1 Tesalonika 2 - MUKANDA USANDU WA ZAMBI 1975

¹ Mumu yenwene, mandumbu, nunanyingika kunjila chetu kuli yenu, kuchapwile chamokomoko;

² alioze se twevwile lamba kunyima, kuze atulingile chipi, chizechene ngwe nunanyingika, mu Fwilipu, twahamukine muli Zambi yetu kuhanjika kuli yenu sango lipema lia Zambi, hamwe ni kulitachika chinji.

³ Mumu kushinjila chetu kuchapwile cha kwonga, hanji cha luchisa, hanji cha kalimbalimba, ka.

⁴ Alioze chizechene ngwe hanatusela Shindakenyo yipema kuli Zambi, akatukunjike sango lipema, chocho twakuhanjika; hi ngwe mutupemena kuli atu ko, alioze tukapemene kuli Zambi, yoze wakweseka mbunge jetu.

⁵ Mumu nilimwe tangwa kutwahanjikile ni maliji a kupepieka, chizechene ngwe nunanyingika, chipwe ni ulembekese wa kuzo, ka; Zambi iye chela;

⁶ chipwe tukafupe uhenya kuli atu, chipwe kuli yenu, chipwe kuli akwo, ka, muze te twahasa kunulemena ngwe apostolo ja Kristu.

⁷ Alioze twendele makoke mukachi kenu, chizechene ngwe muze naye masusuminya ana jenyi mwene.

⁸ Chocho nikunufwila chikolo, chatuwahilile kulianyina ni yenu, hi sango lipema wika ko, alioze kulihana yetwene nawa, mumu nwapwile akwetu tunanuzange chikolo.

⁹ Mumu nunewuluka, mandumbu, kukilikita chetu ni kuhondangana chetu; nikulinga milimo ufuku ni mwalwa, hanga kutuchi kalemena kuli niumwe wa kuli yenu, twambujolele kuli yenu sango lipema lia Zambi.

¹⁰ Yenu nuli yela, ni Zambi nawa, ngwe chize twendele hakachi kenu akwa kufuliela, ni kulinanga ni ululi, chitela te kuchishiko.

¹¹ Chizechene ngwe nunanyingika, ngwe chize twapwile nikushinjila mweswe wa kuli yenu, ngwe umwe tato mashinjila ana jenyi mwene, nikunusangulwisa, nikushindakenya,

¹² hanga nukende ngwe chinatela Zambi, mukwa kunutambika ku wanangana wenyi mwene ni uhenya.

¹³ Ha chikuma chino twakusakwila kuli Zambi, nikulitwamina nichimwe, ngwe muze nwatambwile liji lia sango lia Zambi kuli yetu, nwalitambwile hi ngwe liji lia atu ko, alioze chizechene ngwe liapwa chamwenemwene, liji lia Zambi, lienalio nawa kuliakulinga kanawa muli yenu akwa kufuliela.

¹⁴ Mumu yenu, mandumbu, nwalumukine akwa kwimbulula yikungulwila ya Zambi yize yili mu Yundeya muli Kristu Yesu: mumu ni yenu nawa nwevwile lamba lia yuma yimuwika kuli akwa vungu lia yenwene, chizechene ngwe ayo nawa evwile kuli A-Yunda:

¹⁵ waze ashihile Mwene Yesu ni aprofeta jo ene; atuhumine haze nawa; keshi kupemena kuli Zambi; kakulimika ni atu eswe.

¹⁶ Kakutukanjisa kuhanjika kuli akwa mavungu, kuchina maalamwina; hanga akazalise liakulu njongo ya milonga yo matangwa eswe: alioze utenu hiuneza hali ayo liakulu.

¹⁷ Alioze yetu, mandumbu, se tunahandunuka kuli yenu ha shimbu likepe mu mujimba, hi mu mbunge ko, twalipupwishile kuhiana kumona meso jenu ni usona wunji;

¹⁸ mumu twazangile kwiza kuli yenu, yami Paulu, kanji kanji; alioze Satana watukwikile.

¹⁹ Mumu chika kutalatala chetu, hanji uwahililo, hanji chipangula cha kulisamba? Hi yenwene ko kumeso ja Mwene wetu Yesu ha kuheta chenyi, nyi?

²⁰ Mumu yenu nunapu uhenya wetu ni uwahililo wetu.