1 Tesalonika 1 - MUKANDA USANDU WA ZAMBI 1975

¹ Yetu, Paulu, ni Selevwanu, ni Timoteu, Ku chikungulwila cha A-Tesalonika muli Zambi Tata ni Mwene Yesu Kristu: Vumbi kuli yenu ni sambukila.

² Twakusakwila kuli Zambi matangwa eswe hali yenu, nikunuvulwoka mu yilemba yetu.

³ Kutushi kulitwamina kwiwuluka milimo yenu ya Ufulielo, ni kukilikita chenu cha zango, ni uhumikizo wa kutalatala chenu muli Mwene wetu Yesu Kristu, kumeso ja Zambi yetu kanda Tata yetu.

⁴ Mumu yenu mandumbu jetu, kananuzange kuli Zambi, tunanyingika ngwe hananutongola.

⁵ Mumu sango lietu lipema kuliejile kuli yenu ni liji wika, alioze ni tachi nawa, ni Spiritu Musandu, ni kukununa chinji; chizechene ngwe nunanyingika chize twapwile hakachi kenu mumu hali yenu.

⁶ Ni yenu nwalumukine akwa kutwimbulula, ni akwa kwimbulula Mwene, se nwatambwile liji lia Mwene mu luyinda munji hamwe ni uwahililo wa Spiritu Musandu.

⁷ Chocho nwalumukine yeseko kuli waze eswe akufuliela mu Masendoniya ni Akeya.

⁸ Mumu kuli yenu liji lia Mwene hiliahiohia, hi mu Masendoniya ni Akeya wika ko, alioze nawa mu yifuchi yeswe Ufulielo wenu kuli Zambi hiunafumana; chocho kuchatutambile yetu kwamba nichimwe.

⁹ Mumu ayo ene kakwambujola ha kutwala kuli yetu, kunjila chize twapwile nacho kuli yenu; ni ngwe chize nwatewulukilile kuli Zambi nikwehuka mahamba, mukulingila Zambi ya mwono, wamwenemwene,

¹⁰ nikutwaminyina Mwanenyi ku malilu, yoze amuhindwishile hakachi ka afu, iye Yesu, yoze wakutupulula ku utenu uze muwizaho.