka kuli yenu, hatwambulwila sango lipema lia Ufulielo wenu ni zango lienu, ngwe nwakutwiwuluka ni vumbi matangwa eswe, nikwivwa usona wa kutumona, chizechene ngwe yetu nawa twakwivwa usona kunumona.

⁷ Ha chikuma chino, mandumbu, hanatulembejeka hali yenu mu huli lietu lieswe ni luyinda ku Ufulielo wenu:

⁸ mumu haliapwila mutupwa ni mwono, kachi yenu munumana ngú muli Mwene.

⁹ Mumu kusakwila chika mutuhasa kulambula cheka nawa kuli Zambi hali yenu, ha uwahililo weswe uze twakuwahilila nawo mumu hali yenu kumeso ja Zambi yetu;

¹⁰ ufuku ni mwalwa, ni kuliumba chikolo, hanga tukamone meso jenu, hanga tukapwise chingunu chize chinahono ku Ufulielo wenu?

¹¹ Haliapwila Zambi kanda Tata yetu, iye mwene ni Mwene wetu Yesu, akatondekeze jila yetu kuli yenu.

¹² Ni Mwene akanuwezele zango lia kulumbama umwe kuli mukwo, ni kuli atu eswe, chizechene ngwe yetu twakulinga kuli yenu;

¹³ hanga akatakamise mbunge jenu kujishi chitela, jisandu kumeso ja Zambi kanda Tata yetu, ha kuheta cha Mwene wetu hamwe ni asandu jenyi eswe.